續….
「買易手車的心態」
除非你是追求“辣仔” 、“特別版” 、“名車” ，否則買部車回來，你應抱有「洩硬」的心態，而唯一「賺」的是，“享受駕駛”、“時間自主權” ，與及“一家人四圍遊玩的歡樂”，始終車是奢侈品、銷耗品，就是花錢。
但某程度上，如何令買入的易手車仍能有一個「價值」，意思是指，假設就當是5萬成交吧！別以為用了一兩年以後，你仍可以5萬再放一次，因為「牌簿手數」、「部車的里數」，加上「機件的損耗程度」與及許多種種的因素下，這些都是買家押你價的理由，當然，最重要仍是講及「折舊」的問題！
抱一個心態吧，你希望部車能揸到「劏」，而你養部車的過程中又沒有太多大修，又慶幸你沒有撞過碰過，跟部車Say Good Bye時送去車房劏，車房仲有一千幾百比翻你，那就是賺咗啦！換言之，若然你不追求外型款式，又無需追求車廂內的享受，而純粹買部車去代步或是新牌仔操熟手車，又怕冒風險買入一部七勞八傷的車。那麼，你就買部幾千蚊連牌費燕梳唔靚仔的車吧，是真的！因為，你無必要投資任何金錢去做任何保養，就是入油，揸落發現問題開始出現，若不是涉及嚴重的駕駛問題，一於揸到佢罧吧！掉去車房劏，你隨時仲有幾舊水收翻，甚至乎牌費仲有最少一季，仲可以返運輸署退錢！洩盡就是幾千蚊加入油和泊車。
前題曾提及某些展銷場、車房或者經紀代車主放車的，為何我盡量迫之則吉呢？
首先絕對不要說別人「呃」，生存之道，香港地搵兩餐總有不同的生存方式。經驗中亦曾試過經行經紀買過醫生車，醫生出新車便將部舊車去Trade，是靚仔的，零字牌簿，里數少，不過可遇不可求！純粹分享，我對這些中介場有這樣的個人體會：當然，你有相熟經紀就當別論。
我強調「不要說別人呃！」，首先展銷場的貨源主要本自客Trade-in，其次行家與行家之間幫客人放車，又有直接做水貨的，最後便是四出「撈」街車（包括網上）的來源。無論如何，因為當中涉及到「拆」數，所以若然一部5萬蚊的車，粗略估計個價會抬高好多，因為，部車翻到場先叫技工洗乾淨部車頭、搵師傅全車內外却漬翻新、做一轉普普通通低價人手鍍膜（在展銷場的射燈照耀下才顯得金光耀眼）！一句說話：「羊毛出自羊身上」。
其次就是銷售手法，又是一句「不要說別人呃！」，每一行有行行的規矩嘛！我只能講，若然你遇到這種情況：「我想試車，或上一上架睇睇部車時先，而答案是：好呀，你落咗訂先比你任試任睇吧！」，我勸你迫之則吉此為尚策！最後一句，這些場一般「講價的幅度不大」，加上車價已抬高好多！那你又何必買貴過別人呢？
至於車房、露天車場，又是千萬不要說別人「呃」！只能講，買車要盡量將所冒的風險減到最低！作為完全的門外漢，我建議別經這些途徑去作選購，除非你對汽車已有一定程度的認識，否則你很難憑肉眼辨認得到部車有沒有古怪。
抱歉，經過一翻長篇累贅，最後，我來過實戰經驗分享作結尾好吧。
倘若，你已覓得心儀的車輛，經過與賣家聯系（起底）後，你自覺賣家的可信程度是值得你相信的，下一步就是相約賣家“揸部車”出來望一望吧！
少少策略上分析，如果你能相約他到你指定的地點見面是最理想不過。就我的做法，因為我毫不在意車身靚唔靚仔（因為我目的要求機件好，特別是直版即無撞過），好多人話睇車一定要日光日白，這才能清晰辨別部車有沒有抄過！
我則認為個殼幾靚是無意思，一部全新車落地3,4,5,6年無挨挨笨笨過，別天真！你會相信嗎？縱使一般在高速公路被沙石打得多，車身自然唔會靚仔，反觀，若然你睇一部七、八年車齡的車，嘩！個車身靚到你唔信，你反而應該去質疑才是對！況且，坊間師傅今時今日的手功超卓，噴過油補過灰，又豈能單憑你肉眼能分辨出來嗎？若非讓專業技師幫你打針，用電腦量度車身油的厚、薄對比，你是無可能知道車殼每一幅油是不是出自原廠！切記，你應提醒自己是否以追求車身靚仔作為你首要目的？
