少年成長今日: 0|主題: 16018

收藏本版

發帖

返回列表

跳至頁

查看: 11755 | 回覆: 0

取悅小朋友！ [複製鏈接]

csir3290

子爵府

積分: 12051

1^#

發表於 21-5-9 10:58 |只看該作者 |倒序瀏覽 |打印

早兩日睇啲網上新聞見到有個老人家因為個孫仔畀隻狗吠而嚇親，所以就用腳不停咁踢隻狗，目的係幫個孫仔報仇同埋等個孫仔開心返。

之前都睇過有啲機構嘅調查，關於老人家同孫仔孫女嘅關係，調查發現普遍嘅老人家都係有溺愛孫仔孫女嘅傾向。我哋平時其實都唔難見到呢個情況，啲老人家為咗氹啲孫仔孫女笑，可以話係無所不用其技，務求令佢哋笑得開心。只要孫仔孫女開心差唔多乜嘢都會應承。就以我自己為例，自己阿爸阿媽細個嘅時候對自己幾嚴厲都好，一對住啲孫仔孫女就好似變咗第二個人咁。連我自己都話點解佢哋以前細個唔係咁對我哋。唔怪得啲人成日都話仔女呀攞嚟教嘅，孫仔孫女就攞呢種縱嘅。

不過呢個亦難怪，因為好多時老人家都唔係成日見到自己個孫仔孫女，所以見到佢哋嘅時候就好似嗒糖一樣想佢哋開心相佢哋笑。其實唔只老人家，呢一代就算父母可能都係為咗令到自己嘅細路仔開心，好多時都變成咗順從自己嘅細路仔，甚至乎達到為咗取悅佢哋嘅地步好多嘢都可以應承。好多時為咗遷就個細路仔，只要個細路仔提出要求好大人都會答應，為咗唔想細路仔發脾氣，好多時都會遷就佢哋。我唔係話要令個細路仔開心係有錯，但係大人有冇考慮過其實個社會係唔會咁遷就個細路仔呢！如果細路仔自細已經習慣咗圍住佢身邊嘅大人都係咁遷就佢，到佢一路長大佢就會越嚟越難去適應呢個社會，因為個社會唔會好似佢身邊嘅大人咁不停咁去遷就佢。

我成日都話要正面鼓勵啲細路仔但係唔代表只有稱讚，正面鼓勵唔代表佢哋凡事都係啱只有讚冇彈，除咗正面鼓勵之外亦都要教識細路仔學懂接受失敗，妥協同埋要尊重規矩。身邊嘅大人唔應該為咗取悅佢哋，令佢哋笑同令佢哋開心就忘記咗要教佢哋喺成長中必須要學習接受失敗，承擔責任同埋守規矩。如果不停只係為咗取悅小朋友令佢哋開心，可能喺佢哋年幼嘅時候佢哋真係會開心，但係當佢哋越嚟越成長只會越嚟越唔開心，總之正面鼓勵同取悅係有分別，除咗用讚之外亦都要教佢哋用正面嘅想法去面對失敗，接受失敗同埋承擔責任。