少年成長今日: 1|主題: 16047

收藏本版

發帖

返回列表

跳至頁

查看: 5937 | 回覆: 0

放榜 - 是大人的事 [複製鏈接]

csir3290

子爵府

積分: 12213

1^#

發表於 19-6-2 11:47 |只看該作者 |倒序瀏覽 |打印

琴日係幼稚園升小一放榜嘅日子，相信對好多家長嚟講都係一個好重要嘅日子。回想起四年之前阿女升小一嘅經歷到而家都係印象深刻。當年阿女自行收生階段只係揸住十五分，其實我同老婆都心知佢唔會喺自行派位階段派到心儀嘅學校，咁咪唯有寄望大抽獎嘅時候會好運一啲啦。其實亦都做咗最壞嘅打算，所以一早都已經寫定曬信預備叩門。不過對於一個幼稚園學生嚟講，其實放校對佢哋嚟講根本就唔係一件事，派到一間乜嘢學校對一個咁細嘅小朋友嚟講亦都唔係一件重要嘅事。放榜只不過係對家長係一件重要嘅事對細路仔根本就不當是一回事。

而家都好記得當日去到放榜收到成績嘅時候，雖然都已經有曬心理準備，但係當知道派咗去一間自己冇揀過嘅小學，仲要係一間聽都未聽過唔知喺邊度嘅學校嘅時候，其實嗰種失望嘅心情我到而家都仍然印象深刻。所以我好明白家長喺放榜收到一個壞消息嘅時候嗰種心情係點。但係對阿女嚟講當時根本佢就唔知係一件乜嘢事，因為我哋根本就冇同佢講過乜嘢係放榜同幾時放榜，更加冇帶佢去睇結果。當我哋知道結果之後其實第一件事係整理好自己心情，然之後諗下點樣同阿女去叩門。跟住返到屋企阿女根本就唔知道放榜呢件事，我哋都冇同佢講過任何關於放榜結果只係好似平時咁。因為我哋知道最壞嘅打算就係如果連叩門都唔得嘅時候阿女係需要去呢間學校讀書。如果喺呢個時間佢已經知道家長係唔鍾意間學校，佢又點會喺嗰間學校讀得開心呢？況且，派得唔好根本就同呀女嘅表現冇關係。之後嗰兩個星期其實我哋都要帶阿女去唔同嘅學校面試，但我哋冇同阿女講啲面試對佢有幾緊要亦唔會更唔想增加佢嘅壓力。阿女只係知道好似之前自行收生階段嘅時候一樣要去面試，只係當平常一樣所以阿女亦都唔會特別緊張。當然我哋作為家長個心入面就梗係非常焦急啦。最後好好彩喺叩門嘅時候阿女終於都考得返入去最初我哋心儀嗰間小學。我同老婆先至鬆咗一口氣。

所以我好明白家長而家呢一刻嘅心情，但係我哋雖然係緊張但係絕對唔可以影響到個細路仔，因為佢哋將來仲要繼續成長仲要繼續喺學校學習。我明白搵到一間好嘅學校對家長嚟講係好重要，但係對於細路仔佢哋自己嘅諗法其實去邊度讀書根本對佢哋嚟講都係一樣，只要讀得開心就係好學校。家長嘅諗法係一間好嘅學校對佢哋學習同成長好重要，我絕對認同亦都明白。但係究竟仔女嘅諗法係點呢？仔女概念中嘅好學校或者唔好嘅學校其實概念完全嚟自家長嘅灌輸。當然去到一間家長都認為好嘅學校可能小朋友真係會學得好啲讀得好啲，但係我覺得小朋友嘅學習最重要嘅影響都係睇家長點樣樣培養同教導個小朋友。好嘅學校有差嘅學生，家長認為唔好嘅學校一樣有好多好好嘅學生。其實除咗學校之外最重要係家長嘅教導。家長當然希望畀最好嘅細路仔，但係乜嘢係對細路仔最好呢？我覺得係細路仔自己生活得開心學得開心。家長先入為主已經覺得間學校唔好，仲不停喺個仔女面前灌輸呢啲負面嘅諗法，萬一到個小朋友真係需要去呢一間所謂唔係咁好嘅學校讀書嘅時候，佢嘅學習生活會係點呢？所以喺呢個階段我覺得作為父母嘅應該收拾心情，好好地為仔女去預備叩門，但係千萬唔好影響到仔女，亦都唔好灌輸一啲對學校嘅負面睇法畀佢哋，到最後若果叩門真係唔成功，父母就好好地接受呢個現實。記住其實派乜嘢學校仔女根本就冇概念，所有個概念都係來自父母。細路仔讀書能夠讀得好除咗學校重要之外，父母嘅教導其實我覺得佔咗八成以上日影響力。我哋認為唔好嘅學校其實一樣可以有好多好嘅學生。重點係父母你點樣樣去教導仔女。如果喺好嘅學校讀得唔好咁唔通父母又怪間學校咩！但係間學校係佢哋自己揀㗎喎。喺呢個時間其實對家長係最大嘅考驗，因為佢要盡力去幫仔女預備最好嘅學校，但係又要保持心境平靜，盡量正面去面對。唔好影響仔女其實呢個時間先至係家長EQ嘅大考驗。

另外呢兩日睇新聞都有好多放榜嘅消息，其中有好多係關於啲仔女派咗去傳統名校啲家長開心到暈嘅片段，又話要買電話又話要請食飯等等。其實我覺得有啲不以為然，我明白家長開心係合理，但係喺個細路仔面前講到咁功利，其實對個細路仔又係咪好呢？派咗去名校或者派咗去自己心儀嘅學校當然係開心啦，但係畀咗個細路仔嘅印象就好似係呢個階段我已經高人一等，我派咗去呢啲學校就好似一定成功咁。個細路仔會唔會覺得其實派到好學校究竟係家長開心啲定係個細路仔開心呢！我都唔明而家個社會點解要標榜派到心儀學校或者傳統名校嗰種興奮，派唔到就傷心到好似個天要冧落嚟呢一種心態，其實我做家長都真係唔明！其實細路仔將來嘅發展最重要仲係睇父母識唔識教。