少年成長今日: 0|主題: 16023

收藏本版

回覆發帖

返回列表

跳至頁

查看: 19397 | 回覆: 1

自尊心作祟 [複製鏈接]

csir3290

子爵府

積分: 12079

1^#

發表於 25-5-18 12:53 |只看該作者 |倒序瀏覽 |打印

阻礙父母同仔女溝通嘅因素有好多，其中一樣我覺得都幾重要嘅就係父母嘅自尊心。呢個尤其是喺做爸爸嘅身上更容易發生。
仔女細個嘅時候好多時都會好崇拜父母，覺得父母好叻好多嘢都知，到有唔明嘅時候，自自然然就會問爸爸媽媽。呢個時候好多爸爸都會好似英雄上身咁，就算唔識都扮到乜嘢都識，而且父母好多時都會覺得仔女嘅諗法幼稚唔成熟，所以傾向將自己嘅諗法加諸於仔女嘅身上。喺細路仔細個嘅時候問題不大，因為佢哋真係細個，未必會質疑父母嘅諗法或者意見，但係到佢哋一路長大嘅時候，佢哋接觸嘅資訊實在太多，有陣時甚至會超出父母嘅預期。但係喺呢個時候，好多父母當仔女一路成長嘅時候，佢哋嘅諗法都仲停留喺佢哋年幼嘅階段，更甚者係有啲父母仲係一路覺得仔女嘅諗法幼稚，而自己嘅能力同諗法都畀仔女成熟好多。自尊心作祟嘅影響對爸爸嘅影響特別大，好多爸爸唔能夠接受喺某啲情況上面，仔女嘅諗法同埋學識反而畀自己更多。更加唔能夠接受仔女挑戰自己嘅諗法，從而就會變成大家溝通嘅障礙。

講真好似我自己咁，我讀書時代學嘅嘢，同而家仔女讀書所學嘅嘢可能已經唔同曬，試過阿仔問我一啲數學嘅問題，我用咗一個比較複雜同麻煩嘅方法去教細佬，但係都好似唔係好搞得掂，但係家姐出嚟一睇就已經話我個方法麻煩，佢用咗一個真係比較簡單嘅方法就已經幫細佬搞掂。佢仲話佢哋已經唔用啲咁慢嘅方法。我冇辦法咁就真係要接受其實佢哋而家學嘅嘢係新啲。

學術性嘅嘢要接受新嘢唔係問題，但係講到人生道理好多時做爸爸嘅就覺得仔女諗法幼稚同唔成熟，好容易就會覺得仔女必須要跟從自己個套嘅諗法，仔女有自己嘅意見就會覺得佢哋唔成熟諗法幼稚。但係正正就係呢啲放唔低自我嘅諗法，就會令到青春期嘅仔女越對父母越嚟越反感。講真對於我自己嚟講，我自己就覺得其實個世界實在變得太快，仔女學嘅嘢同埋接觸嘅新嘢真係會畀父母多好多，好似我同老婆咁，每日都返工其實真係有時間學新嘢嘅機會真係比起對仔女少好多，所以作為父母有陣時應該真係要放開啲自己嘅自尊去接受仔女嘅諗法！咁當然我明白有一啲傳統價值觀我哋仍然需要堅持同埋教仔女，但係我相信呢啲傳統嘅價值觀，未必真係對同仔女嘅相處同溝通有好大嘅衝突，好多時反而係父母尤其是係爸爸嘅自尊心作祟先至係最大嘅影響。父母相比起仔女我諗唯一不變嘅只不過係父母畀仔女年紀大好多，但係咁樣唔代表父母諗嘢嘅方法一定正確，只要有陣時肯放低下自己嘅自尊心，接受佢哋嘅睇法可能比我哋更加好，反而更加有助大家嘅溝通。