早兩日母親節，唔知大家有無好好陪下自己屋企人呢？呢個post可能傳咗好多次，但真情唔怕舊，睇圖加文字，個心真係會拿住拿住。
（諗起去世既親人）
光陰似箭，自己轉眼由細路變大人，雙親黑髮都轉白髮。老土講句，「樹欲靜而風不止，子欲養而親不在。」，有時真係經歷過，所以好害怕失去
以下係孫女同公公輕鐵車廂對話全文（from fb)，珍惜眼前人！
噚日搭輕鐵，經過青松站。
「公公，做咩咁多人嘅？」
「啲人去拜山囉。」
「拜山？」
「係呀，好似我哋上次去拜姨婆咁囉。」
「姨婆係咪死咗架啦？」
「係呀。」
「係咪唔會再返屋企架啦？」
「係呀。」
「咁你呢？」
「我好老架啦，我都就嚟死架啦！」
「咁邊個湊我返學呀？」
「無人湊你架啦，你自己返學架啦！」
跟住兩公孫靜靜對望咗 15 秒。
細路女突然爆喊 :「公公，你唔好死呀，你唔好死呀，嗚嗚～」
細路女喊聲傳遍成個車廂，由青松站一路喊到兆康站，直至公公話 : 「好啦好啦，我唔死啦。」，細路女先肯收聲。
傻妹，你公公點捨得死呀，佢仲要响以後，當你數學考試唔合格、升唔到第一志願嘅中學、俾朋友杯葛、俾人飛、俾老闆炒、同老公嘈交……嘅時候，好似依家咁幫你抹眼淚的。
發表於 
返回列表
