自由講場今日: 201|主題: 1362826

收藏本版

發帖

返回列表

跳至頁

查看: 764 | 回覆: 4

方卓如：信眾尋求指引 [複製鏈接]

jcslam

民房

積分: 21

1^#

發表於 18-3-16 21:14 |只看該作者 |倒序瀏覽 |打印

「方帥，今日你好忙咩？4點後就話唔見人。」

「草蜢仔，今日頭等大事，係4點半長和（00001）業績記者會，大家關心李首富是否宣布退休。如果屬實，一年最少一次聽佢發表評論或會成為絕唱，慘過錯過了賓仕（01705）。」

「唔係啩，記者會啫，退休又如何？」

「同李首富同等級數嘅香港白手興家富豪，只有包玉剛，兩個都係國際級人物。香港地產係厚利嘅生意，地產商唔需要外闖打世界波，去內地發展已經近乎極限，再去遠啲只會買樓收租。只有李首富夠膽去到世界各地搞生意，眼界同人際關係去了另一層次，出自佢口中嘅評論，含金量自然高過其他富豪。遠嘅唔好講，上年全世界問佢撐邊個做特首，佢明顯支持林鄭，講句女媧補天，含蓄地表態，自恃身份，點會學其他人畫公仔畫出腸，慌死人唔知你緊跟阿爺指示？佢仲話中央支持同市民支持不可兼得時，惟有兩害取其輕，道出超人都不能夠脫離政治現實，何況你係平民百姓？」

「咁都係講得有技巧啫。」

「點只技巧？因為佢有眼界，接收嘅資訊豐富過好多有錢人，而且肯在容許嘅範圍內同你講真話，令佢成為目前香港人能夠聽到嘅唯一人話。在現今唔講人話嘅社會，李首富嘅記者會差唔多等於佈道會，等信眾可以尋求指引。」

「有冇咁誇張呀方帥？」

「你有冇見其他富豪去試吓人工蛋？AlphaGo贏完圍棋，佢就去見Deepmind嘅創辦人，了解人工智能，有冇其他地產商會走去問吓什麼是人工智能？當你做地產搵錢咁易嘅時候，仲走去望下未來世界發生什麼事，唔好話超級富豪，一個上億身家嘅中產都分分鐘會冇晒鬥志，求其收租過活算數。對世界有好奇心嘅人，能夠長期維持，係現代社會成功必備。有智慧嘅人肯用說話同你分享，唔使錢，聽下冇壞。雖然，唔會好似霍金演講會，聽完之後可以了解宇宙，終歸是業績記者會，唔似霍金講乜都得。但喺香港再冇人講說話值得你聽，如果你都冇好奇心，咁你就真係冇晒鬥志。」

「得得得，唔阻你，下星期飲茶。」