少年成長今日: 1|主題: 16049

收藏本版

發帖

返回列表

跳至頁

查看: 13600 | 回覆: 0

沒有比溝通更重要的事 [複製鏈接]

csir3290

子爵府

積分: 12217

1^#

發表於 22-9-18 11:09 |只看該作者 |倒序瀏覽 |打印

呢輪公司好多嘢做好忙，晚晚都做到差唔多七點先至返屋企，番到屋企即刻沖涼搞到差唔多成八點先至食完飯，兩姊弟十點鬆啲就話要上床瞓覺，所以同佢兩個坐埋一齊嘅時間都唔係好多。有陣時我自己返到屋企都仲要做下嘢添，就更加少時間同佢哋坐埋一齊。每一日返到屋企都好攰想即刻抖吓，但可能因為啱啱開學，佢兩姊弟其實每日都好多學校嘅嘢想同我哋兩公婆講。所以只要一番到屋企沖完個涼一坐低，佢兩姊弟就已經不停咁同我哋兩公婆講嘢，同我哋講下學校發生啲乜嘢事，學校點樣同老師點樣講，總之就好多嘢。但係講真有陣時真係攰到唔係好想答佢哋。但係每一次見到佢哋講得咁興起，唔答佢哋或者敷衍佢哋又好似唔係幾好，終於都係要好用心聽佢哋講畀反應佢哋，因為都知道細路仔大個，如果你開始唔想同佢哋講嘢其實慢慢溝通就會越嚟越少。佢哋講嘅通常都係啲日常瑣事，但係我同老婆又要好有耐性咁聽佢哋講仲要畀反應佢哋，失驚無神佢哋又會問我哋，知唔知啲嘢點解，因為佢兩個其實都好鍾意喺網上面或者睇書，睇好多唔同嘅知識，跟住就好鍾意問我同老婆知唔知啲嘢點解，然之後就解畀我哋聽，連我個女有一晚突然間都同我哋講話我哋屋企講嘅嘢有時好有深度，因為嗰晚一路食飯，我哋睇緊新聞講緊貨幣貶值，阿女就問我哋乜嘢係貨幣貶值，咁終於我哋就一齊傾咗一輪研究貨幣貶值嘅影響。

其實同細路仔溝通就係咁樣，當佢哋仲肯同家長分享佢哋每日發生嘅事或者好多嘢想問，好多嘢好奇嘅時候，家長就要懂得珍惜呢啲時間，好好哋同佢哋溝通同埋建立關係，正如我成日都講所謂溝通其實就係呢種日常大家互相嘅交流，我明白家長要返工亦都好多嘢要做，而且有陣時細路仔講嘅嘢亦都可能係好無關重要，或者係對於家長嚟講係一啲好幼稚嘅嘢。但係無論點樣都好，做家長就要珍惜細路仔肯同自己溝通嘅時間，無論幾攰都好，如果當細路仔發覺家長越嚟越敷衍佢哋，或者唔想同佢哋傾，慢慢其實調返轉細路仔就會越嚟越唔想同家長講嘢，到頭來大家錯失咗可以好好地溝通同埋建立關係嘅時機，到最後發覺大家冇溝通嘅時候要改變就會難好多。我成日都講溝通唔係要有事先至去溝通，而係冇事嘅時候就更加要建立溝通嘅基礎。如果細路仔一路長大都覺得家長並唔係佢哋能夠溝通同埋傾到計嘅對象，大家嘅關係就只會變得越嚟越疏離。所以做家長真係要珍惜細路仔仲同自己傾緊啲無謂嘢嘅時間，每一日好好地用啲時間同佢哋傾下偈，聽下佢哋講嘢了解下佢哋內心嘅感受。從中亦都可以了解下佢哋待人處事嘅方法，亦都可以令到佢哋嘅好奇心同埋求知慾不停增長。因為只有家長肯聽佢哋講佢哋發掘到嘅新知識覺得有成功感，佢哋先至會繼續肯去搵一啲新嘅嘢同家長去講。家長亦應該盡量唔好錯失任何可以同自己仔女溝通嘅機會。