少年成長今日: 0|主題: 16067

收藏本版

發帖

返回列表

跳至頁

查看: 7618 | 回覆: 0

唔願見人！ [複製鏈接]

csir3290

子爵府

積分: 12307

1^#

發表於 20-12-20 10:52 |只看該作者 |倒序瀏覽 |打印

上次講開阿仔老師打電話嚟投訴阿仔啲字寫得唔靚，之後呢兩個禮拜阿仔啲字其實都已經寫得好好多。但係發生呢件事嗰日其實我同老婆最大嘅考慮並唔係佢啲字寫得靚唔靚嘅問題，而係佢聽完個電話之後入咗房鎖埋度門唔出嚟，我哋覺得呢件事比起佢寫啲字唔靚問題更大。首先因為佢咁做令到所有人都擔心，尤其是嗰日同老師通咁多次電話，老師咁緊張最主要就係因為擔心佢閂埋度房門唔出嚟喺入面唔知會有啲乜嘢事發生，所以啲老師咁緊張。另外亦都令到我哋兩公婆好緊張唔知佢發生乜嘢事。所以我哋覺得要處理佢啲字唔係大問題，反而要教佢點樣控制自己情緒先至係最大問題。我哋知道佢驚畀人鬧亦都因為老師打電話去屋企佢覺得好醜唔想見人呢兩點我哋都明白，但係佢處理呢件事嘅方法我哋就覺得好有問題，最怕就係佢以為閂埋房門唔出嚟就可以解決咗事情，以後久而久之佢就會咁樣去處理問題令到所有人都擔心。

發生呢件事嗰日我哋兩公婆一返到屋企就已經見到阿仔坐咗喺廳度睇緊書，但係從佢望到我哋嘅眼神我哋就知道其實阿仔當刻鐘係好驚我哋會鬧。我同老婆都冇即刻出聲，因為我哋都知道需要畀少少時間諗清楚點樣講，我哋都想教到阿仔點樣平心定靜氣處理問題。到我哋沖完曬涼玩完曬衫出嚟先至同阿仔傾，問阿仔究竟今日發生乜嘢事，我哋當刻都感覺到阿仔好驚，但係我哋話畀佢聽做錯事就需要面對後果，阿仔一唔一十將件事話畀我哋聽，因為可能見到我哋其實都唔係發緊脾氣亦都唔係鬧緊佢。到講完之後我就問佢知唔知自己有啲乜嘢做錯，佢話啲字寫得唔靚。但係我哋問佢知唔知道點解咁多人都咁擔心，最終我哋同佢講我哋可以接受佢啲字寫得唔靚，因為呢個可以改，同埋我哋經常都提醒佢啲子寫到咁樣遲早會畀老師話，今次老師真係出聲佢就要吸取教訓唔好再有下一次。但係我哋覺得最大嘅問題係發生呢件事之後佢鎖埋自己喺房門入面唔肯出嚟令到所有人都擔心，我哋問佢點解要鎖埋道門，佢話驚畀人鬧亦都唔想家姐問佢乜嘢事因為佢覺得好醜。我同佢講我哋明白佢嘅諗法同感受亦都理解同埋體諒，但係佢呢一個做法就令到所有人都擔心。本來只係字寫得唔好嘅問題，只要以後小心啲就可以解決，但係今次咁樣嘅處理就令到所有人都擔心。佢應承我哋唔會有下次，我哋都再次同佢講，做錯事只要承擔後果，肯去改正其實問題不大。好似今次呢件事咁，其實我哋真係唔會點樣責怪佢啲字寫得唔好，因為呢個後果我哋一早同佢講咗而家真係發生，咁咪要吸取呢一次嘅教訓。但係我話畀佢聽如果佢下一次再係咁樣鎖埋自己喺房門入面邊個都唔理嘅時候，我哋就真係會罰佢，同埋如果下次係咁我哋就需要佢自己打電話畀老師，同佢哋解釋返件事而唔係由我老婆覆電話畀老師講番個情況畀老師聽等老師放心。可能最終我哋都冇好嚴厲咁鬧佢只係解釋畀佢聽，所以好快趣佢就已經可以好容易咁表達佢嘅諗法同埋同我哋去傾，我哋希望佢記住今次嘅教訓唔好再有下一次。

其實成件事我哋最擔心嘅係佢以為閂埋度房門唔理人就可以處理問題，我哋唔想佢逃避責任亦都唔想佢以為令到人擔心人哋就唔會去處理佢做錯嘅嘢，所以教佢處理情緒絕對重要過我教佢點樣寫番靚啲字。如果細個唔教佢點樣處理情緒，當佢越嚟越大個而呢啲做法成咗型之後要改就已經改唔到。點解有啲細路可以用情緒劫持或者威挾父母就係因為父母喺小朋友細時唔處理所致！