2005年嘅3月,我同老公正式同居啦!2005年嘅暑假,考完會考嘅我,見到老公好辛苦返工賺錢返屋企,我都想自己有所貢獻,可以去做下Part-time賺錢幫補下家計,所以我就好努力咁send cv出去,但係講真, 一個中五,有邊個請你啊,就連份cv都唔識寫,可以做嘅就係去做sales,買下衫.
果陣時我真係唔理架啦,見到有貼街招,又或者報紙有登嘅,我都膽粗粗去見下!
有一次,唔知係唔係喺報紙見到架呢,嘩..無需經驗,人工仲有上萬,唉..唔理三七廿一,即刻打電話過去.係個男人聽電話,仲話可以聽日見工tim,咁我又冇唸咁多,即刻應承聽日見工,但我又細膽,始終自己又未見過工,所以就搵咗個朋友陪我去..
嗯..而家講起,緊係知道呢份工有問題啦,但係果陣時咁細個,邊到知架!! 我同我個朋友,去到油麻地果頭,搵搵搵..搵完一大輪,見到果橦大廈嘅門口..一入到去,開始有D唔對路,因為見到有好多唔著衫女人嘅poster貼喺度.其實我同我個朋友都唔識路架,係一路同約我見工個男人傾電話,佢教我o地點行過去.你唔好話,佢好似喺樓上見到我o地咁,我o地入到大廈,都冇同佢講,佢就話:”係啦,就係呢度啦,搭笠上黎8樓啦.嘩…好彩姐,我哋差D真係搭笠上去架啦..好彩我哋問樓下個看更叔叔時,個叔叔叫我哋唔好上去,上面係一D色情場所.聽到看更叔叔咁講,我哋即刻走人啦緊係…真係好彩咋…如果唔係,我哋上咗去,都唔知點對我哋.喺度,真係要好好多謝個看更叔叔.
呢件事,我冇同老公講過,我驚佢擔心我.
自從差d被呃呢件事之後,我都唔夠膽喺報紙搵工啦,轉咗親自去賣衫嘅鋪頭仔問請唔請人.哈..又俾我搵到wor~喺旺角中心!我同老公講我去做part-time,老公係俾嘅,不過…哎,對唔住,我真係唔係好捱得,旺中買衫真係辛苦到死,又要迫黎迫去,又要叫到喉嚨都破埋…終於我捱咗一日,返到屋企….辛苦到出唔到聲.老公見到我咁,即刻落命令,叫我唔好再返part-time.老公話:”你而家係讀書嘅時間,做咩暑假工啊,驚第日出黎冇得做啊?仲要咁辛苦,唔準再返啦.” “嗯….好!”我心唸,咁你都咁講,我就要好好休息下啦….哈!
搵暑期工冇幾耐之後…哎,話我蠢真係冇錯架!我竟然俾人呃咗上去做層壓式推銷,呃我果個仲要係我中學一個形象好乖嘅同學仔,完全冇任何防備.
話說有一日,我喺銅鑼灣行街,撞見中學同學阿A,咁有一段時間冇見,見到大家靚咗又肥咗(講笑),咁大家就交換咗電話,話遲D約出黎食飯wor..點知,阿A同學真係好上心,過一日就打黎約我食lunch,佢話因為佢好忙,所以約喺銅鑼灣食,我緊係冇問題啦…點知去到銅鑼灣等佢一陣,佢都未出現,之後佢又打黎話因為太忙,行唔開,不如上佢公司度食啦,買外賣咁話.我當然冇問題啦,真係一d懷疑都冇,點知道一上到去….嘩,也佢公司咁多人架,而且個個睇起上黎都好忙wor~唔怕,阿A同學一早係門口等我,佢見到我,即刻同我入咗間房度..仲話公司唔俾聽電話,叫我熄咗電話先,我心唸,嗯,都可以食飯啦….
