你地細時有冇好嬲屋企人唔信你, 我細時我媽就係甘, 人地講咩都信, 自己個女講咩都唔信. 因為我屋企唔俾我出街同D街坊小朋友玩, 除左我爺爺個邊個小朋友之外. 所以我係冇咩朋友, 電話又唔俾講, 細時真係好悶, 玩具係有, 不過唔同有個朋友細同你玩, 同你傾計個陣感覺.
有一日街坊D小朋友叫我出去玩捉人, 甘我媽又唔知咩事俾我去. 個下我真係好開心. 因為終於都可以同自己同年紀的小朋友去玩, 唔駛一個人係屋企同住2個BB 同4塊牆. 甘我地住舊式公屋, 一條走廊由頭到尾, 甘我地玩捉人, 梗係唔會係自己住個層走來走去啦, 一定會樓上樓下甘走. 不過個時D走廊呢大家都會放好多野, 好似單車啦, 燒衣桶…..ETC. 所以走廊都幾狹窄. 仲要有幾個小朋友係度走來走去. 大家想像到當時個環境係點.
一大班小朋友走來走去, 你撞我我撞你就梗有, 而且周圍甘多其他野, 損傷就梗有. 玩完就返屋企, 走個陣大家都冇咩事, 點知返到屋企唔夠一陣成班小朋友走黎我屋企投訴我撞到佢地個個都瘀左. 我聽到後話你地都有撞到我啦. 有咩可能我一個人撞到你地甘多個. 我媽就唔知點解好驚甘, 仲話唔俾我再出去玩, 又同D小朋友講對唔住. 之後就閉左門,
我媽少不免梗係鬧我啦, 好日都唔出去玩一次, 一出去玩就搞到D小朋友投訴我. 我就同我媽講大家都有撞大家, 點解一定係我錯. 點解係我唔岩. 我媽只係話冇下次, 冇得再出去 玩. 個陣我真係好唔開心. 好唔明白點解唔想我講, 不過我知我再講都冇用, 因為佢根本唔想聽我講.
呢樣野我媽一路都冇變, 到我大左, 佢都係甘, 咩都係聽人講, 唔會問下係唔係有件甘既事,人地講咩佢就信咩, 所以我係屋企都係唔多出聲, 唔講野, 平時只係留係自己間房, 搞到自己好孤獨, 我自問真係唔識同人相處, 因為冇機會, 唔識得同人交談, 唔識同人講野.
呢個問題對我之後出黎做野有好多既影響, 當然而家甘大個就梗係知道要點做, 不過都係因為撞板太多而經歷返黎既. 當中的痛苦我媽根本唔會知, 都唔會明, 我媽成日都覺得我今日所有既野都係佢俾我既. 講真佢只係俾我去讀左一間秘書學校. 之後既野都係我自己學返黎. 佢覺得我D英文好, 係佢俾我去呢間學校學返黎, 其實講真, 好多野唔可以睇表面, 我自己都要付出好大既努力先有今日. 之後發生左好多事令我好嬲佢, 都係因為佢令到我i之後患上左抑鬱症.
如果大家睇得開心, 請多多支持!!!
發表於 
返回列表
