少年成長今日: 2|主題: 16013

收藏本版

發帖

返回列表

跳至頁

查看: 5680 | 回覆: 0

面試 [複製鏈接]

csir3290

子爵府

積分: 12004

1^#

發表於 20-12-6 11:09 |只看該作者 |倒序瀏覽 |打印

阿女呢輪陸陸續續都開始要去啲學校面試，嗰日我老婆專登搵咗啲面試時經常會問嘅題目返嚟，開始叫阿女諗下同埋準備定啲答案。嗰日我食完飯見到阿女揸住本筆記簿喺度睇緊嗰啲題目同諗答案，嗰日我先至發覺阿女係好認真去諗，佢每一條都好似作文咁諗住作好曬啲答案先。但係其實我同佢講雖然咁有準備係好，但係咁多條題目好難每一條都好似作文咁長篇大論諗好曬啲答案。幸好我同老婆喺公司都間唔中會見下啲新人同面試，所以喺呢個時候就將我哋啲經驗講下畀阿女聽。我哋同阿女講其實面試技巧最重要嘅係喺有限嘅時間入面講到重點。

我同我老婆都話，我哋面試嘅時候最怕就係見到啲年輕人叫佢介紹自己，但係講完自己叫乜嘢名，大約有啲咩工作經驗之後，佢哋就開始冇嘢講，我哋發覺而家好多時啲年輕人都唔係好識得表達自己，唔知係咪真係同佢哋經常用手機有關。如果連介紹自己都表達得唔好通常面試都唔會過到關。所以我哋教阿女如果係要介紹自己嘅，一定要事先諗定兩三個重點然之後去發揮，唔可以就咁講完自己幾多歲叫乜嘢名讀幾年班喺邊間學校讀書就算，其實最好係可以講到自己一啲性格上面嘅特質，因為有陣時啲考官就係想睇下你有幾了解自己同埋個表達能力清唔清晰。我叫佢唔需要每條題目都長篇大論咁樣去預備，反而佢應該諗定每一條題目嘅一啲重點，然之後點樣喺呢啲重點度發揮，我亦都叫佢有幾類題目一定要預備定先，因為啲學校通常都會問除咗介紹自己之外，仲會問你鍾意參加乜嘢課外活動或者你嘅長處係乜缺點係乜，覺得自己邊啲科目特別叻或者邊啲科目特別困難，又或者係點解想入佢哋間學校。呢啲都係啲好大路嘅題目我叫佢事先都要諗定，如果遇到啲題目其實佢會搭啲乜嘢重點，因為面試時間通常都係得5至10分鐘最多都係十五分鐘，所以講重點係好緊要。跟住我同老婆就教佢預備好曬呢啲基本嘅重點，當萬一遇到啲問題未預備過嘅時候，就嘗試兜返落去你預備咗嘅重點上面。

跟住我就同阿女講一定要上佢哋學校嘅網頁，仲要唔係上一次，而係要間唔中就要睇了解人哋學校嘅校訓同埋特點，最重要係能夠連繫到點解覺得人哋學校適合自己而自己想入去。總之嗰晚就好似人哋上面試技巧班一樣我同老婆就教阿女點樣同人面試。

不過講到最尾都係要同阿女講面試最緊要係講到嘢，要懂得表達自己千祈唔好問一句答一句或者一句起兩句止。雖然講就好似好易，不過以我同我老婆嘅經驗，要做到上面嘅嘢好似好簡單個個都識講嘢但係其實而家嘅後生仔嚟面試真係好多都唔能夠做到。呢啲表達同埋溝通嘅技巧其實上面試補習班未必即刻可以幫到，反而係家長自細點樣同佢哋傾偈，點樣同佢哋溝通，點樣表達自己先至最容易能夠令到細路仔自細就學到溝通同埋表達技巧。看似容易嘅嘢原來喺而家呢一代嚟講其實已經未必真係咁容易。