72年新世界招股價 2元，上市首日股價飆升接近五成，但接近 40年後的今日，不計除權除息等因素，股價僅升 2.5倍，同期長實及新地，分別升 29倍及 18倍。 72年 2蚊雞有幾多，前日有一個美孚新邨 1750呎全海景樓王單位，以 1228萬元成交，單位業主 72年以不足 14萬元買入，單位 39年升值近 90倍。一開波捧彤叔場，長揸到尾，現時欲哭無淚。
新世界跑輸幾條街並非單一個案，無論是系內分拆出來的股份，抑或包裝後上市都令人沮喪。新世界基建（後改稱新世界信息，編號 301） 95年以 12.75元上市， 06年以 0.75元私有化，由頭揸到尾埋單輸 94%。 99年上市的新世界中國（ 917），賬面亦要蝕超過八成。其餘由周大福名義買入曝光的股份，亦有頭威冇尾勢，蒙古能源（ 276）已經令萬千散戶變「蒙能」。
一直以來，新世界資產豐厚、但股價折讓大、走勢長期落後，每次覺得抵買，都忍唔住再信多次彤叔，但買一次，失望一次，仲要短短 8年內抽水配股供股共 6次。周大福珠寶以超過 30倍 PE上市，估值貴唔貴對我已經無關痛癢，關鍵是我不會再落叠。曾經作為彤叔的捧場客，筆者借用電影《那些年》的歌詞，「好想告訴你，告訴你我沒有忘記」。彤叔，我係唔會再受坤的！
發表於 
返回列表
