我已在5月尾完成人生大事，囡囡已健康出世，襯有時間分享下仁安生b 經過^^
由於我係早上7:30開刀，所以前一晚已經入院（呢一晚係唔計錢的），所以實際喺仁安係住咗五日五夜
前一晚大約8pm 到醫院checkin,估唔到咁夜都咁多人，等左大約半小時，我本身訂標準房，但姑娘話full晒要轉半私家房，只需補差額，所以最後住左新翼半私家房（2人房），新翼的半私家房仲可以母嬰同室，每日12-7pm 可以打比姑娘推bb入房添！
上到去會見一見姑娘做返少少資料確認，同抽血，再聽胎心，到房擺底晒啲野後，已經10點幾，食埋野已經差不多12點，沖完涼就上床訓，但完全訓唔著，好緊張，好驚，好想老公係身邊，咁大個女第一次做手術，最後眼光光到5am左右，就沖多次涼（因為之後有排都無得沖）
大約7am左右，姑娘就入黎睇我換左手術袍未，我老公都換左衫，因為佢會剪臍帶，如果開刀爸爸入手術室要加$1000，搞掂晒就訓上床，姑娘就推我落3樓手術室...
落到去，老公未入得去住，得我入左等候區先，去到呢個時候我忍唔住大聲喊左出黎，真係好驚！但啲姑娘好好，見我喊叫我唔使驚，仲安慰我好快見到bb 啦，等左大約5分鐘，麻醉師嚟咗，佢同我講解左啲風險同程序，就幫我種豆，我之前上網爬文見到話種豆係好痛，我同佢講好驚痛，佢話會幫我先打一針麻醉藥減低痛感先，支針都係打係手背，老實講佢手勢真係好好，我係一個好怕痛嘅人但都唔覺得痛！種完豆後，就推入手術室了，入到去手術室，好凍，見到好多姑娘，姑娘捉實我，因為要曲起身體好似蝦米咁係背脊打麻醉針，印象中前後好似打左兩針，但老實說都唔係好痛的，係藥力注入身體後會感覺好痺咁。期間啲姑娘好好，不停同我講嘢分散我注意力等我唔好咁驚，佢哋問我BB係男定女呀，諗左改咩名未呀...最安心係見到我個醫生，佢真係一個十分好既醫生，由產檢到搵佢開刀，每次都有問必答，仲會成日問候同安慰我，佢同我講話唔使驚，好快見到bb,個心當堂定晒！
好快麻醉藥藥力生效，對腳已無左知覺，個人開始覺得好凍，雖然已經開左兩個暖氣係手既位置但都覺得好凍，同埋個人好震，係不受控制咁狂震，連開口講野都係口震震，麻醉師話係正常反應。姑娘會係頸以下拉起一塊大布，你係完全唔會睇到個開刀過程，呢個時候我老公都入得黎陪我了，佢坐係我個頭旁邊，捉住我隻手，同我閒話家常...過左5-10分鐘左右，醫生話bb就快出來啦，呢個時候麻醉師幫手用力推我個肚，推左幾下我就聽到bb喊聲了，好大聲好大聲，我又忍唔住喊左出黎，我老公都喊左，好快姑娘就叫左我老公去剪臍帶，搞掂後抹乾淨左bb就抱返去我身邊，姑娘幫我地影第一張全家福，係醫院送的
搞掂後老公跟左bb出去，大約10-15分鐘後醫生就話手術完成，之後我就被推返去觀察區，觀察左大約30分鐘，見情況無問題就推返我上房了，上到房個人終於無咁震，大約過多2-3小時對腳回復知覺～
總括來講開刀其實一啲都唔痛，就算麻醉藥過左我都唔覺得痛，我相信大部分原因係醫生手勢好好！就算第2日落床個下，都只係少少痛，係可以忍受既痛，只要慢慢行好快就適應到（但一定一定要搵人扶住先好落床行！
因為頭一日無落過床行第2日一落床個下頭真係會暈）
bkcherine 發表於 19-6-15 18:31
太好啦，有預算，我來緊落訂喇，我會約38w4，吾知會吾會早左作動生，請問你係幾週開呀？到時爸爸係咪每日只 ...
發表於 
請問係邊個醫生呀
返回列表
