少年成長今日: 1|主題: 16068

收藏本版

回覆發帖

返回列表

跳至頁

查看: 1422 | 回覆: 0

削弱抗逆力 [複製鏈接]

csir3290

子爵府

積分: 12326

1^#

發表於 4 天前 |只看該作者 |倒序瀏覽 |打印

尋日揸車聽收音機，成班節目主持人喺度討論而家嘅細路仔係咪受到過份保護，其中有個主持人喺度講，佢試過搭緊港鐵嘅時候，突然間有個七八歲嘅細路仔行到去面前指住佢同佢講話佢想坐，要個主持人讓畀佢坐，個主持人問，一個成七八歲嘅細路仔係咪真係一定要坐呢！但係佢話喺呢個時候，個細路仔嘅屋企人全家人都係望住佢，好似正在等緊佢讓座畀個細路仔坐咁！但係個主持人就話佢冇屈服，最後都係望住個細路仔冇讓座畀佢！由呢個情景從而帶出究竟而家嘅細路仔係咪受到過份保護。

毫無疑問而家嘅家庭所生嘅細路仔真係少咗，真係一個起兩個止，比起我哋自己細個嘅年代，生三四個真係好平常，但係可能真係生得多所以又真係冇咁保護，我哋嗰個年代聽得最多嘅就真係天生天養。相比起呢個年代嘅出世嘅細路仔，而家呢個年代嘅真係萬千寵愛在一身！我自己都覺得過份保護嘅例子真係多不勝數，五六歲嘅細路仔都仲係唔行得，行多少少就驚佢辛苦，出街又驚佢跌親又驚佢曬親，企一陣又唔得，食飯送到去口邊，全家服侍一個細路仔。除咗呢啲保護嘅行為之外，我覺得最慘嘅仲要係好多父母用千百個理由去幫做錯事嘅細路仔推卸責任。最常見嘅好似細路仔跌親就賴個地下，甚至乎鬧過地下。好似上面個例子咁，個細路仔走埋去叫人哋讓座畀佢，其實明明個細路仔就冇禮貌，但係父母又唔教，問題又變成係唔讓座嗰個人有問題，細路仔做錯嘢責任就喺人哋度，總之都係其他人有問題，自己嘅細路仔就冇問題！最弊就係去到最後如果真係諗唔到原因幫細路仔開脫，就用「一句他只是個孩子」嚟推卸所有嘅責任！

其實我覺得以上種種都係過份保護，好多父母嘅心就以為係保護緊個細路仔，但係其實呢一種父母只不過係剝削緊細路仔面對失敗同挫折嘅抗逆能力。最簡單講跌親，企返起身下次小心啲其實就係教個細路仔做事要小心，而唔係教個細路仔將個責任推落個地下度或者推落去人哋度。細路仔自細懂得經歷挫折然之後吸取教訓，懂得承擔責任，其實呢啲全部都係父母要教嘅！講真當個細路仔一路長大，佢要面對緊真實嘅社會，到時先發覺冇人保護佢哋亦都冇人畀佢哋推卸責任，到時點面對呢？父母以為保護緊自己嘅仔女，其實只不過不停削弱佢哋抗逆嘅能力，真係唔好問點解我哋而家細路仔嘅抗逆能力好似越嚟越低，我相信其中一個好主要嘅原因都係我哋自細冇培養細路仔嘅抗逆能力。培養抗逆能力其實唔需要講到好深奧，就係自細畀佢哋面對一下失敗，企多一陣，曬多一陣唔使死嘅，講真細路仔細個有啲乜嘢挫折同失敗，但係做父母嘅如果都唔畀佢哋經歷呢啲嘢，只係幫佢哋不停推卸責任，咁又點樣培養抗逆能力呢！過份保護同埋過份寵愛，究竟係幫個細路仔定係害緊個細路仔呢？乜嘢先至係過份？就係剝削緊細路仔經歷挫折，剝削緊佢哋面對真實社會嘅成長經歷，咁最終只會由保護變成傷害。