少年成長今日: 0|主題: 16075

收藏本版

發帖

返回列表

跳至頁

查看: 3576 | 回覆: 3

細佬話要開畫展 [複製鏈接]

csir3290

子爵府

積分: 12347

1^#

發表於 20-7-12 10:55 |只看該作者 |倒序瀏覽 |打印

琴日家姐同細佬學完畫畫學完琴返到屋企，兩姊弟又入咗房喺度傾計，原來佢兩個攞咗細佬啲舊畫簿出嚟欣賞細佬啲舊作，睇睇下細佬突然間同家姐講，佢話下星期佢會學油畫，仲係會有畫框鑲住嗰啲，佢同家姐講話佢畫好啲，之後仲會攞埋佢啲舊畫去開畫展，仲話要收入場券添，因為佢話收咗入場券就賺到啲錢，跟住就可以買生日禮物畀家姐，因為家姐下個月生日。雖然明知佢係講假，但係由簡單嘅對話入面就知道細佬對家姐真係好好。

佢兩姊弟自細嘅感情都好，其中一個好主要原因就係佢哋嘅年紀唔係相差好遠，嗰陣時同老婆諗住橫掂都係要湊，一次過辛苦好過分開嚟辛苦，所以就決定生完家姐冇耐就生細佬。其實一路都計劃住會生兩個，因為始終怕得一個將來到佢哋長大嘅時候會寂寞，所以佢兩個未出世嘅時候我哋已經開始諗第時點樣培養佢哋感情，因為佢哋將來需要互相扶持同埋陪伴。其中我哋就覺得要佢哋嘅年紀唔好相差太遠，如果唔係根本就唔能夠一齊玩，因為我哋相信可以一齊玩其實係培養感情好重要嘅其中一個元素。除咗可以一齊玩之外，好多時兄弟姊妹都會係大家為競爭對手，爭取爸爸媽媽嘅愛同埋資源，所以自細就要幫佢哋掃除呢啲諗法，我同老婆時刻都要提住自己盡量要做到公平，一定唔可以因為想簡單解決問題就用乜嘢大要讓細或者細要讓大呢啲諗法。如果爭嘢玩個結果就係要一齊冇得玩，只有合作同埋分享先至可以令到大家一齊都有得玩。另外，仲要教佢哋互相欣賞，只有懂得互相欣賞先至唔會互相妒忌。從小處開始，只要能夠見到佢哋互相幫助互相分享或者互相稱讚，就算幾細嘅事都好都要放大嚟讚賞佢哋，等佢哋知道爸爸媽媽欣賞佢哋呢啲嘅行為同埋價值觀。仲要成日製造好多機會畀佢哋一齊傾偈一齊玩互相了解多啲，要培養佢哋兩個嘅感情，唔係由佢哋自由發展就可以，係真係需要計劃同埋按部就班去做。

其實兄弟姊妹之間感情出現問題，好多時都會同父母唔為意嘅小事開始，慢慢累積落嚟造成佢哋互相妒忌互相競爭或者越嚟越唔鍾意對方，所以父母唔好以為兄弟姊妹相處只係靠緣份就得，好多時都係要睇父母點樣去造就佢兩個，同埋點樣培養佢哋嘅感情。