少年成長今日: 11|主題: 15876

收藏本版

發帖

返回列表

跳至頁

查看: 1941 | 回覆: 1

心急家長 [複製鏈接]

csir3290

子爵府

積分: 11073

1^#

發表於 17-10-29 13:18 |只看該作者 |倒序瀏覽 |打印

本帖最後由 csir3290 於 17-10-29 13:19 編輯

作為家長其中一個好重要嘅特徵就係心急，唔知點解平時做嘢唔心急嘅人但一返到屋企見到仔女就會變成一個好心急嘅人。今日忽然間自己諗下原來自己喺屋企講得最多嘅就係快啲呢樣快啲嗰樣。總言之叫咗對仔女做乜嘢，如果佢哋唔係即刻做就梗係覺得唔順眼想佢哋即刻做。好似早兩星期成家人襯星期六晚坐咗喺個廳度一路食薯片一路睇戲，食完曬就想佢哋即刻去洗手然後先再睇，但叫咗三次，呀女都係未去，卒之忍唔住話佢，阿女開始有啲喊但係都見到我哋鬧就即刻去。後來諗下一家人好好地睇套戲點解為咗洗手都可以搞到阿女喊呢？其實係咪睇完先洗唔得呢？唔知點解做咗家長之後，對住對仔女就變得好心急。所以都會諗下其實有冇必要咁心急呢？仔女都可以安排自己嘅時間，其實只要佢哋知道跟住落去會做乜嘢，同埋知道如果趕唔切做佢哋要承擔乜嘢結果，咁有冇必要咁心急呢？而且通常我哋心急到最後都只會破壞大家之間嘅感情又何必呢？呢兩個禮拜我都經常提住自己唔好咁心急，總言之提咗對仔女要做啲乜嘢，就由佢哋去做但係會事先講畀佢哋聽如果趕唔切就會點樣。好似提醒佢哋每日要先完成嘅責任係要先做完功課練完琴搞掂曬學校啲嘢執好曬書包，之後先再玩。如果完成唔曬就唔可以開電視同埋玩，呢兩個星期似乎我哋唔係咁囉嗦佢哋又好似真係自己可以搞得掂。所以我開始會諗係咪因為我哋成日只係叫佢哋要做乜要做物，只係想佢哋快啲做完，但係我哋又好少會話畀佢哋聽點解要快，同埋做得慢嘅後果係乜嘢，所以佢哋咪唔覺得要快囉。而家我都學習緊點樣同佢哋講嘢先至可以令佢哋安排好啲時間，同埋係咪乜嘢都要咁快做好呢。我會嘗試同佢哋講跟住會係點，令佢哋覺得有份參與之後嘅計劃。例如我會先同佢哋講幾點要出門口，出門口之前要做完啲乜嘢如果做唔完嘅話咁我哋就出唔到門口，咁就要留喺屋企冇得去玩或者其他嘢。盡量令到佢哋能夠覺得自己係參與喺個計劃入面，有份安排時間。呢兩個禮拜入面我盡量唔囉嗦，只係提醒，盡量提住自己千祈唔好發脾氣，但亦要堅守住自己嘅原則。如果佢哋唔能夠按時造成就要畀佢哋承擔相應嘅後果。好似有一晚本來應承咗佢哋做完曬啲嘢就可以食雪糕，但係今次我哋只係講九點前做完曬啲嘢就可以食雪糕，點知佢哋好似平時咁慢吞吞，真係過咗九點都完成唔到，我哋就堅持唔食，雖然細佬有啲唔開心，但係我哋只係解咗畀佢聽我哋講咗九點鐘做完就可以食過咗鐘就冇，冇鬧佢哋亦都只係好平靜咁講嘅提醒番佢哋記得要按時完成啲嘢。之後佢哋就知道我哋係講真同講咗幾點。其實到而家我哋都仲係喺度學習緊點樣用呢個方法嚟同佢哋相處，雖然唔係次次都成功但係起碼減少咗啲衝突，唔會成日因為啲嘢唔即刻做而唔開心。我會成日提住自己唔好咁心急，心急只會令到啲仔女都心急，我哋煩躁只會令到佢哋都會煩躁，最終都係破壞大家之間嘅感情，其實唔係真係樣樣嘢都有必要即刻做完嘅！