請問有無兩公婆返同一間公司(任何行業) 或
兩公婆共同經營/打理旅館/酒店生意的BK朋友可以分享下自己經驗或意見?
背景: 我現時返緊政府部門合約工(海外)，福利比唔上正式公務員,只有基本放星期六日紅日及年尾固定6日假。人工唔高,自覺稍為偏低。工作內部主要同翻譯(文書加口頭)有關。
我老公公司係管理及經營觀光旅遊設施(算大公司)，佢返營業部,間中要短期工幹同旅行社等組織開會,亦需負責計劃及出席宣傳活動,攪大型活動或繁忙期要出觀光設施幫手。
問題1:
我份約3月尾到期,而家要提交下年度續約意向。而家份工,人際關係簡單,一齊工作既人都好好,工作內容亦算係鐘意既,只係唯一衰在人工低。
加上我只係合約工，唔會有升職加薪既機會,即係除非唔做,一做就要予左成世都同一個薪金水平。
我今年就快30,都諗緊自己前途問題。
而舊年10月時,老公同我講佢老細想我過檔佢公司。不過因為未完約我唔想中途走,就話而家走一定唔得,我有興趣不過要等到4月。口頭上(全部經我老公傳話)話係負責其中一個觀光地既INFORMATION CENTER同埋想我幫手翻譯網頁文件。而薪金上比我而家份工多3份1，不過只有得放星期六日，實際工作時間未講實，但可以肯定如果一日超8個鐘肯定有OT收,唔會係黑企。
我個人顧慮係，一來新工作咩都未講實好唔實在，二來最最重要係我怕入左同老公同公司，日後工作上有問題會將情緒帶返屋企。
雖然我同老公工作性質同部門唔同,正常黎講唔會在工作上有直接衝突，但我老公做野唔係特別快同醒果一類，比較「煮到黎就食」見步行步果種;而我自己係做野要快,效率,有計劃,行一步諗定下3步。
有時候聽老公呻工作問題，或睇到佢帶返屋企做文件時既情況,都有覺得係佢自己做得唔理想既地方。但基於佢返到屋企係我老公,我又唔係佢公司既人,就可以好偏心咁幫親不幫理，呵護下佢,等佢唔好咁士氣低沈。但如果同公司,佢工作表現影響到我既工作效率,我怕我會鬧佢或對佢有不滿。
有無兩公婆同一公司既人可以分享下,兩公婆返同一公司遇到的問題,或其實有我唔知既好處?
問題2
承接問題1既背景。
老公同前老細(酒店)在公在私上一直有聯絡,老公幾鐘意前老細。前老細近排問我老公同我有無興趣接一間旅館黎打理,佢話附近有間旅館轉左老細翻新後，想搵一對夫婦經營打理。個前老細穿針引線約我地下星期同旅館老闆見面食飯,睇下大家岩唔岩傾。
基本人工唔係好,但勝在老公本身鐘意酒店業，同埋做得好有機會分紅(聽講)。但唔理人工點先，我睇周圍識既經營酒店家庭,兩公婆關係都係破裂既多。包括佢前老細,個老婆都好多怨氣。相比搵唔搵到錢，我第一個顧慮係兩公婆會唔會無哂私人時間,會唔會關係破裂。
管理旅館好困身,閒時無客都要打理同24小時ON CALL,又要拉客,旺季更加做到唔洗停。好怕因工作同老公愈行愈遠，有無人有經驗可分享下?
發表於 
返回列表
