少年成長今日: 0|主題: 15914

收藏本版

回覆發帖

返回列表

跳至頁

查看: 8896 | 回覆: 2

愉快的旅程 [複製鏈接]

csir3290

子爵府

積分: 11279

1^#

發表於 24-8-25 11:11 |只看該作者 |倒序瀏覽 |打印

上次講完一家人去自由行想玩得開開心心，喺編排行程方面要注意嘅地方，今次就想講下喺行程期間其實做家長都有啲嘢我覺得係需要留心嘅，否則雖然有好嘅行程編排，但係都係有可能會演變成為大家溝通上面嘅災難。

首先一家人去旅行當然係會影好多相啦！但係要知道青春期嘅細路仔已經唔再係好似佢哋以前細細個咁，你想佢點影就叫佢點影嘅細路仔，佢哋變得更注重自己形象，家長要善於觀察佢哋嘅眉頭眼額，千祈唔好再勉強佢哋影一啲佢哋覺得唔想影嘅相。好似今次旅程咁，我負責影相同埋拍片，就更加要睇住阿仔阿女嘅眉頭眼額，雖然佢哋都仲係好尊重我，但係有陣時你望下佢表情，你就知道佢哋唔想咁影，所以亦都無謂勉強，況且一家人影大合照嘅時候其實佢哋都好合作好願意，所以如果佢哋覺得唔想影嘅就由得佢哋，而喺旅程期間阿仔阿女你都真係有出過聲話唔使影啦！所以就要尊重佢哋嘅諗法，就算畀你逼到佢哋影，影完佢哋唔開心又何必呢！反而你尊重佢哋，到真係要影啲大合照嘅時候，佢哋會開開心心合作一齊影咁咪仲好！而呢度亦都帶出另外一個家長要注意嘅地方，就係唔好做一啲令到仔女覺得尷尬嘅事情。呢個時候嘅細路仔好注重自己形象亦都唔希望標奇立異。好多家長唔為意以為佢哋仲係細路仔，就硬係要佢哋做一啲家長認為冇問題嘅嘢，最常見嘅就係唔守規矩怕蝕底，家長自己唔想做就推咗啲細路仔去做先。其實咁樣係最破壞大家嘅關係，阿女自己有陣時都會講見到人哋咁做覺得咁樣好尷尬。總之家長做好自己嘅本份，守規矩唔好貪小便宜，唔好推啲仔女出嚟做啲佢哋認為尷尬嘅嘢，咁樣亦係減少大家發生唔開心事情嘅機會。

家長亦都要注意控制自己嘅情緒，其中一樣最容易令人喺行程上面出現情緒唔好嘅地方就係趕時間同埋行錯路。但係我老婆今次編嘅行程因為時間好充裕，而且我哋都知道行錯路係一定會發生嘅，所以冇必要因為咁樣而令大家唔開心。今次行程上面我發覺用手機真係唔夠一對仔女嚟，所以整個行程我都放曬手交畀一對仔女用手機負責幫我哋帶路，講真真係有試過行錯路，又或者我認為行呢邊佢哋認為行嗰邊嘅情況，但係呢啲根本就唔係一個乜嘢大問題，因為我哋時間好充裕，而且我都經常讚佢兩個帶路嘅本領非常之高，好多時佢哋揸住個google map就已經幫我哋搵到要行嘅路，要答嘅火車班次同埋轉車嘅地方。而且因為成日讚住佢哋話佢哋帶路叻，佢哋亦越做越有興趣。所以喺今次行程入面，我都係翹埋雙手跟住佢哋行就可以，只要記住行錯路係在所難免冇乜嘢大件事，只要放鬆心情就一定去到要去嘅地方。

另一樣我覺得最容易出問題嘅地方就係喺買紀念品或者買禮物上面，喺今次行程上面阿仔阿女都曾經講過話想買禮物畀同學，咁為咗減少爭拗，所以我哋每人都會畀定一個額嘅零用錢佢哋，佢哋自己決定買啲乜嘢。講真我哋只要知道其實呢啲景點對於佢哋嚟講可能未必會再嚟或者會嚟好多次，所以佢哋買啲紀念品嘅時候，家長唔好成日用個心態就係覺得冇用同埋買嚟唔知做乜，因為紀念就係用嚟紀念，用嚟提醒自己曾經去過呢一度地方。所以為咗減少爭拗，最好就係畀定一個額度嘅零用錢佢哋，由佢哋自己去決定點樣用同買啲乜嘢小紀念品。除咗可以減少爭拗之餘亦都可以幫佢哋學下理財。至於其他好似買衫買鞋咁就當然係我哋幫佢哋畀啦。至於零用錢嘅數量係幾多當然大家要有商有量大家亦都要明白大家嘅處境。我唔係話仔女要幾多就畀幾多，反而係大家要互相溝通，仔女亦都要明白父母嘅預算，咁樣大家爭拗嘅機會亦都可以減少。

另外我覺得喺旅程中都需要尊重大家嘅私人空間，例如好似搭車嘅時間，佢哋鍾意碌手機就由得佢哋，亦都唔好干涉佢哋睇啲乜嘢，只要去到食嘢嘅時間大家都有個共識就係大家都放低部手機傾下偈就可以。而喺酒店我哋亦都有各自嘅房間，夜晚返到酒店之後沖完曬涼，我哋都會去阿仔阿女間房到聚一聚可能睇下電視食下嘢咁，當say完 good night之後我同老婆就會返自己房，跟住就係佢哋自己嘅時間，通常只係提醒佢哋唔好咁夜瞓，同提醒佢哋第二朝幾點出發同要幾點起身。而每一次過佢哋房嘅時候，我哋都會先打電話畀佢哋話畀佢哋聽，我覺得咁樣亦都係減少大家覺得對方篤眼篤鼻嘅時間，正如我成日都講，如果大家長時間喺埋同一個空間，家長好多時都會見到好多嘢唔順眼，但係反而調返轉好似而家咁，雖然佢哋自己一間房，但係我每一次入去佢哋間房嘅時候我都會讚下佢哋間房執得好整齊，反而仲會覺得佢哋越嚟越自動自覺，執好要用嘅嘢，每一朝早起身嘅時候就會打電話畀佢哋提醒佢哋好似morning call咁，咁佢哋就會自己梳洗，到出發嘅時候先至去佢哋間房度集合。咁反而大家都會輕鬆啲，總之大家都各自尊重大家嘅私人空間，大家都過得輕鬆啲同愉快啲。

到最後其實大家要明白去旅行都係無非想一家人開開心心增進感情，所以家長只要放鬆一啲，多啲尊重仔女嘅諗法，其實旅行就會變成一家人增進感情嘅大好機會。