吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 母乳餵哺› 分享我餵人奶三個月的經驗 (長)

母乳餵哺今日: 0|主題: 85707

收藏本版

回覆發帖

返回列表

跳至頁

查看: 722 | 回覆: 7

分享我餵人奶三個月的經驗 (長) [複製鏈接]

catcatcati

伯爵府

積分: 17882

美好大世界2017勳章最關心BB問題熱投勳章我的育兒心得勳章 DHA勳章 BK Milk勳章

1^#

發表於 13-12-31 16:22 |只看該作者 |倒序瀏覽 |打印

本帖最後由 catcatcati 於 13-12-31 16:25 編輯

我第一胎，喺醫院時都唔識點餵BB，放BB口喺乳房度都唔知佢有無食，
(後來先知厡來BB一直都係無啜到

)
頭一日只有一次有少少感覺。

第二日BB就被送去兒科病房，因為佢黃要照燈，
要吊鹽水唔畀食野一日

到第三日可以食野啦，我就過去兒科繼續努力嘗試埋身餵，
結果搞咗45分鐘BB只係有啜大約10分鐘，
跟住姑娘話BB黃，已經是累無力食野，我唔好搞佢咁耐，否則累到奶粉都無力飲就會一直都退唔到黃
如果要埋身，畀佢食15分鐘就好啦之後要補奶粉
每三個鐘食一次，每次最少要食50ml

到第四日我出院，帶埋BB返屋企 "度假" (即BB係未正式出院的，明天要再帶返去抽血驗黃)，
就係果晚我開始谷奶，個胸硬到打側身瞓都會痛，我又唔識按摩和擠出來，亦都唔識驚塞，
我淨係知道要畀BB啜，但BB真係攰和唔係好識啜，
又因為喺醫院返屋企好累，試過用泵都泵唔到出來，
所以我算啦，都係keep住畀BB飲奶粉

第五日返去醫院，抽血驗到度數又上升返 (因為返屋企度假無照燈排黃唔夠快)
我喺醫院求教姑娘，姑娘幫我用手擠奶，又借泵畀我，
石頭胸開始慢慢軟啦，

不過用手擠咗30分鐘都係得10ml 左右，
另一個姑娘就話 "你擠全日都唔夠佢食一餐呀，所以一定要餵奶粉"
用泵都係無乜結果，所以我認同姑娘的說話。
果晚返到屋企，自己好用力擠和推，個胸真係慢慢軟，我好開心

我都唔記得果晚BB有無 "回家度假" 定係留院照燈

跟住我都唔記得過咗幾多日，
有時BB夜晚留院照燈，我地就第二日返去聽驗血報告，
如果BB回家度假，我地就第二日一早抱BB返去驗血，
總之日日都要去醫院，
呢段時間如果BB喺屋企我每次都會埋身餵大約10分鐘先補奶粉，
我個胸都軟返晒，就算十幾個鐘無BB食都唔會點谷
好似大約4、5日之後BB終於黃指數跌到接近正常位，可以正式出院了。

BB出院之後，我嘗試全人奶啦，因為BB退咗黃開始有精神食奶嘛
之前BB啜我真係唔痛的，出院之後漸漸越來越痛，
係意想不到咁痛

簡直係慘絕人寰

終於有一次有一邊啜到損咗流血，我果邊奶就休息一日， keep 住淨餵另一邊
所以我好掙扎，一方面覺得要餵母乳先對BB和我最好，
另一方面又因為好痛好唔想餵。
每次一到餵奶時間我都慢吞吞，
心情就好似死刑犯等待行刑咁，
媽媽喺頭兩個月一直來我屋企煮野畀我食，
佢一直陪我、鼓勵我餵母乳，
當我唔想餵時，佢就會話 "食奶係BB福利黎架，你一定要畀佢食"
我餵到喊時，佢會叫我唔好喊，
我痛到想發脾氣時，佢會安慰我，
我慢吞吞時，佢會幫BB話我，
我有幾次話想放棄，媽媽都話唔放棄得，佢話佢果時都係痛，過咗一個月就唔會痛架啦
其實我都知唔應該喊或發脾氣，會影響BB，但真係好痛呀，仲要每日痛十幾次每次半個鐘以上.....
大約頭20日，間唔中都要埋身完再補兩安奶粉，每日最多一次，
因為BB真係啜到喊得好勁，我唔夠奶，BB肚餓一定要食。
之後就變成可以全人奶啦，我一直全埋身，所以唔知BB食咗幾多，
不過佢好滿足又唔喊，又多尿又多屎就無問題啦。

