少年成長今日: 4|主題: 16041

收藏本版

發帖

返回列表

跳至頁

查看: 16348 | 回覆: 2

學中文都難 [複製鏈接]

csir3290

子爵府

積分: 12187

1^#

發表於 22-5-29 11:34 |只看該作者 |倒序瀏覽 |打印

之前提過學英文困難，但係其實我覺得學中文都一樣咁難，淨係睇下幫阿仔阿女睇功課就已經知道。佢哋其他科嘅成績都算唔錯，唯獨是中文雖然未至於唔合格，但亦都唔算係高分，真係都唔知點樣先至可以令佢哋進步。

同佢哋溫默書都仲好啲，因為有曬範圍仲只係講緊啲字寫得啱定錯，但係去到測驗考試就真係唔知點幫佢哋溫，其實平時都已經有做開練習，但係一到測驗考試嘅時候就硬係唔能夠應用返出嚟。老師又唔會照出作業入面嘅題目，所以就算背曬入面啲內容都幫助不大。

其實歸根究底我都覺得係應用嘅問題，雖然我哋平時已經用中文，但係對於細路仔嚟講佢哋都係講廣東話，平時喺我哋嘅生活入面佢哋比較少注意文法或者其他方面嘅應用。但係佢哋測驗考試就成日問句式作句填充之類，所以真係唔知點幫佢哋溫習。後來同老師傾下又總括我自己讀書嘅經驗，發覺其實係需要應用，所以而家嘗試下轉換個方式唔再要佢做啲補充練習，反而係要細佬每日寫一段短文，一百字以內講下佢想講嘅嘢。開頭佢都唔知點做，但係寫下寫下其實佢都開始習慣，透過每日嘅寫作可以訓練到佢諗題才嘅能力，亦都可以睇到佢運用中文嘅能力，開頭寫嘅時候會發覺佢有陣時啲文句唔係好通順，亦都係嚟嚟去去都係嗰啲用詞，但係慢慢寫下越嚟越多，真係發覺佢用詞方面同埋句式方面都係有進步，而且諗題材方面因為我叫佢用返佢日常嘅生活或者佢想寫嘅嘢，所以越嚟越唔成問題。希望透過多寫，尤其是係應用方面嘅訓練可以令到佢嘅中文有進步。其實家姐當年都有用呢個方法，不過同家姐嘅唔同係家姐當年係我每個禮拜諗一個作文嘅題目畀佢，要佢用一個禮拜時間，首先用一日寫作大綱，然後每日寫一段仔用一個禮拜就作好一篇文章。但係後來發覺諗題目其實係好難，所以當年家姐係買咗好多作文嘅補充練習，雖然跟住啲補充練習作，家姐都可以應付到，但係有啲嘅文章其實家姐寫得唔係幾好，因為同佢哋嘅生活無關。但家姐透過每個禮拜做一篇文章，其實佢喺寫作方面係真係有進步，到而家讀中學，我根本完全唔使理佢作文方面嘅情況。所以細佬而家我就唔用作文嘅補充練習，反而叫佢每日諗一啲自己想寫嘅話題希望訓練佢寫作嘅創作能力。而且每日寫一百幾十字其實好似寫日記咁，對佢嚟講亦都唔會太大壓力。我嘅諗法係而家佢已經五年班，作文嘅比重越嚟越重要。只要文章作得好，其實可以喺其他中文試卷方面拉番啲分。

另一方面家姐雖然已經唔使點擔心，但係上到中學其實佢又面對另一個問題就係「文言文」，真係我覺得好難搞，平時白話文已經難更何況係文言文，因為平時根本就唔會接觸，家姐有陣時問我，我都只能係盡量幫佢同佢一齊上網查吓資料。我覺得其實都係應用嘅問題，因為平日接觸得少，所以根本就好難理解文言文入面所用嘅字嘅解釋。所以最後都係走返去最基本嘅方法，諗住畀佢做多啲補充接觸多啲睇多啲，我老婆問佢教書嘅朋友，介紹咗一套幾好用嘅文言文嘅練習，而家要家姐每星期都做兩至三個練習，家姐睇得多咗又真係好似有啲進步又少問咗我哋。其實講真，真係唔知道點樣先至可以幫到佢哋，唯有都係同佢哋解釋要進步就要應用，尤其是學語文係一定需要應用先至可以有進步。咁佢兩個暫時都係跟住而家呢個方法去練習，雖然喺成績上面仲未係見到好大嘅進步，但係我總係相信多做多應用就一定有進步。