少年成長今日: 0|主題: 16046

收藏本版

發帖

返回列表

跳至頁

查看: 3033 | 回覆: 0

疫情中的天倫 [複製鏈接]

csir3290

子爵府

積分: 12206

1^#

發表於 20-2-16 12:09 |只看該作者 |倒序瀏覽 |打印

呢兩個禮拜留喺屋企嘅時間多咗好多。喺屋企睇新聞不停都係講住抗疫嘅情況，由屋企望出去條街好冷清，我老婆亦都係高度戒備。日日喺屋企就好似自我隔離一樣。對我哋呢啲經歷過沙士嘅人嚟講而家就好似重複返當年嘅情況一樣。至於阿仔阿女開頭一聽到停課唔使返學當然好開心，但係放多咗假之後又冇得出街又冇得四圍去玩，佢哋都開始有啲悶，連細佬都話開始掛住學校。成個社會嘅氣氛都好似好沉鬱好唔開心咁。

但係正正喺呢啲咁唔開心嘅情緒入面，我哋都要向積極方面去諗。起碼而家我同老婆都要大部分時間留喺屋企做嘢唔使返公司，相比起以前日日朝頭早出咗門口，放咗工要六七點先至返到嚟見到對仔女而家真係多咗好多時間同佢哋相處。而家每一日都好有規律咁，每朝早起咗身食咗早餐就安排佢兩姊弟做啲練習，唔識嘅嘢教返佢哋。佢哋做練習時我哋就做公司嘅嘢，連食晏都一齊喺屋企食，到咗下晝就可以一齊傾偈一齊玩一齊睇電視，確實比以往多咗好多時間相處。雖然咁多時間喺屋企，但係幸好阿仔阿女從來都唔鍾意揸住啲手機呀電腦咁，我同老婆除咗做公司嘢之外都盡量會將部手機放低。所以其實多咗好多時間溝通增大家之間嘅感情。呢件事對好多家庭嚟講反而係大家用多啲時間相處。唔好話再話冇時間溝通，而係大家有冇心去溝通。唔好再話唔知講乜嘢，咁多時間喺間屋入面其實乜嘢都可以講，唔好再話冇時間陪啲仔女玩，咁長時間喺間屋入面，只要唔好成日拎住部電話唔好成日顧住睇電視，其實好多嘢都要同啲仔女一齊玩。雖然疫情大家都唔想，但係亦都令到大家可以有多啲時間共享天倫提升家庭嘅抗逆力。盡力去享受平時可能冇咁多時間享受嘅家庭樂。呢段時間入面，我哋一家嘅感情可以再緊密一啲。而家每日都有時間一齊睇書，玩同傾計，呀仔呀女每晚都有時間挨住我一齊睇電視。善用呢段時間去提升家庭關係吧！