少年成長今日: 1|主題: 15999

收藏本版

發帖

返回列表

跳至頁

查看: 10147 | 回覆: 0

越幫越忙 [複製鏈接]

csir3290

子爵府

積分: 11890

1^#

發表於 21-3-14 10:33 |只看該作者 |倒序瀏覽 |打印

之前曾經講過網絡欺凌，要幫細路仔自細開始學習處理網絡欺凌，家長嘅角色其實係最重要，當然我唔係話如果出現網絡欺凌嘅時候，家長要立即加埋一齊落去喺個網絡上面一齊鬧，係要鬧到贏為止，我覺得呢個唔係一個合理嘅處理方法。家長嘅角色應該係教佢哋點樣去合理哋處理網絡欺凌事件。

我認為網絡欺凌只要嚟自兩樣嘢，第一可能係大家都喺網絡上面發表言論，甚至係雙方本身都係朋友，但係因為唔同意大家講嘅嘢而鬧咗交，最後演變成為喺網上面互相攻擊，甚至演變成為可能一方人多一方人小而鬧到冇聲出。呢一種欺凌其實好多時都係嚟自雙方互相鬧交，所以可能大家喺網上面都講咗一啲唔合適嘅說話，而且好多時都會牽涉到各自身邊嘅其他朋友要幫手而沒完沒了咁落去。呢種情況演變落去嘅結果就係到其中一方忍唔住可能係向家長或者係向老師求助，大多數嘅時候喺求助時又會隱藏咗自己曾經講嘅說話，淨係講自己喺網上面畀人蝦，家長遇到呢啲情況都未必會去詳細了解淨係知道自己嘅仔女畀人喺網上面欺凌，但係呢一種鬧交其實唔會無端端發生，搵成人幫手嗰邊就只覺得自己係受害者要另外一方認錯或者受罰。咁我覺得如果係咁嘅情況根本只係沒完沒了，因為對方都會覺得自己係受害者唔係自己錯曬。所以我覺得家長應該係幫自己嘅仔女認識成件事，了解成件事嘅發生原因而唔係只係覺得對方錯曬，處理呢一種鬧交形式嘅欺凌更加重要嘅其實係雙方和解。因為如果唔和解其實只係暫時處理咗表面嘅問題，但因為各自心中尤其是係被罰嘅一方其實佢根本就唔服氣，因為佢唔覺得自己錯曬，可能到件事放淡咗之後呢一種欺凌又會繼續嚟過，所以唯有雙方能夠和解件事先至能夠真正解決。

要令雙方和解，首先就要令到各自都了解到自己喺件事嘅責任，唔可以先入為主覺得舉報呢件事嘅就係受害者。所以要教自己嘅仔女首先停止網上面嘅爭論，然後家長要幫佢分析成件事，最後可能透過老師安排雙方和解。最怕就係有啲家長一聽到自己嘅仔女可能喺網上面畀人哋蝦或者欺凌，就好衝動感覺得自己嘅仔女一定係啱曬，只係教仔女點樣可以贏甚至乎自己出面去鬧對方。其實呢啲網上面嘅爭論根本就唔會無端端發生，如果家長唔識得處理反而最好就係通知學校老師，由學校老師去處理。家長亦都要知道其實最好嘅處理方法係雙方和解而唔係話對方一定要受罰，如果擔心自己仔女被人網上欺凌就要自細教仔女點樣合你去處理呢啲爭拗，同埋教佢哋當遇到呢啲情況嘅時候要盡早向家長或者老師求助。如果家長唔能夠冷靜合理地處理件事，到頭來效果只會適得其反，而且會越幫越忙。