過咗一個月之後，依然是痛，其實第一個月已見過母乳姑娘，用晒不同方法，結論係真係無方法，
並唔係專家講得咁瀟洒含得啱就唔痛的。
我發覺BB真係含得好好，簡直就係模範：
嘴張超大好像打呵欠，上下唇向外反，下唇比上唇含住較多乳暈，
有節奏、緩慢而深的吸啜....
所以不是BB的錯，而我成日搞佢，而家諗返都好對佢唔住

到返工前大約一、兩星期，我開始試吓泵奶，喺BB食完之後再泵，我用雙泵，
大約會有2-3安到，
因為專家教路要儲 "人奶庫" 嘛....
因為我一開始唔夠奶畀BB食，所以我見到每日泵一、兩次得2-3安，
諗住第時返工泵奶實唔夠BB食啦，無辦法之下都要補奶粉
我無諗到因為BB食完會少咗奶

到兩個月後我真正返工，初頭BB好抗拒用奶樽食，
我又傻傻地做晒冰奶，諗住最安全啦，又攞最舊果支畀BB食先，
結果BB喊爆唔肯食奶，我好多辛辛苦苦泵出來的奶都倒咗.....好浪費
過幾日我發覺冰奶有陣怪味，應該要做雪奶畀BB食新鮮啲
BB開始無咁抗拒，不過仍然是有抗拒的，
咁啲冰奶點呢? 我攞去畀媽媽逐少逐少溝落雪奶畀BB飲，
有時BB胃口無咁好，就唔溝冰奶只畀最新鮮的雪奶。
初時掌握唔到節奏，日日泵奶的時間都不同，返到屋企又唔泵，我的 "人奶庫" 就快被BB KO，
而媽媽亦湊得好辛苦，因為BB始終都唔會經常好順利食奶
後來我最 standard 是每日泵兩次，一次 lunch time, 一次放工返到去媽媽屋企，
lunch time 約泵到10安，媽媽屋企就7安，
咁就夠BB喺我返工時候食啦。
跟住我雪奶越儲越多，儲到唔夠樽

每樽平均5安，總共大約16樽。
喺我開始返工時乳頭開始無咁痛，因為畀BB啜少咗，
到後來近滿三個月乳頭先開始算做唔痛，只係BB一開始啜時先痛，啜啜吓就唔痛，
我估我個乳頭強韌咗，因為BB唔食時扯到乳頭都唔會太痛。
而家我知道原來我是很多奶的，多到夠晒BB食有多好多!

在此鼓勵各位餵母乳媽媽，共勉之

0 0 0

私人傳訊回覆引用

ho-liday

子爵府

積分: 10677

我的育兒心得勳章想生BB熱投

2^#

發表於 13-12-31 16:49 |只看該作者

你媽媽也很明白做奶媽的痛苦, 知道阿女餵得咁辛苦, 都要堅持陪你走過! 你BB 有好媽媽, 好婆婆. 幸福呢!

