陸羽仁
大放水 2007/9/19 上午 09:17:35
網誌分類: 經濟
http://www.hkheadline.com/blog/reply_blog.asp?f=5YTPBH5B812303&id=61132&catID=&catType=&keyword=&searchtype=
美國聯儲局減息０．５厘，而且係聯邦基金利率（銀行同業隔夜拆借的利率）和貼現率（銀行向央行借錢的利率）同時減，減息力度超乎市場預期，結果美股道指大升３３５點（升幅２．５％），日股早段升超過５００點（３．２％），港股又有一抽。黃金亦急升上７２３美元，美元兌主要貨幣匯價暫時穩定，商業票據溢價回落，減息初步達到穩定金融市場的效果。
金管局任總今朝講，聯儲局減息半厘，顯示儲局認為次按和樓市問題嚴重，大幅減息有助穩定貨幣市場和樓市，但他認為不能視減息為一種趨勢，因為貨幣市場穩定後，聯儲局不一定要繼續減息，至於香港銀行減唔減息，就由銀行自定。
由於國際貨幣市場緊張，加上香港大量新股上市，近期本地銀行同業拆息抽高，所以香港未必會跟美國減息。不過陸羽仁靠估，銀行公會即時決定跟美國減０．５厘的機會微乎其微，但跟減０．２５厘的機會仍然存在，減息有利樓市，銀行可以多做按揭生意，聽聞匯豐、恒生大把水，其他銀行無乜水，所以匯豐、恒生想減息唔奇，因為而家減少少息刺激吓樓市，大量按揭生意湧出來，無水的銀行唔敢太勇去接，就由匯豐恒生食哂。中、小銀行唔想減息住，因為佢地靠在銀行同業市場借番來啲錢放貸，高息令定息的按揭蝕水，如果而家唔減息住，同業市場利率回落，佢地就可以賺番啲錢幫補吓。所以香港減唔減息，睇吓大銀行點玩。
講番儲局的減息決定，可以用「大放水」來形容，兩種利息一齊減，一減減０．５厘，特別值得注意的是聯儲局８月１８日已將貼現率（銀行向央行借錢的利率）下調０．５厘至５．７５厘，今次再減０．５厘至５．２５厘，即係話一個月內減了１厘貼現率，銀行無水，可以向聯儲局低息借錢應急，這是一個大放水的措施，是一劑重藥。
睇完聯儲局的減息行動，可以有幾個結論：第一，美國樓市和信貸市場的確大鑊，再加上看到衍生風暴吹到英國按揭銀行北石差不多執笠，災情嚴重，聯儲局要以超常規的手段救市。第二，大減息短期有助回復信貸市場的信心，有助舒緩緊張的銀根，銀行唔夠錢就以５．２５厘的利率向央行借，多多都有，照計唔使再搶高各地銀行同業的拆息，而家全球金融一體化，英國銀行唔夠錢，就搵當地分行去美國央行借啦，只要有抵押品就可以借，利息又唔係高。第三，大放水能否長線防止美國衰退的效用成疑。
有關第三個問題，即美國經濟會否衰退，有幾個可能，第一，最好的情況，伯南克未來連番減息，令美國樓市軟著陸，從根本地解決次按問題，美國經濟避過衰退。第二，最壞的情況，大減息又掀起炒風，善忘的美國佬見股市升番，連自己間樓能否續按的問題也暫時不理，再去大手消費，通脹好急咁升，伯南克想減息都減唔落手，出現最衰的停滯澎脹。第三，中間落墨，把美國樓市頂住，次按危機抖一抖，又暫時緩解商業票據市場的恐慌，等幾個月再爆鑊。
陸羽仁有少少傾向第三個結論，即係拖吓拖吓，明年再爆，如果是這樣，短期對亞洲市場最有利，因為美國大減息減少了全球金融大爆鑊的危機，而亞洲又是受次按影響最少的地區，會吸引資金入來短炒，長啲唔識講，一兩個月有得炒吓，睇到明年就無眼睇啦。
原文章由 靖兒 於 07-9-20 12:00 發表 
美國佬唔係減 1/4 厘喎, 佢要減成 1/2 厘息, 咁次按即係好大鍋啦.
還唔到錢既, 唔會話減 1/2 厘息就還得起架. 點解大家會咁高興呢 ?
愛一個人的優點而誠心接納他全部的缺點，就是婚姻最偉大的地方。
發表於 
返回列表
