近幾年祖父母、親威陸續離世，變得壓力好大，成日驚住幾時輪到下一個親人，又唔知幾時會輪到父母。有個親威只係50幾歲，有症狀之後唔夠三日就過咗身，聽到之後真係好心寒。自己仲係二十頭，仲讀緊書，本應係搏殺期，而且終於有機會可以達成由細到大嘅夢想 — 出國留學。但係因為驚，唔知身邊嘅親人幾時會走，唔敢離開得遠。讀大學時見到啲同學住hall，一到weekend就去玩，一放假就成班一齊去旅行，覺得好羨慕，而自己因為想珍惜同屋企人一齊嘅每一刻，變咗連朋友約食晚飯我都會推，weekend同放假亦都留喺屋企陪屋企人。而家諗返轉頭覺得自己浪費咗好多青春嘅時光。不過都冇辦法，我單係見到阿媽啲頭髮愈嚟愈白我就唔忍心唔陪佢自己走去玩。甚至考試都唔敢lei埋房溫書，驚今日唔見多幾面萬一聽日突然走咗我就會後悔一生。明明自己由細到大都唔係好錫鐘企人嗰種，明明自己都好想好似普通大學生咁同朋友一齊玩盡佢，但就係做唔到。好矛盾，唔知應該點做。
見到有啲朋友死咗個一齊住嘅阿爺都好似冇咩特別咁樣，覺得好不可思議。我有近親走時最起碼都會depressed一個月，雖然未至於會喺朋友面前喊，但係至少做嘢會提唔起勁，娛樂活動都一定停止晒。即使隔咗好多個月，夜晚諗返起親人，我都可以喊通宵。而佢哋過幾日就冇晒事，問佢哋：「乜你親人過身唔傷心㗎咩？」佢哋會話其實都冇乜嘢，唔太care。甚至有同學喺近親重病時仍然照返hall照返學。老實講，我好羨慕佢地。究竟只係我身邊嘅朋友太薄情定係我太多愁善感？
arielmla 發表於 16-12-28 04:21
近幾年祖父母、親威陸續離世，變得壓力好大，成日驚住幾時輪到下一個親人，又唔知幾時會輪到父母。有個親 ...
發表於 
返回列表
