對於我哋呢啲雙職父母嚟講，其中一個好重要嘅題目係點樣訓練小朋友喺我哋返工之後可以自己攪掂啲功課。其實對小朋友嚟講，最重要係點樣幫佢哋建立規律，講得係規律，即係唔會突然之間做到，係需要時間慢慢建立，無得心急，仲要越細開始越好。當年我就係喺呀女升K1下學期開始，因為當時佢幼稚園基本上無乜功課做，所以我就喺市面買定啲K2上學期嘅補充練習，然後每一晚返到屋企同佢用15分鐘一齊做，我唔會同佢講係做K2嘅練習，因為同佢一齊做，所以佢覺得啲嘢淺同好玩時間又短，所以佢都好肯做，等佢慢慢適應做功課係乜。一路到暑假，佢差不多都做晒大部份市面買到嘅K2上學期練習，其中有個技巧我覺得好重要係要教佢讀題目，等佢可以將來可以自己睇題目，因為其實啲題目好多時用嚟用去都係嗰啲字，見得多自然會識。到將來佢自己做時會容易啲。到佢暑假，我哋一齊放咗4星期假，其間當然有去玩啦，不過最最重要係幫佢建立要做完晒功課睇完書先玩嘅規律，所以除咗去旅行嗰個星期外，其他日子都係每朝都一齊做練習同睇故事書跟住先玩。到後期會開始要佢自己做，我哋唔睇住佢，做完先幫佢睇，因為類似嘅練習佢以經做咗好多次，所以對佢嚟講根本好易好少有問題，不過佢自己做完都要讚啦，等佢累積多啲成功感。到佢K2開學前，我哋開始番工，就同呀女講請佢試吓自己完成功課先玩，佢應承就照做。我哋比較好彩，呀女都跟到去做。到佢K2開學，開始有功課，但因為大部份佢都做過，所以佢覺得自己好有成功感，但同時每日我都會加多一至兩頁K2下學期程度嘅補充練習俾佢增加啲挑戰性。不過一定會前一晚教定佢點做等佢第二日自己做。如是者，讀快半個學期程度，訓練佢自己做功課，做好要夾好晒放枱面等我哋放工番嚟檢查，建立咗呢個規律之後，到而家呀女二年班，佢都係自己攪掂。自細佢哋就要明白做功課係自己嘅責任，我哋唔會同佢對手册，總之佢放枱面有幾多功課就檢查幾多，我哋只會幫佢睇有無做錯，唔會睇有無做漏。呀女一年班下學期開始要默書，我地都係幫佢錄定喺平板電腦度，佢做完功課就自己溫同默。而家細佬都係用呢套方法，都係可以幫佢建立到規律再加上見到家姐都係咁自律做，佢仲快做到。希望我呢個經驗大家可以從中參考吓啦。千祈唔好怕麻煩同用得時間多，而家肯用耐性同時間建立呢啲規律，將來反而會慳好多時間。仲有一樣要提，就係電視同電腦，自細都係好少俾佢哋自己睇電視，基本上係一定要我哋喺屋企同問准我哋先睇，每次最多都係1-1.5小時，所以佢哋根本唔會喺我哋番工嘅時間要求開電視。平板就更加唔會俾佢哋用，係家姐而家要默書同做學校啲網上練習先用，但一定唔會用嚟玩。要建立規律，其實做父母都要犧牲啲睇電視同玩嘅時間，都係嗰句，我哋應該係佢哋嘅榜樣。
發表於 
返回列表
