少年成長今日: 1|主題: 16021

收藏本版

發帖

返回列表

跳至頁

查看: 30480 | 回覆: 0

打、鬧、講道理 [複製鏈接]

csir3290

子爵府

積分: 12064

1^#

發表於 24-2-18 10:56 |只看該作者 |倒序瀏覽 |打印

早幾日聽收音機，主持傾緊三個好多家長都用嘅教仔方法，就係「打」，「鬧」同「講道理」。好多家長教細路仔其實都係用緊呢三個方法，但係我自己覺得用嚟教細路仔，其實呢三個方法嘅效用都不大。

首先今時今日教細路仔根本就已經唔可以用打嘅方法，唔似我哋上一代郁啲就「藤條炆豬肉」，我自己細個都有畀家長打過，但係今時今日如果再係經常用打嘅方法，隨時都會惹上官非，就算連細路仔自己都識得講畀家長虐待。更加重要嘅就係根本打，只不過係令到個細路仔越嚟越唔鍾意，而且有時家長用打最終就變成自己發洩情緒越打越犀利，根本就失去咗教嘅意義。另外用打嘅效用只會越嚟越細，因為都畀你打慣咗，所以根本細路仔就越嚟越唔驚，而且為咗唔好俾人打，就會用盡方法講大話掩飾犯錯。更甚係每一次用打都只不過係破壞緊大家嘅關係。所以撇除犯唔犯法，其實用打嘅方法根本個成效就好低，唯一嘅作用可能只不過係收到即時嘅阻嚇，同埋畀家長發洩咗個情緒。打完之後如果要真係修補返關係同埋善後，可能要用上更多嘅時間，所以我覺得用打呢個方法其實根本就一啲正面作用都冇。

至於用鬧，呢個就一般家長好多時都會用到嘅方法，唔係冇用，因為可以收到即時效果，但係亦都好容易淪為家長發洩情緒嘅手段，而且好多時中國人鬧仔用嘅詞語都係比較抽象同概括，例如蠢呀冇用呀之類嘅詞語，如果經常都係用呢啲詞語嘅話，其實細路仔根本就未必知道自己做錯啲乜嘢，反而只係令到佢哋歸納出原來自己係蠢係冇用，所以用鬧我覺得都要用得有技巧，當然首先盡量唔好傷到細路仔嘅自尊心，都要畀佢哋知道究竟係因乜嘢事犯錯，同做錯啲乜嘢，鬧完之後亦都要教佢哋點樣可以做得更好，如果次次都係鬧完就算，其實鬧嘅效用又會只會越嚟越低，細路仔亦都係當耳邊風。

最後講道理，我諗而家好多新一輩嘅家長都認為要同細路仔講道理，但係我覺得其實對越細嘅細路仔講道理亦都冇乜用，只需要令到佢知道邊啲嘢係唔做得，長篇大論講道理佢哋都未必明。再者細路仔越嚟越大個，進入青春期就更加難，因為你同佢長篇大論講道理，但佢哋有自己嘅諗法亦都唔係會好理個家長。進入青春期嘅細路如果你仲長篇大論同佢講只不過會令到佢哋反感，再極端啲就係你講東時佢做西。

我咁講好似打鬧同講道理都唔得，其實又唔係咁，只不過係要適時咁運用，不過當然我覺得打真係冇用，至於另外嗰兩個，用鬧同埋講道理就要睇時機同埋技巧。但係其實用呢啲方法都係想教識細路仔一啲道理，反而我覺得最好嘅方法就係家長自己用身教，我成日都講細路仔看在眼裏，久而久之就會學咗家長一啲嘅做法，如果家長身教做得好，根本好多時細路仔唔使教都知道自己應該點做。如果家長身教做得唔好，你點鬧點打點講道理，佢哋個心都只不過係覺得家長講一套做一套，所以用盡呢啲方法都冇用。與其打打鬧鬧，不如家長做好自己嘅身教，從細路仔自細開始用自己嘅一言一行去教細路仔，可能效果仲好。