少年成長今日: 0|主題: 16012

收藏本版

發帖

返回列表

跳至頁

查看: 4292 | 回覆: 4

負面情緒 [複製鏈接]

csir3290

子爵府

積分: 11997

1^#

發表於 20-5-31 11:25 |只看該作者 |倒序瀏覽 |打印

之前都曾經講過我個仔係一個感情豐富嘅細路，佢好關顧人哋嘅感受亦都好有同理心，佢唔係特別易喊，不過就好容易受感動。

早兩日同佢一齊喺屋企睇戲，其實嗰套一套戰爭片，佢興趣唔係好大，所以佢都唔係睇得好留心。但係睇睇吓，本來佢喺度自己玩緊又唔係好留心咁睇，但係突然間就沖咗埋去攬住媽媽跟住就喺度喊。原來嗰陣時劇情就係啱啱講到其中一個士兵好辛苦咁行咗好遠諗住完成任務，但係中途畀人發現仲死咗，佢個同伴就喺側邊不停為佢急救。就係為咗呢段劇情佢突然間喊左一輪。

除此之外有陣時睇呀仔睇戲或者睇電視嘅表現仲好睇過原本劇情嘅內容。我哋發覺阿仔成日睇睇吓電視就會喺電視機前面好緊張咁喺度跳，原來阿仔好容易受到劇情入面角色遭遇嘅影響，好容易就好緊張佢喺度跳其實際表達緊佢好緊張嘅心情。琴日同佢打打下羽毛球一個唔覺意我殺波打中咗佢，可能佢真係痛，但係佢又唔係鬧人又唔係發脾氣跟住又係衝埋嚟攬住你，隻眼濕濕喊咗一陣。

可能有啲人會覺得男仔唔應該易喊，男仔喊可能會畀人覺得唔夠硬淨，但係其實我又覺得冇乜所謂，講真每個人都應該可以表達自己嘅情緒而喊都係其中一種抒發自己情緒嘅表現，所以阿仔從來喊我哋都係攬住佢畀佢舒發曬唔會講啲乜嘢說話。可能阿仔就係咁自細就習慣咗可以暢快感去宣洩自己嘅情緒，所以通常我哋攬住佢一陣一路拍住佢佢好快就會冇事。我哋唔想細路仔覺得喊係一件唔好嘅事，然之後將自己嘅情緒收埋壓抑咗喺心入面，慢慢呢啲負面情緒只係堆積喺個心入面，其實對佢嚟講都唔會係好嘅影響。白細畀佢知道喊都係其中一種情緒嘅表現，冇乜嘢值得好怕，反而對佢嘅身心發展可能仲有好嘅影響。

我哋從來都唔擔心阿仔變成一個易喊或者唔夠堅強嘅小朋友，反而強忍住只不過係代表咗佢嘗試壓抑自己嘅情緒將啲嘢收埋。我哋會好分到究竟阿仔嘅喊係發脾氣，想攞嚟控制大人手段嘅喊定係遇到一啲負面情緒想宣洩嘅喊。如果係前者當然唔會畀佢得逞，亦都會畀佢知道喊係冇用，不過幸好呀仔自細嘅教導佢好少甚至乎唔會咁做，因為佢知道咁樣做係冇用反而平心靜氣同我哋講可能仲有用。如果係後者我哋從來都唔會叫佢唔好喊，只係會攬住佢等佢慢慢收聲，宣洩完好快就會冇事。不過可能佢始終都係男仔同埋開始大個，所以佢都會知道唔會喊到好大聲，通常都係攬住我哋流眼淚同埋索鼻。我哋希望阿仔係一個懂得表達自己情緒，積極而正面嘅人。唔會因為一啲傳統嘅諗法或者男仔應有嘅形像已變成一個收埋自己情緒嘅人。