少年成長今日: 0|主題: 16053

收藏本版

發帖

返回列表

跳至頁

查看: 8055 | 回覆: 0

不明所以 [複製鏈接]

csir3290

子爵府

積分: 12230

1^#

發表於 21-1-3 10:53 |只看該作者 |倒序瀏覽 |打印

呢兩個禮拜我聽到同睇到兩件我自己覺得做父母都覺得匪夷所思嘅事，首先係早兩日睇新聞睇到啲人去大棠睇楓葉嘅情況，睇新聞嘅畫面真係人多過旺角，當然亦影到有啲人好冇公德心除咗口罩影相之餘仲，重破壞嗰度嘅自然環境。但其中最令我印象深刻嘅反而係訪問一個小朋友，個記者問佢點解嚟行山，個小朋友竟然唔係話要睇紅葉而係對住鏡頭講話係因為爸爸話行完山會畀40蚊佢，佢為咗攞嗰40蚊所以就嚟行山。我相信個細路仔應該係講真嘅，但係我真係覺得好奇怪點解會父母會用錢嚟獎勵細路仔去行山呢！究竟係咪父母太早畀個細路仔接觸手機所以佢成日顧住玩手機連陪父母出街去行山都唔肯呢？所以要用錢嚟令到個細路仔肯陪自己出嚟。今次40蚊咁下次要幾多錢先至得呢！可能有父母會覺得只不過係小小嘅獎勵有乜所謂呢！但咁樣又教緊細路仔一個乜嘢價值觀呢！對唔住可能我真係太老土真係諗唔明呢一個係乜嘢邏輯或者係乜嘢教細路仔嘅方法呢！

第二件我聽到都覺得有啲匪夷所思嘅事就係嗰日同我教書嘅朋友傾開電話，佢當然又係繼續呻上網課好辛苦成效又唔高，但係今次佢講覺得自己好無辜，因為打電話去畀家長仲要畀家長鬧。事源佢嗰班有個細路仔經常唔上網課，功課又交唔到，咁我個friend自然就要打電話去同個細路嘅家長講，佢話大部分嘅家長遇到呢啲情況通常都會好合作，雖然未必有能力管到個仔，但係都總算仲會尊重老師，明白老師打電話嚟都係提醒都係為咗自己個細路仔好。但係佢話呢一個家長就真係過份，因為可能佢個仔經常唔上網課，所以我個friend唔係第一個打電話去嘅老師，個家長一接個電話就已經開始鬧我個friend，因為可能佢認得係學校電話，佢同我個friend講叫佢唔好再打電話嚟阻住佢搵食，仲夠膽死同我個friend講佢個仔上堂唔上堂係老師嘅責任點解要成日煩住佢。我個friend雖然畀佢鬧到一面屁，但係都仲係要解釋畀佢聽，最後仲畀呢個家長cut咗線。我個friend當然好唔開心啦！原來你以為為個細路仔好，但係原來有陣時啲家長唔係咁諗。雖然我都替我個friend唔抵，但係都冇乜嘢可以幫到佢。佢話齋唔知幾時開始份工要包埋畀人鬧。我都唔明呢啲家長點諗，係咪淨係生個細路出嚟就得其他嘢唔關佢事呢！我明白你要搵食，但係人哋打嚟都係一番好意提醒你個仔上堂嘅情況，都係為你個仔好咁做乜要鬧人呢。最慘就係當呢啲家長都發覺自己個仔又升唔到班又做唔到嘢嘅時候就怪學校唔通知佢。今時今日做老師已經唔同咗我哋細個做老師嗰個年代。更重要嘅係有部分家長識生唔識教咁生嚟做乜呢害人害己！做老師嘅就更慘，乜嘢都關佢哋事！