少年成長今日: 0|主題: 16020

收藏本版

回覆發帖

返回列表

跳至頁

查看: 21166 | 回覆: 0

成績表 [複製鏈接]

csir3290

子爵府

積分: 12062

1^#

發表於 25-3-16 11:29 |只看該作者 |倒序瀏覽 |打印

一路都講家長日，因為其中一個好容易破壞親子關係嘅日子就係家長日，而其中破壞得親子關係最厲害嘅武器就係嗰張成績表，所以作為家長真係要認真諗下點樣看待同埋點樣睇張成績表，從而令到張成績表由破壞親子關係嘅武器變成促進親子關係嘅關鍵。

一年一次或者一年兩次嘅家長日，對家長嚟講最重要當然就係攞到張成績表，一張成績表就係總括咗自己仔女喺過去半年或者過去一年嘅讀書情況。好多平時唔係好留心仔女讀書情況嘅家長，就係靠呢一張成績表先至了了解到仔女嘅成績究竟係點樣，所以有啲家長一收到張成績表，發現仔女成績差，先至恍然大悟同埋大受刺激，繼而就將矛頭轉向仔女，對於仔女嚟講，可能佢哋就會覺得平時其實家長都唔係好理自己讀書，而且覺得自己成績差，跟唔到亦都唔鍾意讀書，同家長傾家長亦都唔係好理，但係去到呢啲階段就淨係識得鬧，覺得家長唔了解自己，所以亦唔願意同家長傾。

我明白家長對成績表嘅重視，但係究竟點樣睇張成績表，其實都需要好多技巧。首先張成績表家長一揸上手，第一樣最顯眼最容易留心嘅當然係啲唔合格嘅分數，第二就係全級或者全班嘅排名，跟住先至係操行同埋評語。我諗呢個睇法好平常好多家長都係咁睇。但係呢一個心態正正就係反映家長其實係用一個幾負面嘅心態去睇仔女嘅成績。講真仔女日常點樣溫書，我成日都講家長自己心中應該有數，平時都唔係好見仔女溫書或者平時都唔好理仔女嘅成績，其實去到攞成績表係好難會有奇蹟發生，所以成績唔好應該係預咗。而仔女方面其實佢比父母更清楚自己成績，所以派成績表之前其實佢都已經心中有數，亦都預咗會畀家長鬧，所以作為家長如果只係負面咁去睇嘅話，其實就正正符合咗仔女嘅預期，佢哋已經準備好曬，你一鬧佢就已經閂埋隻耳仔，你講乜嘢佢都唔會點聽。所以如果其實家長自己都心中有數，都知道自己仔女成績會唔好，其實係咪應該正面啲，反而留心下仔女嘅操行同評語，另一方面其實有紅色唔合格，家長亦都預咗，反而係咪應該都留心下喺唔同嘅科目上面有冇一啲嘅小進步，或者有邊啲科目係合格。顧存仔女嘅自尊心，欣賞佢哋做得好嘅地方。我相信老師同家長傾嘅時候，其實唔多唔少都會留返啲情面，唔多唔少都會有啲嘅地方係講仔女做得好嘅，咁做家長就要諗方法點樣放大呢啲被稱讚嘅地方。正如我之前成日都講，如果仔女覺得家長都欣賞自己做得好嘅地方，咁先至令到佢哋有改善嘅動力。正如我自己都講，我對仔女其實中文成績麻麻，阿仔仲一路都中文唔合格，所以攞成績表嘅時候最顯眼就係中文成績，但係阿仔一路都有同我哋傾住，其實我哋都了解佢嘅中文情況，所以攞成績表嘅時候見到中文成績紅色唔合格我哋一啲都唔奇怪，但係我同老婆反而留心到嘅係雖然係有唔合格，但係佢其他科都做得好，而且中文嘅成績亦都一路有改善。見完家長我哋從來都唔會鬧對仔女，只係慢慢會同佢哋傾下點樣可以做得更好，有啲咩方法可以改善，都頭來阿仔慢慢一步一步到今次見家長，雖然中文仍然係唔合格，但係總算成個學期拉埋之後變成啱啱好合格，我哋反而第一時間係讚細佬，仲同佢講證明佢溫習嘅方法開始有效，能夠令到自己嘅中文成績慢慢追番上嚟。

所以我自己覺得如果對於仔女成績唔好嘅家長嚟講，更加就需要懂得點樣喺張成績表入面發掘仔女有進步嘅地方，講真唔合格同成績差就真係預咗，呢樣就人人都識睇，但係懂得喺成績表入面搵進步嘅地方，懂得欣賞少少嘅進步，先至就係改善親子關係同埋協助仔女改善成績嘅關鍵。作為家長人人都試過去攞仔女嘅成績表，但係就唔係人人懂得點樣利用張成績表，只係睇完鬧完簽個名就算，抑或係積極啲，懂得欣賞，利用張成績表去發掘仔女做得好嘅地方，從而利用成績表去改善大家嘅關係，去幫助仔女建立自信，咁先至唔會浪費咗攞成績表嘅真正意義。