少年成長今日: 0|主題: 16014

收藏本版

發帖

返回列表

跳至頁

查看: 3007 | 回覆: 0

時機 [複製鏈接]

csir3290

子爵府

積分: 12023

1^#

發表於 19-10-6 11:29 |只看該作者 |倒序瀏覽 |打印

兩姊弟上兩個星期開始返番全日，所以要留喺學校食飯，由於喺學校時間多咗返到屋企都已經差唔多四點。細佬為咗多啲時間可以玩，所以佢好心急喺學校做曬啲功課。好多時佢喺學校一食完晏就會即刻開始做功課，希望可以做多啲返到屋企嘅時候可以快啲做完多啲時間休息同玩。

有一日放工返到屋企，已經見到細佬好忟憎咁樣做緊數學，咁我問老婆做乜嘢事，原來細佬啲數學做到錯曬，改正都仲係錯，改完又要再改所以佢越改越忟憎。我哋覺得應該係佢好心急咁樣喺學校想做曬啲功課，計得好快但係就唔小心，所以計到錯曬咁滯。嗰次可以話係差唔多要全部做過曬，因為佢真係好多都計錯咗。就算改咗證畀我老婆再睇有啲都仲係錯改咗幾次。我沖完涼出嚟見到佢仲改緊但係就越嚟越忟憎。

其實我當時心諗你做乜要發忟憎喎，因為係佢自己做得心急兼唔小心先做錯曬，媽媽已經用時間幫你睇，但係點解仲要發忟憎。其實我有諗過開聲話佢，但嗰刻我提醒自己唔好開聲住，與期嗰陣時開聲不如等佢改完冷靜落嚟搵個時間先至再同佢講，因為就算嗰陣時話佢，到頭來佢唔開心越做越冇心機仲有排改份功課。後來好快趣佢改完曬，跟住食飯唔知係咪佢擔心我同老婆會話佢頭先發脾氣，所以成餐飯佢都冇乜點出聲好似好唔開心咁。但係佢見食飯之後我哋都冇出聲話過佢，所以食完飯冇耐佢就同家姐喺度玩好似冇事發生咁。但係其實我喺度諗緊搵邊個時間同佢傾返件事。終於到大家睇完書嘅時候，我靜靜地坐埋佢身邊問佢頭先做乜發脾氣。佢唔出聲跟住我問佢係咪因為改完又改覺得好煩佢就開始有少少眼淚然之後點頭。終於我同佢講我話其實好欣賞佢懂得運用時間，唔會浪費時間想快啲做完功課，但係做得唔小心反而用返更多嘅時間去改正，其實咁樣仲唔抵。我話你越想咁快計曬啲數學功課但係就越容易做錯，咁不如試吓做咗其他功課先，然之後先慢慢攞本草稿簿出嚟計，小心計清楚啲數，慳番啲改正時間仲好。講完佢冇答我我亦都冇再跟進跟住佢又同家姐繼續再玩。

到咗第二日我放工返到屋企，老婆已經幫佢哋睇完曬啲功課，阿仔同家姐又玩緊。點知阿仔走埋嚟同我講話佢今日啲數計啱咗好多，我問老婆佢啲功課點，佢話今日啲數真係計啱咗好多，跟住阿仔仲同我講話因為佢聽我哋講帶咗本草稿簿返學校好小心咁計。咁我當然讚佢啦咁佢又好開心咁繼續玩。

之後我自己諗，好彩琴日自己都沉得住氣唔出聲話佢，家長好多時就係心急見到小朋友一有少少問題就出聲話，希望可以立即解決問題。但我總係會提醒自己小朋友總係有自己嘅想法，未必一定會跟我哋嘅諗法去做，但係佢要知道唔同選擇嘅後果。正如今次佢做得快但係唔小心嘅後果就係要用更多時間去改正，其實佢已經汲取咗教訓再鬧亦都未必有意思反而仲令到大家嘅關係唔好。