自由報料今日: 66|主題: 296685

收藏本版

發帖

返回列表

跳至頁

查看: 7753 | 回覆: 37

暑假好去處 - 2016 [複製鏈接]

110

oasis18

珍珠宮

積分: 37770

母親節2025勳章 2025勳章蛇年勳章虎到金來勳章

1^#

發表於 16-7-9 09:55 |只看該作者 |倒序瀏覽 |打印

暑假好去處：12大商場動漫活動全攻略2016July 7, 2016 |Posted by Vicky Lam | 全部文章, 品味生活
Tags: 動漫, 商場活動, 好去處, 小丸子, 暑假, 海底奇兵, 藍精靈, 親子活動

話咁快又到7月，學生們一定好開心咁期待暑假嘅來臨，而打工仔就一如往常咁返工同返工……但小編相信，今個暑假無論大人定細路都會鍾意，因為就算唔使錢、唔去旅行，香港地都大把好嘢玩！剩係計香港各大商場，嚟緊就有成十幾個動漫/卡通活動等住大家去打卡影相。而家就等MoneyHero.com.hk同大家逐一介紹啦！

1）海港城：「藍精靈．十分勁」亞洲巡迴藝術展

今年暑假，尖沙咀海港城露天廣場將會改頭換面，化身成為巨型藍精靈村莊！美芝、嚕囌王、論盡仔、畫家等35隻藍精靈將會現身同大家見面，村莊內仲搭建咗一個6米高嘅精靈屋，入到去你會見到精靈爸爸在屋內教授大家藍精靈魔法咒語。粉絲更可選購香港特別版藍精靈Figure及全球精品。
最難得嘅係，作者Peyo嘅36幅珍貴原稿將會由比利時空運到港，於「海港城．藝術館」公開展出，喜歡藍精靈嘅朋友又點可以錯過呢？
日期：2016年7月13日至8月9日

2）將軍澳東港城：《太鼓之達人》運動祭

《太鼓之達人》係好多80、90後嘅童年回憶，見證咗無數人放學落機舖打機嘅學生時代。東港城喺今個暑假將會舉行《太鼓之達人》運動會，提供好多款唔同嘅街機俾大家試玩，大家一於約埋中學嘅老友，一齊去重溫當初嘅美好回憶吧！
《太鼓之達人》運動會有7個運動場景，包括3D腳踏發光單車、3D太鼓造型鞍馬、3D太鼓保齡球、風帆、足球小將等，還有15隻1:1的3D《太鼓之達人》公仔。而小朋友可以玩4.5米高嘅「充氣波波彈彈床」，只要即日以電子貨幣於商場內最多2間商舖消費滿$200即可免費試玩彈床一次。
日期：2016年7月9日至8月31日

3）尖沙咀The ONE：櫻桃小丸子「Mamma Mia得意之旅」

為慶祝小丸子30周年，小丸子會喺尖沙咀The ONE嚟個「意式」登場！「Mamma Mia得意之旅」以意式建築為設計主題，有齊大家熟口熟面嘅意大利著名景點包括威尼斯小鎮、特雷維友藏噴泉同埋小丸子意大利特色藝術館（Pop-up Store）。露天廣場仲特別搭建咗一個小丸子Milano花圃，除咗用唔同鮮花砌成小丸子頭像之外，亦有小型噴水池同花卉嚟做點綴，令大家恍如置身歐陸式花園。今次展覽製作認真，小丸子Fans切勿錯過！
日期：2016年7月9日至8月31日
（暑假另一注目活動就係書展！即睇：香港書展 2016慳錢攻略）

4）海港城LCX：Neko Atsume「悠遊夏祭」展覽

人氣手機遊戲Neko Atsume 《貓咪收集》現正於海港城LCX舉行首個全球大型展覽「悠遊夏祭」！Neko Atsume嘅貓咪們會以各種可愛嘅夏日造型出現，相信無論係貓咪粉絲，都一定會愛上咁「打耳」嘅佢哋！展覽場地亦會布置成貓貓喺Game裏面嘅住所，猶如置身遊戲場景，鍾意Neko Atsume嘅朋友記住去影相啦！
日期：即日起至2016年8月31日

5）又一城：Disney Tsum Tsum Walk N’Roll Festival

Disney Tsum Tsum今個夏天再次回歸又一城！今次Tsum Tsum展覽首次注入機動元素，除咗有各種萌爆嘅Tsum Tsum大型擺設之外，仲會展出一個全球最高嘅7米大型機動裝置，展現Tsum Tsum生動鬼馬嘅一面！為加強同粉絲們嘅互動，大會仲引入咗全新日本Disney Tsum Tsum「街機」、貼紙相機、自製姓名貼紙機及銅幣製作機，一次滿足你N個願望！
展覽日期：2016年7月16日至8月16日

