少年成長今日: 0|主題: 16053

收藏本版

發帖

返回列表

跳至頁

查看: 11626 | 回覆: 0

守信用 [複製鏈接]

csir3290

子爵府

積分: 12230

1^#

發表於 22-6-12 11:11 |只看該作者 |倒序瀏覽 |打印

我哋做家長每一日唔多唔少都會應承細路仔好多嘢。有陣時為咗敷衍啲細路仔又或者唔想用咁多時間就會隨口應承佢哋。有陣時又為咗鼓勵啲細路仔等佢哋做好啲，又會同佢哋開咗好多條件，應承佢哋做到乜嘢程度就會有獎勵。總之家長由細路仔細個開始都會同仔女做好多承諾，應承佢哋好多嘢。但係好多時家長都會不經意咁冇遵守到自己嘅承諾。可能家長都有聽過自己啲仔女投訴自己成日都唔守信用。

嗰日一家行過玩具店就聽到個家長同個細路仔講話想佢今次考試成績進步，如果考頭三名就買嗰樣都幾貴嘅玩具畀佢，點知就聽到個細路同個家長講話「你成日都係咁講㗎啦，你上次夠話買啲乜嘢乜嘢囉，咪又係嫌貴冇買！」跟住我就聽到個家長喺度解釋咗一輪，但係似乎個細路仔都仲係唔係好滿意。

呢啲情況其實我哋可能經常都遇到，原因都係因為家長好多時其實唔係好重視呢啲承諾，以為可以講下就算，可以氹住個細路仔先。而且就算做唔到家長都可以用佢嘅權威將細路仔嘅不滿壓咗落去。但係偏偏相反，其實細路仔係好重視家長對佢哋嘅承諾，就算係幾少嘅事都好，一係就唔好應承，作為家長如果應承咗就應該要做得到。如果唔係久而久之連自己嘅仔女都唔信家長嘅話，親子關係就咁慢慢無形中受到破壞。所以有陣時家長要同細路仔講條件嘅時候，真係要諗清楚自己係咪做得到，同埋幾時會做先至好應承細路仔。唔好以為佢哋係細路仔所以唔緊要，正正係細路仔就要教佢哋承諾嘅重要性，亦都要教佢哋唔好口輕輕，做唔到嘅嘢都隨便應承，更何況學校都教啲細路仔要守信用同埋誠實啦！唔通家長自己就正正做反面教材咩！

當家長同細路仔做承諾嘅時候，畀自己嘅細路仔抽秤其實都幾尷尬，原來呢個就係家長喺細路仔心目中嘅形象。所以做家長千祈唔好忽視同細路仔嘅承諾，如果你做唔到寧願同細路仔解釋點解唔得，總好過應承咗你又做唔到。更加唔好因為想敷衍或者唔想啲細路仔煩住自己嘅時候而隨便應承。記住細路仔其實自細最信任嘅就係家長，但係呢種信任好多時都係由家長自己一手破壞。做家長亦都唔應該隨便用承諾嚟換取細路仔達致某啲家長嘅要求，我哋係要教到細路仔點樣達至要求而唔係用條件去交換令到細路仔達到要求，所以家長同細路仔造承諾之前真係要諗清楚，千祈唔好隨便信口開河，亦都千祈唔好忽視唔守信用對細路仔嘅影響。