少年成長今日: 3|主題: 16018

收藏本版

發帖

返回列表

跳至頁

查看: 7088 | 回覆: 0

雙面人 [複製鏈接]

csir3290

子爵府

積分: 12051

1^#

發表於 18-12-9 09:47 |只看該作者 |倒序瀏覽 |打印

本帖最後由 csir3290 於 18-12-9 09:47 編輯

早幾日同個朋友傾開關於佢個仔嘅問題，佢話佢個仔係喺屋企成日發脾氣而且脾氣好大，仲會成日掟嘢，邊個人嘅說話都唔聽情況好嚴重。其實我同個朋友都幾熟，佢哋一家我哋經常見到，但係又唔覺佢個仔脾氣咁壞，基本上都冇乜見過佢發脾氣。點知我朋友話佢個仔其實係雙面人，喺越親嘅人面前佢嘅脾氣就越大，見到啲外人反而唔會點發脾氣。嗰日佢同我講開話已經冇曬辦法，個仔乜嘢都唔驚。我朋友係典形嘅中產家庭，對細路仔根本屋企乜嘢都會畀到佢，從來唔使擔心玩具，可以話係生活無憂。所以我朋友話佢個仔根本就冇嘢驚，亦唔會擔心屋企人唔買玩具畀佢或者唔帶佢去街。
其實以前我都已經同我朋友講過佢哋太就個仔。細細個開始，佢個仔一扭計就乜都就曬佢，根本佢個仔做錯嘢就唔會有乜嘢後果最多都係畀人話幾句。細細個做錯嘢嘅時候亦都冇話特別點樣罰佢，到佢大啲我朋友話要同佢講道理，其實咁細個小朋友邊度會識聽你講道理吖！最簡單只係話畀佢聽得同唔得。細細個已經知道邊啲嘢唔做得嘅時候慢慢就會成為習慣唔會去做。另外，由細個開始做錯嘢就要罰，唔好淨係得個講字，講咗罰就真係要罰，唔好淨係得個講字。咁我問我朋友究竟佢個仔仲有啲乜嘢驚呢？佢話佢淨係驚老師。咁我就同我朋友講，襯佢個仔仲細仲係小學，而且都起碼仲係驚老師，咁就要利用呢樣嘢試下慢慢教番好佢。做錯野試吓唔好帶佢去街要忍心啲，當佢發脾氣嘅時間如果想掟嘢或者掟爛嘢就攞部相機出嚟影低佢然之後同佢講話攞畀老師睇。亦都要試下同老師傾吓可唔可以互相合作幫到手，因為襯個仔仲驚老師。總之就要慢慢幫佢建立返規律，學識規矩。要畀佢知道就算佢發脾氣都冇人會就佢，話事嘅始終都係父母。

其實細路仔識得做雙面人，某程度講即係佢仲識得乜嘢叫做規矩，喺外人面前佢知道唔可以發脾氣，亦都知道人哋唔會就佢。但係愈親嘅人佢就知道因為只要佢發脾氣就會就曬佢咪會小小事就發脾氣。所以父母自細就要畀仔女知道要遵守父母定落嘅規矩，發脾氣係解決唔到問題，到頭來只會畀人罰。好多時父母都係覺得仔女細個所以唔忍心罰佢哋，我講嘅罰並唔係要打或者係其他嘅體罰。只不過係話細細個就要畀佢知做錯嘢係要承擔嘅後果。其實我都冇真正打過我對仔女，只係佢哋好細個嘅時候試過細細力一兩下嘅打手板，但係之後如果要罰都係罰企隔離圈。當然亦都試過扭計唔食飯而冇得食，又或者冇得出街呢啲後果。規矩如果唔襯細路仔仲細個嘅時候去教，越大個就越難教因為佢已經唔再驚你罰佢。