吾意愛而不錮，尊而不評，同而不擾，邀而不迫，離而無怍，論而不責，助而無犯。得此相待，方互澤潤

私人傳訊回覆引用

phoeberie

複式洋房

積分: 460

3^#

發表於 13-12-31 16:58 |只看該作者

回覆：分享我餵人奶三個月的經驗 (長)

你有無特别做左d咩？
點解之後可以咁多奶？

私人傳訊回覆引用

catcatcati

伯爵府

積分: 17882

美好大世界2017勳章最關心BB問題熱投勳章我的育兒心得勳章 DHA勳章 BK Milk勳章

4^#

發表於 13-12-31 17:12 |只看該作者

引用：+你媽媽也很明白做奶媽的痛苦,+知道阿女餵

原帖由 ho-liday 於 13-12-31 發表
你媽媽也很明白做奶媽的痛苦, 知道阿女餵得咁辛苦, 都要堅持陪你走過! 你BB 有好媽媽, 好婆婆. 幸福 ...

係呀我媽咪真係好好！喺我坐月期間每日拎好多野黎煮畀我食，日日煲木瓜魚湯煮雞飯，產前幫我煲定一大煲薑醋，因為薑醋要煮好多次的佢就將個重煲搬上搬落好多次，我知佢拎得好重好辛苦的，黎到又有幫我洗衫，幫BB沖涼，喺我唔夠奶時幫手沖奶餵BB，又幫我睇住BB等我有得瞓覺休息吓。

如果唔係得佢堅持和鼓勵，我已放棄餵人奶好幾次了! 唔會到今日咁順利

私人傳訊回覆引用

ho-liday

子爵府

積分: 10677

我的育兒心得勳章想生BB熱投

5^#

發表於 13-12-31 17:19 |只看該作者

catcatcati 發表於 13-12-31 17:12
係呀我媽咪真係好好！喺我坐月期間每日拎好多野黎煮畀我食，日日煲木瓜魚湯煮雞飯，產前幫我煲定一大煲薑醋 ...

人奶媽媽偉大, 支持餵人奶媽媽的媽媽也很偉大, 因不淨看BB 哭就以為你沒有當個好媽媽的無聊想法!

吾意愛而不錮，尊而不評，同而不擾，邀而不迫，離而無怍，論而不責，助而無犯。得此相待，方互澤潤

私人傳訊回覆引用

catcatcati

伯爵府

積分: 17882

美好大世界2017勳章最關心BB問題熱投勳章我的育兒心得勳章 DHA勳章 BK Milk勳章

6^#

發表於 13-12-31 17:20 |只看該作者

回覆：phoeberie 的帖子

我無食 more milk plus, goat's rue 等，但媽咪日日都有煲木瓜魚湯畀我飲，而我自己都無做特別野，就係feed on demand密密餵，而家返工都係每日泵兩次，有時1次，有時朝早谷又會泵多次變3次。

我唔知係BB細食定係我多奶咗，返工之後偶爾放假全埋身會谷奶，反而返工有泵清就無事，即我的奶量是多過BB所需要的。兩個月前全埋身一直都無谷奶問題，而家泵奶就有了。

私人傳訊回覆引用

msmomo

複式洋房

積分: 317

7^#

發表於 13-12-31 17:42 |只看該作者

回覆：分享我餵人奶三個月的經驗 (長)

我都全人奶左3個月，大家一齊加油

私人傳訊回覆引用

f.sakurako

複式洋房

積分: 276

8^#

發表於 13-12-31 18:12 |只看該作者

回覆：分享我餵人奶三個月的經驗 (長)

你就好啦！我一開始話喂人奶！我99就話好麻煩！問佢有幾煩！佢就話我呢樣唔食得個樣唔食得！然後又話要買個暖奶器暖奶好煩！（辛苦個個係我我都未出聲

）
然後我係打算全埋身既！個泵只係諗住做後備！到我就生！我99就同我講生左出院前記得要問護士係喂佢食邊隻奶粉。。。。
到我生左！我一直都係喂人奶！係出院前bb宿左水唔夠磅護士喂左佢食一次奶粉咁大把！然後因為佢隔左都五六個鐘頭未有大小便！護士就話如果佢到夜晚十二點前都係無大小便就要喂奶粉！我99既刻問佢係食邊隻奶粉！護士就答話佢只係補過一次奶粉！食邊隻都得！係搭的士途中佢就話轉頭要落街買奶粉