回應前段，那一次我反而相約在某大形購物商場內的停車場會面（車主自稱居於錦X花園而在中文大學上班）（當然我就自己放工啦…哈哈…），我指明第幾層停車場大約那些車位最近商場升降機出入口，我遲了半小時到達，目的是「他經過一程長途，車入車場稍為冷卻後，若果底盤漏油是一目了然的！」，當然有人會問「唔比賣家醒過你咩，一早搵人泊定或者擺咗幾個位先至再泊去你指定位置都睇唔到啫！」。任何情況下，你作為買家都需要賭一鋪！不過，賣家的誠意，已經大大減低許多不利的因素！若然七勞八傷漏晒油，你都唔敢揸出去比人睇啦！當然，經車房大修過的話，就要靠接下來的每一步去引證，證明比你自己睇“信唔信啦”。
車頭是熱的、隨隨用電筒照一照車底，初步唔見滿地油，先過第一關！接下來，切記，你並不是因應車廂內的豪華設備吸引你，或是車內外的Condition好壞作為落訂的指標！
第二關，憑你肉眼去分辨部車有沒有“炒” 過重要部位！縱使維修手功超卓，有些微細事仍能分辨得到。（不同車廠有所不同）先開車頭冚，初步睇幾個位置(1) 打開車頭冚以後，你眼望見車頭正前方俗稱「稱鬼面罩」對入就是水箱，自水箱位置四周，你會發現不論是橫、直的骨，這些一條又一條的原廠黑色（骨）桿，一定有原廠六角鏍絲梗死不同位置，鏍絲由原廠機械臂安裝，如是直版，所有鏍絲絕不會有花痕，顏色亦必是一樣，而且車房師傅唔會無聊到去幫個客補油，就算刻意點過油，你一定分辨得到！
(2) 接著，從水箱往下望入引擎的正前方“頭龍門架”如果撞到入晒龍門架，師傅幾好手功又焊、又拉直，是絕對睇得出！此外，要特別留意車頭內許多金屬組件，如你發現有任何顏色「瑩光筆字樣」、「白或藍油筆」等數目字或任何字樣，即代表部車“搬過零件”執過！如果賣家同你強調無碰無撞，那麼你可以無需再睇落去！
(3) 又過一關的話，接下來望一望車頭冚內相對兩對頭轆垂直位置兩條“柱”！柱頂又是鏍絲被開過有花痕的話，又增添咗你嘅懷疑，立即放棄吧！
(4) 所有喉管接駁位的“喉碼”無論水箱、引擎所出的任何一組有無分別不同款式，原廠是好容易辨認！假設“副車頭擺過”，向原廠攞配件是非常之昂貴，除非賣家捨得花一大筆金錢去執翻整部車，然後攞去放，而且車房師傅又願意肯咁大工程（點計你人工先？），執得靚而比人呃得到抵死啦！況且，駁過、燒焊過、拉直過一眼就睇得出！車房佬同公正行與及保險都叫車主Total Lost啦！所以叫你盡量唔好去車房買車就係咁解！
以上(1)-(4) 是直接影響部車的安全性，無論有一樣中咗，唔好買！
倘若(1)-(4) 又過得到，接下來就是(5) ，要求車主清起車尾廂內的雜物，揭起尾廂份地氈，你會見到後備輪呔。尾廂成個盤盡在你眼前，原廠只得一隻顏色，四圍包膠邊，原廠防水膠是一條過的！有沒有斷開咗！撞到入晒肉，尾廂揼過、補過、燒焊過、扇過灰或補過油，甚至是做過防鏽（生鏽）又是一目了然！因為，尾龍門你無辦法睇得到，一日未到上架比車房佬去睇，你是無法得知這個部位有無大撞過！
其實，仍有幾個步驟要去睇，例如打開晒所有車門，每一個司機、乘客上落車條腳踏（底盤邊），如果有拉直過，灣灣曲曲肉眼是可以分辨的。不過，作為經驗不足，而身邊又沒有可信任的朋友相助的情況下，(1)-(5) 若能順利過關，只代表下一步你可以相約賣家去車房上架睇！別落訂！亦千萬不要到賣家介紹的車房上架！求其搵間大家都唔識嘅車房Wall-in，最多只不過掉低300-500百飲茶，車房佬何樂而不為呢！上架這個動作一定要做！因為，有無漏油、條大陣、龍門架、四組避震機到期未、底盤…. 好多好多只有這個情況下用大燈照先至清清楚楚！加上再比車房佬翻望一次副車頭，買賣雙方都在陌生的情況下聽取咗車房佬說法，最後先至講價啦！
發表於 
返回列表