未食得飯住~~我一坐低,阿A同學就急住俾D類似香座嘅product我睇,之後就開始同我講可以點樣點樣利用佢黎賺錢…又話:”我係你同學,我又點會呃你啊,有錢梗係一齊賺啦!’呢下我終於知道啦,佢唔係想約我食飯,佢係想SELL我嘢..唉,對唔住啦,你sell錯人,我邊有錢買呢d嘢黎賺錢先得架…阿A同學死心不息,仲要挖埋我D傷疤出黎講,”又話我而家同男朋友一齊住,如果萬一一個佢唔要你,你就乜都冇架啦…你男朋友又唔係搵得多,而家都知你生活好辛苦架啦,你唔為自己,都要為係男朋友啊~你而家又冇晒屋企人,要威俾佢哋睇啊,你睇下我而家,賺幾多錢,成個人係唔係唔同晒呢?”…係唔好講起屋企人我都冇咁嬲, 一講起,我D眼淚又係咁留,呢一刻,我好想離開呢度,我好想打電話俾老公,叫佢黎救我.但係我咩都做唔到…因為電話一入門口已經熄咗機.
阿A同學見到只係喊,唔落搭,所以就再叫多2個”同事”入黎,話可以開解我wor,睇下有咩幫到我.好快,一男一女同事就入埋黎,見到我喊到咁,佢o地好似好好心咁安慰我,又話錢銀可以喺呢度搵到架,唔侯擔心..我全程冇理到佢哋,靜係低頭喺咁喊….佢o地見”九水”極我都唔落搭,其中一個男同事好憤怒好大聲咁同阿A同學講:”俾佢走~”嘩…仲唔走咩,即刻滾水碌腳咁衝出門口啦~~足足俾佢哋疲勞轟炸咗3,4個鐘wor~當然,臨出呢個門口前,我都同咗呢位阿A同學講咗聲,以後冇朋友做.
一落到街,即刻打電話俾老公,老公好緊張..問我有冇事,使唔使過黎接我.我話冇事,但其實我係仲未腳軟完..我估唔到我個中學同學冇見幾個月姐,可以變到咁.老公叫我以後要小心d,唔好咁易就相信人,佢話經一事,長一智!係嘅..如果唔係有呢件事,我又點知咩叫層壓式銷售,又點知人心易變,轉眼就可以由一個係識咗幾年唔多出聲嘅乖乖女,變成一個口齒伶俐,你完全唔識嘅陌生人.真係好恐怖~
暑假過得好快,而我亦都選擇咗我自己嘅前途方向,我決定讀一個四年制會計高級文憑.其實..咩係會計呢??我真係一d都唔認識,你問我點鮮會揀呢一科?哈,得一個理由,因為我想出黎搵到嘢做,果時聽人講會計一定有人講,就算一家公司執笠都要會計.其實…我最想讀嘅係時裝及形象設計,不過我知道,讀呢一科, 一你係就做到最Top果一兩個,如果唔係,出黎搵嘢做咪又係做sales..我唔想做呢d工啊,所以我決定咗讀會計.唉…冇法啦,最算幾有理想同夢想都好啦,人總要向現實低頭架…
我讀書果度喺葵芳,但我住則魚涌,老公見我返工日日都要踏咁長車咁辛苦,所以我o地決定搬屋,雖然老公話就話搬屋可以搬近佢阿媽果邊有得照應姐,但係我知道佢係因為怕我辛苦!
無幾耐我o地就搵到屋企搬啦,喺大窩口…雖然係大廈,但有笠又企理,仲有看更,最緊要係…呢間屋係我同老公一齊揀嘅安樂窩, 老公知我好鐘意呢間屋(因為係白色同粉紅色嘅裝修),好快已經簽租約..
就係咁..有咗新屋,老公返工,我返學…平平淡淡地生活咗3年多…跟住~~惡夢開始對我哋狂追不捨..
發表於 
追.
努力中。。
返回列表
