少年成長今日: 0|主題: 15998

收藏本版

發帖

返回列表

跳至頁

查看: 10883 | 回覆: 0

家長也作弊 [複製鏈接]

csir3290

子爵府

積分: 11877

1^#

發表於 21-3-21 10:46 |只看該作者 |倒序瀏覽 |打印

呢輪阿女要面試，梗係要請教下啲做老師嘅朋友啦，尤其是係呢輪嘅面試通常都係用zoom做網上面試。點知講下講下就變成我啲朋友講畀我聽好多關於網上面試嘅千奇百趣事俾我聽。佢哋話自從網上面試之後，好多家長以為隔住個熒幕老師唔知道啲家長會幫手，所以好多家長都驚死蝕底咁，一路面試就一路坐喺個螢光幕後面幫個細路仔。我啲friend話啲家長咁樣做根本只係越幫越忙，因為喺面試咁短時間入面啲細路又要顧住聽問題，仲要睇住個家長點樣幫佢，根本佢哋就只會越嚟越亂。同埋而家啲學校老師都好醒目知道可能有啲家長會幫，所以佢哋都會將個面試時間做短啲，仲會留心住個細路仔隻眼望邊度，我啲朋友講佢哋咁有經驗，所以通常都會睇得出邊啲細路係家長坐喺個螢幕後面一路睇住佢哋或者幫佢哋，通常一遇到呢啲情況嗰啲嘅細路仔通常都唔會入選。所以我啲朋友話啲家長以為幫緊個細路其實反而害咗佢，要幫嘅應該平時幫佢哋準備定而唔係一路面試嘅時候先至一路幫佢。
講開啲家長幫我啲朋友話佢哋學校試過喺網上考試，嗰啲家長先至幫得緊要。啲老師根本就知道啲家長幫個細路仔一齊作弊，越係名校就越多呢啲家長出現。佢哋嘅心態就係諗住可能其他家長都會咁做所以自己唔做就會好蝕底，如果唔係其他小朋友高分自己嘅仔女就會變得被比下去。其中試過有朋友學校網上考試，但就驚佢哋上網嘅時候攞唔到份試卷，所以就一早將啲試卷封好口派咗畀啲家長先，千叮萬囑提醒啲家長要到考試嗰日先至開嗰科嘅試卷出嚟俾啲小朋友做。本來大家都講個信字，但係終於有家長係啲群組度講返出嚟，仲問其他家長啲題目應該點做。有其他家長睇唔過眼同學校講返，但係學校又冇真憑實據最後都係無可奈何。又試過有另一間學校嘅家長一路考試就一路喺螢幕以外幫啲仔女搵答案。千奇百趣乜嘢方法都有，但係學校就係搵唔到真憑實據所以無可奈何。連我老婆都曾經話過阿女考嗰間學校要網上面試實會有啲家長幫手，但係其實我老婆話諗深一層根本只會越幫越忙要幫嘅反而係平日幫佢做預備工作。

香港成日話求學不是求分數，但係個教育制度就係咁扭曲，有啲家長把口就成日話要教啲細路仔誠實有責任感，但係去到呢啲時刻就公然教啲細路仔作弊，其實呢啲家長究竟知唔知醜嘅呢，點樣面對自己嘅細路仔呢！仲好似好理直氣壯咁話個個都係咁做自己唔做好蝕底，如果我係細路仔，要接受呢套教育真係會精神分裂！今次你咁樣幫到個細路仔將來你又點樣幫佢呢？係咪次次都會網上考試，係咪次次都有機會畀你咁樣作弊呢？係咪教緊個細路仔冇人睇到就可以唔守規矩呢！越係名校就越多呢啲情況發生又代表咗啲咩呢！呢啲家長以為而家著數咗，但係最終都係害人害己仲會害埋個細路仔！