少年成長今日: 14|主題: 16046

收藏本版

回覆發帖

返回列表

跳至頁

查看: 1498 | 回覆: 0

大學入學資訊日 [複製鏈接]

csir3290

子爵府

積分: 12204

1^#

發表於 4 天前 |只看該作者 |倒序瀏覽 |打印

9月10月又係香港各間大學嘅入學資訊日嘅時間，唔同嘅大學都會喺呢兩個月嘅星期六或者星期日搞大學資訊日畀讀高中嘅學生早啲了解大學課程，收生標準同埋課程內容。
琴日同阿女去其中一間大學嘅入學資訊日，諮詢日嘅形式其實就好似中學嘅開放日一樣，所有學系都會擺設攤位介紹佢哋嘅學科，亦會畀我哋去睇唔同嘅實驗室了解佢唔同科目上堂嘅情況。對阿女嚟講係一個好嘅機會畀佢先了解下唔同科目究竟實際上係讀啲乜嘢，最緊要就係等佢知道學系嘅收生要求，到將來如果想入到心儀嘅科目，大約喺考試嘅時候需要攞到啲乜嘢成績，從而成為佢考試嘅目標。如果好似我阿女咁，對將來要讀啲乜嘢科目都仲未有好清晰嘅選擇，去呢啲大學資訊日亦都可以等佢更加清楚每一科讀啲乜嘢，邊一啲科目自己比較有興趣的。好似阿女咁琴日去完資訊日之後，佢就開始有啲概念，如果將來要選呢間大學嘅時候，佢會選擇啲乜嘢科目。

我成日都話做家長都要了解下自己嘅仔女將來可以有啲乜嘢選擇，如果平時冇咩時間上網搵啲乜嘢資料或者自己去睇啲乜嘢資料嘅時候，其實最好就係同仔女一齊去大學資訊日，唔同嘅科目都會有專人喺度解答家長同學生嘅問題。就算唔問，其實就咁睇都可以睇到唔同科目嘅內容同將來嘅出路。所以係一個好難得嘅機會只係用半日嘅時間就可以了解到唔同嘅科目，亦都可以畀個細路仔有個大約概念知道自己可以有啲乜嘢選擇同更清晰嘅目標。

做家長千祈唔好覺得讀中學尤其是去到高中，入大學資訊呢啲事已經只係仔女自己嘅事家長唔需要關心。其實做家長嘅，我反而覺得應該同埋仔女一齊去睇，因為睇完大家先至有共同嘅話題有得傾，我唔係話家長想啲仔女讀乜嘢科，就要迫啲仔女去睇啲乜嘢科嘅介紹，而係應該用開放個心態，好似去睇展覽咁，唔同嘅科目都了解下。不過當然咁多科目有陣時都需要有啲技巧，如果好似校園範圍相對比較細少少嘅大學，都已經好難睇得曬全個校園同所有嘅科目，如果好似中大，港大同科大成個山頭咁大嘅校園，就更加冇可能全部睇得曬。所以都應該事先重點揀一啲科目然後先去睇，呢啲就應該事前同仔女傾下。最簡單就了解下仔女有啲乜嘢科目一定唔會揀，咁嗰啲就唔好嘥時間，再可能就係諗下每一間大學邊一啲科目係佢嘅強項，而重點去睇，咁呢啲事前就真係要搵下資料。好似我哋咁，昨日就重點睇咗大學嘅物理治療，職業治療之類嘅科目，因為呢啲都係阿女比較有興趣，而亦都係間大學相對比較強嘅科目。相反因為阿女對時裝設計嗰啲科目冇興趣，所以雖然大學亦都係強喺呢方面，但係我哋都冇嘥時間去睇。總之一間大學咁大，比起中學嘅開放日大幾十倍，所以要入去行之前都要做少少功課，諗下要去乜嘢科目度睇。其實喺呢啲事前嘅傾談入面亦都增進咗家長對仔女嘅了解。

本來我以為呢一類嘅資訊日淨係適合高中學生去睇，但係原來好似我個仔剛剛升中三，佢讀嘅中學都已經鼓勵佢哋去睇呢類嘅升學資訊日，方便佢哋將來升中四嘅時候預備揀科。佢哋學校仲要求阿仔呢一級中三嘅同學，今年最少去兩次呢一類嘅大學資訊日，去完仲要影相交返畀學校等學校知道佢哋有去過。其實我都覺得係好嘅要求，起碼等啲中三學生喺中四揀科之前都可以了解下大學對選修科嘅要求，而作為佢哋升中四揀科嘅時候嘅一個考慮。所以今次我哋都帶埋細佬一齊去，唔去都唔知，原來細佬入到去最有興趣睇嘅竟然係飛機工程，但係佢聽完課程簡介之後發覺，原來想將來修讀飛機工程或者同航空有關嘅課程，中四選修物理就會比較有利，所以細佬都話要畀啲心機讀下物理先至得。

總之我自己覺得作為家長，如果有時間都應該陪埋啲仔女一齊去呢啲資訊日睇下，攞下資料。順便了解下仔女嘅興趣，令到自己將來同仔女去傾前途嘅時候，會多一啲資料同埋理據，唔好淨係乜嘢都係叫個仔女自己決定，講真如果佢哋問得我哋，都係想我哋畀一啲資料同意見，但係我哋畀意見嘅時候又唔能夠憑空想像，所以最好就一齊去睇下呢啲資訊日，我建議家長如果真係緊張仔女將來就前途嘅話，就唔好放過呢啲機會，就算仔女約咗啲同學或者學校會同佢哋去都好，做家長嘅其實可能都要搵啲時間自己去睇吓，因為可以一次過又好集中咁睇好多嘅資料，唔需要自己再上網慢慢搵。