少年成長今日: 1|主題: 16063

收藏本版

回覆發帖

返回列表

跳至頁

查看: 191 | 回覆: 0

獎勵 [複製鏈接]

csir3290

子爵府

積分: 12290

1^#

發表於 10 小時前 |只看該作者 |倒序瀏覽 |打印

琴日喺網上睇到新聞，有個爸爸為咗鼓勵佢個仔讀書，就專登喺屋企整咗一部夾銀紙機，原理就好似喺街見到嘅夾公仔機一樣，不過放喺入面嘅就唔係公仔，而係花花碌碌嘅銀紙。個爸爸講話為咗要夾到啲銀紙，所以佢仲專登改裝咗個夾，令到可以夾到銀紙。只要佢個仔喺默書測驗攞到100分就可以夾三次，95分以上就可以夾兩次，90分就可以夾一次。個爸爸仲話呢個方法能夠有效鼓勵佢個仔讀書，所以佢好自豪咁將呢一個方法擺咗上網。
為咗鼓勵仔女讀書，或者達到父母某一啲嘅期望，好多家長都會用唔同嘅方法去獎勵細路仔，希望佢哋能夠達到家長要求嘅目標。但我自己就覺得用物質鼓勵我就唔係好建議。因為用物質鼓勵嘅效用只會越嚟越低，試想像下今次用20蚊，下次或者再下次20蚊對佢嘅吸引力可能已經低咗，咁為咗維持吸引力就只有繼續將物質嘅價值遞增，先至能夠維持吸引力。雖然有人話咁樣可以令到細路仔做嘢有目標，但係我自己就覺得咁樣只係會令佢哋為咗物質嘅吸引力先至去做，好難將呢種外在推動力轉化成為內在嘅推動力。其實作為家長只要細心留意吓，細路仔其實最想得到嘅就係家長嘅認同同埋鼓勵，只要由細開始多啲欣賞同埋讚賞自己嘅細路仔，最重要係幫佢哋建立自信，令佢哋覺得自己能夠成功，咁先至能夠慢慢將推動力來化，令到佢哋自己已經有追求卓越嘅心態。我唔係話物質冇幫助，但係如果只係將成功同物質掛鉤，咁好難將呢一種追求卓越嘅心態變成內在嘅推動力。當物質嘅鼓勵唔再吸引，又或者佢哋經常都達唔到要求而攞唔到呢一啲物質嘅鼓勵嘅時候，可能只會令到佢哋更加灰心，因為橫掂都係攞唔到！再者如果細路仔本身讀書嘅情況都唔係咁理想，一下子就將個目標set到去咁高分，而家長又期望重賞之下必有勇夫，佢自己自自然然就會由五六十分甚至乎唔合格變成八九十分，甚至去到100分，係咪真係現實能夠做到呢？家長除咗用重賞做鼓勵之外，係咪真係乜都唔使做就可以呢？由小學開始每次20蚊，咁去到中學仲係咪可以每次20蚊呢？咁去到高中咁又點呢！物質嘅推動力只係外在，長遠唔能夠將推動力化為內在，而且效力越嚟越低！要改變細路仔嘅行為，甚或推動佢哋讀書讀好啲，係咪真係用錢就可以解決問題呢！我始終都覺得由細開始多啲欣賞多啲鼓勵，相信自己嘅小朋友能夠做得好，反而更加能夠令到小朋友自細開始培養佢哋嘅推動力！如果以為用錢或者物質就能夠解決小朋友嘅問題，咁會唔會過於簡單呢！