外賣員表示，2人到達25樓後，發現火源在垃圾房內，「埸面好大煙」，大叔情急下出拳嘗試打爆消防喉嘴箱玻璃，他立即制止，「唔好用手，旁邊有枝細錘仔」。
外賣員續說，打爆玻璃後，他拉消防喉出來，「有個哥仔幫到手，拎住水龍頭衝個去垃圾房，我拉喉，阿叔開水掣」，他提醒「哥仔」「濕件衫揞口呀」，「哥仔」一開垃圾房門，「啲濃煙湧晒出嚟走廊，佢吸咗兩啖濃煙搞唔掂，我同阿叔接力射水，濃煙向上升，我哋踎咗喺度（避免吸入過量濃煙）」。
外賣員表示，救火期間，有名女子用毛巾掩口站在滿佈濃煙的走廊，他立即着對方「快啲走呀，企喺到做咩呀，落樓梯呀」。
外賣員指出，「跟住阿叔煙到眼，睇唔清楚搞唔掂，接力等我嚟，你去樓梯避一避，叫其他幫到手嘅，拉多一枝喉上嚟，依到我頂住先（我戴住頭盔有面鏡頂住啲煙）」。
外賣員表示，最終找到火源在垃圾房內1個垃圾桶，他對着火源射水終成功救熄，此時消防員才剛到現場，他向消防員說「交畀你哋喇！」。
外賣員救火後滿身大汗地走20多層樓梯下樓，見到有公公婆婆帶着孫兒下樓，他告知對方「我救熄咗，消防員善後緊，返屋企啦，咪行喇」。
外賣員事後有感而發，「當然要判斷自己做唔做到，可唔可行，幸運地住戶發揮合作精神，先可快速救熄場火，香港人，獅子山精神」
發表於 
返回列表
