少年成長今日: 2|主題: 16017

收藏本版

發帖

返回列表

跳至頁

查看: 53501 | 回覆: 4

升中後的轉變 [複製鏈接]

csir3290

子爵府

積分: 12038

1^#

發表於 23-9-17 10:37 |只看該作者 |倒序瀏覽 |打印

阿仔已經開咗學個幾禮拜，有日我哋放工返到屋企，佢突然間同我講話老師叫佢去選羽毛球隊，第二日放學就要去運動場選拔。我哋覺得有啲奇怪，因為臨開學嘅時候我同阿仔去學校家長會見到羽毛球選拔已經過咗，我仲同阿仔講話最衰過咗個選拔，又要等到出年先至可以去選。因為阿仔一向都有打開羽毛球，但係因為小學嘅時候佢哋羽毛球隊練習嘅時間都喺星期六，撞咗阿仔學其他嘢所以一路都冇去選。當阿仔考到呢間中學嘅時候，我哋知道呢間中學都有羽毛球隊所以就同阿仔講話希望佢可以嘗試去選下，睇下得唔得，點知去到家長會嘅時候就知道原來已經過咗個選拔，仲一心諗住要第二年先有得再去參加。所以我哋就問阿仔點解老師會知道佢有興趣打羽毛球叫佢去選呢？阿仔話原來係佢自己主動去問老師可唔可以去參加羽毛球隊嘅練習，老師就係因為咁所以畀咗個機會叫佢去參加。佢為咗自己有興趣嘅嘢而主動去問老師，我同老婆都覺得對阿仔嚟講係一個幾大嘅轉變。我哋睇返阿仔小學嘅時候其實佢係一個非常之被動同怕醜嘅學生，好多時好多嘢佢都唔敢自己主動去問老師，佢可以因為唔敢主動去問老師而將所有有機會要用嘅嘢都帶曬返學校。又或者到最後都係要我老婆出面幫佢問老師。所以今次佢竟然肯自己主動去問老師，仲要唔係上緊堂嘅期間，聽阿仔講係佢食晏嘅時候自己走去教員室問老師嘅，所以我同老婆都覺得有啲驚喜。雖然睇起上嚟係一件好少嘅事，但係對於阿仔嚟講其實佢已經行出咗一大步，所以我同老婆當然都係要讚佢，我仲同佢講話我好欣賞佢今次嘅做法，因為佢懂得主動去問老師，雖然佢把口就話好小事啫，但係我哋從佢嘅表情睇得出佢心入面係覺得開心嘅，因為我同老婆都欣賞佢呢一個嘅做法。雖然係小事，但係只要多啲正面鼓勵佢，等佢知道父母欣賞佢嘅地方，自自然然佢就會越做越好。所以父母應該要好敏感細路仔好少嘅轉變，如果係好嘅轉變就要用正面嘅方法加強同埋鼓勵，令佢延續呢啲好嘅轉變，如果發覺轉變係偏向壞嗰面嘅時候就要盡早開始同佢哋傾或者係諗方法將呢一啲嘅行為改變返。千祈唔好睇輕呢啲微小嘅轉變，因為當呢啲轉變成為習慣就可能會影響細路仔將來嘅發展。通常家長都會好容易察覺到唔好嘅變化，但係因為細路仔已經開始大，只係打鬧其實係改變唔到問題，反而只會將佢越推越遠，所以如果發覺個轉變係唔好嘅時候，其實就要諗方法去應對，亦都要畀佢哋知道家長嘅擔心。相反如果係好嘅轉變，其實有陣時家長反而會忽略咗，因為覺得佢哋做得好係理所當然嘅，但係要明白人總係希望得到別人嘅讚賞同認同，所以如果家長能夠察覺到呢啲小變化，多啲正面嘅鼓勵讚賞同埋欣賞嘅話，其實就越容易令到呢啲好嘅行為成為一個習慣。