少年成長今日: 1|主題: 15999

收藏本版

回覆發帖

返回列表

跳至頁

查看: 21345 | 回覆: 0

家姐教細佬 [複製鏈接]

csir3290

子爵府

積分: 11892

1^#

發表於 24-10-27 11:52 |只看該作者 |倒序瀏覽 |打印

我屋企舊年裝修，老婆堅持話要喺廳個書架隔離整咗一塊由地下去到天花板咁高嘅白板，佢話細佬鍾意畫嘢整塊白板喺度可以任佢點畫，而且我哋有事亦都可以寫喺塊白板度提醒佢哋。我開頭話其實細佬都已經升中一，仲會唔會鍾意成日畫嘢呢？但係我老婆就話整咗都冇壞，要用起上嚟嘅時候可以好有用。果然不得不讚我老婆有先見之明，整咗之後真係非常之有用。除咗攞嚟畀阿仔畫下嘢之外，原來隨手有陣時講嘢嘅時候，都可以用塊白板畫圖加以說明，例如阿仔有陣時講到學校做嗰啲嘅實驗，或者阿女有陣時想解釋啲嘢畀我哋聽嘅時候，都可以利用塊白板。以前可能要搵紙先至可以畫，因為而家太方便喺牆上面就畫得，所以反而多咗用圖畫去溝通。而且當阿仔阿女有功課唔明嘅時候，就即刻可以喺塊白板上面寫出嚟大家一齊研究。塊白板就好似成為屋企嘅教室一樣，尤其是當阿仔有啲數唔明，佢都會喺塊白板度寫出嚟問家姐或者問我，大家一齊研究，因為以前攞紙做嘅時候，家姐見到可能都會特登走埋你望下，但係而家寫喺塊白板上面，家姐就隨時都可以參與意見。所以越嚟越發覺屋企多咗呢塊白板真係方便咗大家溝通。

講起教功課，其實講真阿女已經中四，佢啲嘢越嚟越深，好多時我都未必教得到佢，有陣時調返轉係佢將啲比較深嘅概念會解釋返畀我哋聽就真。細佬就好多時佢都會主動問我同埋家姐功課，因為佢哋兩個都已經中學，我同老婆都已經冇幫佢哋再睇功課，但當佢哋遇到唔識嘅時候，都會主動行出嚟問我哋。好多時家姐反而會主動教埋細佬添。好似前晚細佬又有條數唔明，寫咗喺白板度，家姐又會主動教佢，而且我發覺家姐教細佬嘅時候，有個最好嘅地方就係家姐都好似我哋以前教佢嘅時候一樣，唔會直接講個答案畀細佬聽，而係都會懂得用問題引導細佬一步一步去搵到答案。嗰晚睇住佢教細佬，教完之後都不期然要讚賞下家姐。

其實而家教功課，講真家姐都真係幫咗好多忙，對於家姐嚟講中二級嘅功課，可能都仲係比較近，所以會比較容易記得，但係對於我同老婆嚟講，就已經隔咗好遠有陣時啲嘢都已經忘記咗。而且有陣時放工返嚟，真係唔係好想再用腦，所以好彩家姐肯主動幫手。其實要佢兩姊弟肯互相幫忙，我覺得好重要都係要由細個嘅時候做起，細個嘅時候就要畀佢哋明白功課唔識唔係問題，最緊要係懂得搵人幫手，而且作為家長亦都要有耐性，等佢哋知道唔識唔係問題，只要肯問就一定會有人幫到手。而且我哋教佢哋做功課嘅時候，亦都習慣咗一步一步慢慢引導佢哋自己搵答案，而唔係直接講個答案畀佢哋聽，或者只係話畀佢哋聽啱定錯。可能家姐習慣咗我教佢嘅呢套方法，所以而家佢教細佬都係用返呢套方法去教細佬。而且我哋要明白細路仔喺功課上面遇到問題係必然會發生嘅，而唔係因為佢蠢或者懶而導致到佢啲功課唔識，慢慢就會培養到佢哋當遇到困難嘅時候就會主動搵人幫手。而且作為家長亦應該要經常鼓勵佢哋肯隨時發問，亦都要搵機會讚賞佢哋互相幫助同埋合作，好似家姐肯教細佬功課，我哋都成日讚家姐，千祈唔好覺得大嘅會主動教細嘅係必然會發生，我相信好多家長都遇過大唔肯教細或者係冇耐性嘅問題。其實呢啲都要家長自細開始慢慢幫佢哋培養兄弟姊妹間嘅感情，千祈唔好覺得大教細係必然會發生嘅事。反而係透過經常嘅讚賞同埋鼓勵，而促進兄弟姊妹間嘅感情。其實細路仔都係有樣學樣，如果想兄弟姊妹間可以互相幫助，其實家長就要先做好榜樣，好似教功課咁，其實細佬都係睇住我哋教家姐時候嘅情況，而家姐亦都係學緊我哋教佢功課時候嘅方法，如果當時自己都係冇耐性或者成日講一啲負面嘅說話，咁絕對唔會養成到細佬可以好放心咁向家姐請教功課，而家姐亦都未必會好有耐性咁去教細佬。而且如果家姐覺得教完細佬之後冇成功感，咁慢慢只會令佢消失呢個耐性。所以我自己作為家長，幾時都要提醒自己當佢哋兩姊弟做咗一啲互相幫助嘅嘢嘅時候，要流露出欣賞嘅表情，同埋多啲正面嘅鼓勵，加強佢哋互相合作。

0 0 0

私人傳訊回覆引用

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 1|主題: 15999

少年成長今日: 1|主題: 15999