6）Time Square：《海底奇兵2》展覽

迪士尼《海底奇兵2》今夏上映！大家除咗去戲院睇佢哋之外，記得去埋時代廣場搵齊咁多位角色影相！影相位包括多個《海底奇兵2》電影場景、識上搖下擺嘅大型裝置，以及32隻唔同角色嘅3D模型。地面有蓋廣場更設有長達5米嘅巨型觸摸池，讓參觀者在水中觸摸各式仿真海洋生物，包括主角多莉、馬倫、Mo仔、阿亨同珊瑚礁等，特別適合家長帶埋小朋友去探索海洋世界！
日期：即日起至2016年7月31日
（話時話，暑假之後好快又到中秋，你訂咗月餅未？即睇：【月早買月平】月餅訂購優惠全攻略2016）

7）樂富廣場：「My Melody 綠庭園」及「My Melody 綠運場」

為迎接8月巴西奧運，今年暑假嘅商場活動都添加咗好多運動元素。嚟緊樂富廣場A區及B區將會分別改造成「My Melody綠庭園」及「My Melody綠運場」，等My Melody同大家宣揚綠色生活，同時為港隊健兒打氣！
「My Melody 綠庭園」係一個滿布鮮花嘅士多啤梨農莊，每組鮮花擺設備有水種植物「打氣」裝置，大家亦可體驗不一樣的水培種植。場內仲有紫藤花搖椅、巨型花籃等影相位，仲有服飾同道具出租，喜歡影相嘅女仔一定鐘意！「My Melody綠運場」則比較富動感，「運動場」內有單車「打氣」裝置、仿真實感的滑浪風帆、高爾夫球體驗區等，等大家一齊參與健康綠色運動！
日期: 2016年7月8日至8月21日

8）荃灣廣場：《蠟筆小新Summer Challenge》

為配合奧運主題，荃灣廣場亦邀請咗蠟筆小新同埋佢屋企人，嚟到商場嘅室內競技場陪大家玩競技賽！3,000呎嘅室內競技場內設有3大關卡，分別係春日部雙葉幼稚園校巴、3.5米高大笨象攀爬滑梯以及巨型「人體」陸地滾球，重點係3個關卡都係免費！喜歡小新嘅朋友記住嚟玩啦！
日期: 2016年7月22日至8月31日

9）屯門市廣場：Sanrio Characters塗氣競技場

屯門市廣場今個夏天都唔執輸，搵嚟Sanrio一眾大熱角色齊齊迎奧運！場內將以繪畫工具打造獨特風格嘅大型立體裝置，而Hello Kitty、XO、大口仔、Little Twins Star等角色會化身成唔同項目嘅運動健將。競技場每星期將舉行唔同主題嘅互動遊戲，包括：「筆．一般接力賽」、「投籃競賽」、「色彩投擲賽」及「碰碰球競賽」。顧客只要消費$100，就可以參與活動，贏取限量版文件夾！
日期：2016年7月18日至8月31日

10）九龍灣MegaBox ：《憤怒鳥大電影》開心繽紛派對

《憤怒鳥大電影》正在上映中，而主角阿雄就以逾15呎高嘅巨型姿態現身MegaBox！同場仲有佢嘅朋友阿爆、阿查及大壞豬，以及12呎高巨型椏叉及20呎高鳥屋，將電影場景一一呈現眼前。活動期間逢星期六、日3:00pm至6:00pm，MegaBox L5中庭及L9仲會有阿雄、阿查及阿爆「親自」同大家見面，到時一齊去搵幾位主角影相留念啦！
日期: 即日起至2016年7月31日

11）葵芳新都會廣場：Kerokerokeroppi Forest Camping

今個夏天好熱鬧，就連Hello Kitty嘅朋友仔Kerokerokeroppi都話要嚟香港度過一個熱辣辣嘅暑假！嚟緊葵芳新都會廣場3樓天晶館將會變身成郊遊勝地，而Kerokerokeroppi將會現身同大家玩齊至潮露營設施，包括5.5米高巨型Keroppi木屋塔及萌爆露營車、野外煮食營火等，家族成員更會陪大家玩轉森林3大野外露營遊戲添！同場亦設有Kerokerokeroppi期間限定精品店，買個去Camp 用嘅背囊就最啱啦！
日期：2016年7月9日至8月31日

12）屯門V city：巨星Duck Duck運動會

V city於今年暑假與香港本地品牌B. Duck合作，舉辦B. Duck運動會展覽，為香港選手落力打氣！場內有多個大型裝置，展示各種唔同體育頂目。鴨仔B. Duck游水就叻，估唔到佢仲變身奧運火炬手、足球健將、拳擊選手，造型仲好可愛添！影完相可以去Pop-up Store睇睇精品，正價貨品可享85折優惠！
日期：即日起至2016年8月31日