少年成長今日: 1|主題: 16017

收藏本版

發帖

返回列表

跳至頁

查看: 1664 | 回覆: 0

選擇性失明 [複製鏈接]

csir3290

子爵府

積分: 12040

1^#

發表於 18-4-1 12:27 |只看該作者 |倒序瀏覽 |打印

本帖最後由 csir3290 於 18-4-1 12:27 編輯

做家長每日都要面對住仔女做錯嘢，要發現佢哋做錯嘢嘅地方可以話係易如反掌。但係冇人會鍾意畀人話，話得多啲仔女就會閂埋隻耳仔唔鍾意聽，仲會破壞大家嘅關係，有邊個唔鍾意畀人讚呢？所以我好知道選擇性失明嘅重要性。即係有陣時扮睇唔到佢哋做得唔好嘅地方，但係就一定要見到佢哋做得好嘅地方，然之後對佢哋做得好嘅嘢就要無限放大盡量去讚佢哋等，佢哋知道爸爸媽媽係留心到佢哋做得好嘅嘢。好似我阿女，佢自細讀書都已經俾老師話佢啲字寫得唔靚，其實我哋嘅要求都唔係好高。只不過要佢寫得清楚，但係阿女就係因為要做得快所以就忽視咗要寫得整齊同清楚。開頭我哋都會要佢將啲寫得唔靚嘅自擦咗佢再寫，但係擦得多佢又唔開心佢又唔知道乜嘢標準先叫做清楚同靚，所以我哋後來都冇點擦佢啲字，由得佢畀老師改完之後要佢改正。反而調返轉我哋會搵佢寫得清楚嘅字，然之後讚佢嗰啲字。慢慢佢寫字多咗畀我哋讚，反而佢啲字仲寫得清楚整齊咗。有陣時佢做完功課之後，反而會自動自覺攞本簿畀我哋睇問我哋啲字佢寫得清唔清楚想我哋讚佢。到佢而家三年級啲字雖然唔係話好靚但起碼清楚同整齊咗。
又好似要培養阿仔睇書嘅習慣咁，阿仔一向睇書都冇家姐咁自動自覺亦都冇家姐睇得咁快。除咗我哋每晚會定時有一個閱讀嘅時間之外，其他時間當阿仔自己拎起本書睇嘅時候我哋就會即刻讚佢，呢排為咗想佢練習下睇書嘅速度，我哋就多咗讚佢話佢睇書睇得快咗同埋識得多咗字亦都理解到書入面嘅內容，慢慢多咗讚反而佢多咗會自動自覺拎起本書嚟睇。
又好似要教佢哋要有禮貌要識得叫人咁，每一朝早佢哋落到樓下見到大堂保安叔叔我哋都會教佢哋要叫做早晨，有時佢哋冇叫我哋唔會話佢哋冇禮貌，只係提佢哋要叫人，但係如果佢哋識得自動自覺叫，我哋就會即刻讚佢，話佢你真係好有禮貌識得自動自覺叫人。佢哋知道原來有禮貌會畀人讚，慢慢多咗佢哋就識得自動自覺，到而家唔使讚佢哋都會識得自動自覺叫人。
其實我哋只要懂得掌握小朋友鍾意比人讚呢個心理，慢慢用呢樣嘢嚟控制同改變佢哋嘅行為，好多生活上面嘅習慣都唔需要話成日鬧就可以慢慢改到。