少年成長今日: 1|主題: 16076

收藏本版

發帖

返回列表

跳至頁

查看: 4148 | 回覆: 1

吸煙家長 [複製鏈接]

csir3290

子爵府

積分: 12354

1^#

發表於 20-7-26 11:26 |只看該作者 |倒序瀏覽 |打印

我全家都冇人食煙，亦都唔鍾意人食煙，所以兩個細路自細就已經接受食煙對身體唔好亦都搞到全身都有煙味好臭呢一個概念。當然我唔係話食煙嘅就唔係好人，只不過我哋唔鍾意人食煙咁解啫。嗰陣煙味真係好影響人，尤其是而家疫情之下，仲見到有啲人除咗個口罩一路行街一路食煙，我哋全家都好討厭呢啲咁嘅行為。

點解無端端講食煙，因為早幾日同對仔女行過公園啲球場就見到有堆細路成班人叼住支煙喺度傾計仲粗口爛舌，望埋去有啲可能得10歲11歲咁細個，好多行過嘅街坊都眼望望佢哋。對我對仔女嚟講就更加奇怪點解咁細個會食煙。其實就係好似我之前講過，呢啲咪就係喺朋友身上尋找認同，當細路仔身邊嘅朋友都係咁樣做嘅時候，佢要同班朋友一齊就冇辦法唔做同樣嘅嘢。講真我自己細個都遇過呢啲朋友，亦都真係試過有朋友攞支煙埋嚟畀我，嗰陣時同我講話咁friend請我食，仲同我講話唔係唔夠膽食呀，事實嗰陣時都真係食咗一啖，但係真係好頂唔順嗰陣味勁咳，最記得返屋企嘅時候勁驚俾屋企人會聞到陣味，所以一返到屋企即刻沖涼。好彩只係食咗一啖但係嗰種驚同唔舒服嘅感覺令我自此就冇再試食煙。

除咗朋友之外，另外一個情況就係根本自己父母都食煙。小朋友自細就習慣咗嗰陣煙味，亦都唔會覺得食煙係一件大件事。因為父母都係咁食，唔通父母會同佢哋講話食煙唔好但係自己又食咩。如果真係咁講，就連小朋友都唔父母講大話啦！我喺街都見過唔少次啲父母係啲細路仔面前都係咁食煙，我真係好唔明啲父母點解明知食煙對身體唔好尤其是啲二手煙都仲要係啲細路面前食。最慘仲要返到學校所有老師都話畀佢聽吸煙危害健康，而且喺佢哋咁細個嘅年紀都食煙嘅人都好少會係好學生，所以對啲細路嚟講真係好難明點解學校教食煙唔啱又唔健康，但返到屋企見到嘅又係另外一件事。再者，如果家企人食煙，細路仔啲物品吸晒煙味，番到學校俾啲同學仔聞到，啲同學仔會點諗呢？更加重要嘅就係如果屋企人食煙亦都唔覺得食煙係一件大件事嘅時候，其實係降低咗細路仔抗拒食煙呢一個防衛意識，都係嗰句食煙唔係壞人，但係最慘一樣嘢就係喺細路仔十幾歲就會食煙同埋一齊去玩嘅人會係啲咩人呢？作為家長係咪真係放心自己嘅細路仔同埋呢一啲嘅朋友去玩呢？

另一方面如果畀學校發現到個細路仔食煙，通知家長嘅時候，個家長要點面對呢？點樣教個細路仔先至啱呢？係咪真係同老師講話係呀我知個仔食煙，我覺得食煙冇問題呢？如果要配合學校同個細路仔講食煙唔好甚至乎要罰。咁係咪又喺個細路仔面前講大話呢？因為自己都不停食煙咁點解對身體唔好又要食呢！我諗食煙嘅父母知道自己嘅仔女食煙，可能未必會好似我哋呢啲唔食煙嘅父母咁，咁在意要教佢哋或者係覺得係一件好大件事，講到最尾可能食煙未必係最擔心嘅，最擔心嘅反而係究竟點解佢會群到一班食煙嘅朋友而班朋友對自己嘅仔女究竟有幾大影響先至係最重要。我好相信一句說話就係話物以類聚人以群分，十一二歲開始或者年紀更細就開始食煙，我相信唔會係喺屋企開始，咁細個群呢一啲嘅朋友對細路仔日後嘅發展會係點先至係最大嘅問題。為細路仔著想，如果家長自己都食煙盡快戒煙啦。