少年成長今日: 3|主題: 16015

收藏本版

發帖

返回列表

跳至頁

查看: 3115 | 回覆: 0

乜都可以用嚟玩一餐 [複製鏈接]

csir3290

子爵府

積分: 12025

1^#

發表於 19-9-29 11:20 |只看該作者 |倒序瀏覽 |打印

呢兩個星期工作非常之忙，晚晚放咗工返到屋企食完飯都已經八點幾，食完飯就想攤喺張梳化度休息，但係對仔女晚晚一返到屋企就拉住我要陪佢哋玩。就算攤咗喺梳化佢哋都係咁拉住我玩。本來想休息下，但係見到佢哋咁又唔忍心唔陪。近排佢哋玩緊做老師嘅遊戲，成日叫我扮學生又要我扮問問題。但見佢兩個玩得咁開心有陣時幾攰都覺得抵嘅。

講開玩其實佢兩個都幾有創意，小朋友真係唔需要好多玩具，任得佢哋自由發揮佢哋都可以好多嘢玩。佢兩姊弟仲成日都幻想自己開咗間公司，佢兩個係總裁我就係高級顧問，成日都話佢哋間公司研發咗好多新嘅產品，點知原來都係細佬自己用紙好似做勞作咁做出嚟。佢哋玩得最多嘅唔係啲乜嘢玩具，反而係我喺公司攞畀佢哋嘅環保紙。屋企有地方專係畀佢哋放環保紙，佢哋攞啲紙嚟做手工同畫圖畫發揮自己嘅創作力。自從我攞啲環保紙返屋企公，司啲廢紙就多咗個地方可以循環再用。近排佢哋又忽然興起玩學校同埋老師，將屋企所有嘅房門全部都編曬號碼，呢間係電腦室嗰間係美術室，當然佢哋仲有自己嘅校長室添。最搞笑嘅係屋企嘅廚房佢哋話係家政室同埋小賣部。近排晚晚就話要上堂同突擊測驗，成日問我問題有陣時真係畀佢哋激死。

講開玩具其實真係冇乜買玩具，細路仔真係好有創意我屋企好多嘢佢都係自己用紙整出嚟。好似我老婆最近買咗個新手袋，呀仔竟然可以用紙整返個手袋出嚟，用嚟自己玩仲寫埋個牌子。我哋屋企揸車，佢哋自己就用紙整條車匙出嚟真係畀佢兩個激死。但係又真係好欣賞佢哋嘅創意。可能我同我老婆成日都讚佢兩姊弟做啲嘢靚同埋有創意，激發咗佢哋好多嘢都係自己整。尤其是係細佬整啲手工勞作真係越嚟越仔細越嚟越靚。有陣時我都會同佢講唔使買玩具畀你佢哋啦！因為佢哋自己整嗰啲嘢都咁靚。小朋友嘅創意真係天馬行空無法想像，家長只要唔好窒礙佢哋畀多啲讚賞，雖然有時都真係覺得佢哋有啲低能，但係我總係投以欣賞嘅眼光同埋讚賞嘅說話，希望佢哋繼續發揮創意。不過我老婆有一晚突然間同阿仔講，你啲嘢做得咁靚會唔會第時大個會去做紙紮㗎！佢哋咁有創意我哋都好欣賞，不過最大嘅問題係多咗好多紙製嘅玩具。不過幸好佢哋通常玩完兩日就會擺埋一邊再整嗰啲新嘅，咁我哋就要靜雞雞襯佢哋唔知丢咗舊嗰啲如果唔係屋企真係變成一個垃圾崗咁。