之前見好多post都話某些集運多多少少都出現問題的，見過的有：
「大亞灣」的那間，收費平就係平嘞，但見過不下一個網民報稱佢有搏大霧收多幾kg的紀錄，慣常手法係指你的包裹oversize而要以體積來計算重量收費。
「香港人營運」的那間，一貫的港人作風玩食字，曾查詢這集運如何收費？答覆：「…貨品需要包裝合一才需要支付包裝費的…」，這可能有消費陷阱喎，唔通要自己帶個盒上深圳比佢裝D貨寄落嚟香港咩？咁講即係有啦，分明玩文字遊戲唶，咁樣講嘢法咁似梁振英嘅？咁同太陽能電筒有乜分別先？都多餘嘅！
就算唔貪平，睇番以一般市價收費的集運都出事，例如「先排要番鄉下生BB」的那位X玲，業務就交比老公打理啦，但結果一塌糊塗，搞到天怒人怨，就連口碑一向都唔差的「X仔」，都比人開post插到趴街！
好啦，之前見有網友分享力推一間江浙滬的集運話好好喎，雖然若果連埋那¥25住宅附加費都唔算收得平架喇，但見那集運的網頁上稱：「…香港正常2天香港就可以收到貨…」，於是就即管試吓啦，但咁就捉蟲，出事喇，結果派遽前後用咗 - 7日，真係想唐唐上身指住那集運嚟鬧：「你呃人」呀！
既然幫襯平的、或相對冇咁平的集運都有機會出事嘅話，咁倒不如光顧間相對收費較便宜嘅「大亞灣」的那間好了，不過就要做多少少嘢，以避免佢有機會詐詐帝搏大霧收費！
方法一：唔好儲咁多一次過發件
如果件唔多的，即係size大極有限啦，咁佢仲點可以用oversize嚟做籍口而要以體積來計算重量收費呢？
方法二：在某些件加上備註不要拆開
一些體積大的件，例如電器咁、又或一些量大的件，例如購買家品咁，好多時都會用上紙皮盒包裝的，見過不少於一個個案反映，佢會將所有件照平時咁量重收費，比如10kg咁先，但之後就會拆開所有的件，之後就會丟棄大多的填塞物，然後就塞晒在其中一個紙皮盒包裝內，咁先至交比EMS或快遞公司過磅收費來賺取差價，果時件貨可能只淨番5kg而已！
解決的辦法，或可在某些件加上備註：「內有特別包裝的易碎品，不要拆開及請小心處理！」，相信咁佢就不好、亦不敢私下拆開了吧？但要注意，一些以袋包裝的，如購買衣服咁，就唔好胡亂聲稱係易碎品了啊，因為摸一摸就知你講大話啦，咁其他的…咁就可想而知啦，聽過「狼來了」未呀？
唔知大家可還有其他可堵塞佢搏大霧胡亂收費的方法可分享呢？
發表於 
返回列表
