少年成長今日: 0|主題: 16068

收藏本版

發帖

返回列表

跳至頁

查看: 3563 | 回覆: 2

唔抵得 [複製鏈接]

csir3290

子爵府

積分: 12324

1^#

發表於 18-7-1 12:04 |只看該作者 |倒序瀏覽 |打印

本帖最後由 csir3290 於 18-7-1 12:04 編輯

早幾日阿仔阿女為咗搵一件佢哋收埋咗嘅玩具就不停係咁搵，將佢哋其中一個攞嚟擺雜物嘅櫃桶摷到亂曬籠一地都係，但係摷完之後佢哋就繼續玩冇理到一地都係嘢。我同老婆見到就梗係叫佢哋即刻執喇。其實佢哋都聽話都肯執，但係就慢慢嚟，你急我唔急咁每次執少少叫一次就執一次。連工人姐姐都忍唔住想幫佢哋執，我同老婆即刻叫佢唔好然之後行出去同佢哋講要馬上執好，如果唔係就冇得再玩。咁佢兩個立即好合作咁執，點之執下執下，執咗成個鐘先執完。咁之後我哋入去睇原來都執得幾整齊，咁當然又係時候要讚下佢哋啦。雖然要叫咗幾次先至執，但係個重點係佢哋自己執嘢，所以要加強佢哋呢個好行為。其實喺佢哋執嘅時間我有幾次都真係有啲抵唔住想幫佢哋執，但係又係發揮我哋嗰啲堅持嘅時候，係佢哋嘅責任點都要畀番佢哋自己做，話俾自己聽千祈唔好抵唔住頸一定要佢哋自己執。有陣時諗返家長對唔抵得呢三個字就好似中咗毒一樣，好多時細路仔唔做嘅嘢，我哋為咗慳時間就會唔抵得去幫佢哋做，好似食飯啦執嘢啦玩電話啦好多好多。好多時家長就係抵唔住頸幫佢哋做咗，又俾細路仔知道原來佢哋堅持唔做，到最後啲家長就會幫佢哋做曬。其實唔抵得係反映咗家長同埋細路仔有個基本嘅矛盾，家長就想乜嘢都好有效率好快趣搞掂，細路仔就根本唔理得你，我大把時間慢慢嚟邊個唔抵得咪邊個做囉！所以要教導細路仔有自己嘅責任感，要完成自己嘅嘢，家長就好似要戒除毒癮咁解除唔抵得呢三個字。戒唔抵得呢三個字唔係叫啲家長乜嘢都唔理，宜係要堅持細路仔嘅嘢就要佢哋自己做番。佢哋唔做要畀番相應嘅後果佢哋。好似食飯食得慢，唔好唔抵得然之後餵佢哋或者追住位細路仔想玩電話唔好唔抵得佢哋喺度煩住。好多時佢哋唔肯做自己嘅嘢都係因為佢哋做緊啲開心嘅嘢，例如有陣時叫阿女去刷牙佢叫幾次都唔去就係為咗睇電視，咁我老婆就會即刻熄咗個電視，咁佢哋就會知道想繼續睇番自己想睇嘅節目就要快快趣趣搞掂。但係唔抵得呢三個字就好似吸毒咁。當佢一發作嘅時候，家長嘅心情就會囉囉攣好想快啲搞掂。要戒除唔抵得呢三個字，首要心平氣和同自己講冇乜嘢大不了，細路仔嘅責任一定要自己完成，完成唔到就要面對相應嘅後果。呢個係對細路仔嘅教育，係為佢哋嘅將來著想。慢慢就會解戒到唔抵得呢三個字，當我哋戒到唔抵得呢三個字嘅時候，細路仔亦都會慢慢學到要付自己嘅責任，大家嘅心情同埋關係亦都會一步一步變好。