少年成長今日: 0|主題: 16109

收藏本版

發帖

返回列表

跳至頁

查看: 12056 | 回覆: 0

點解家姐冇禮物？ [複製鏈接]

csir3290

子爵府

積分: 12562

1^#

發表於 21-6-6 11:21 |只看該作者 |倒序瀏覽 |打印

之前寫過篇文章題目係「點解要獎」。入面講到因為細佬就嚟考完試，咁有日同佢行過模型鋪就買咗盒模型畀佢等佢考完試可以砌。可能我講得唔係咁清楚，所以就可能會令人覺得對家姐有啲唔公平，點解家姐冇得買禮物。

首先嗰日買模型畀細佬根本從來就唔係當係一份禮物，因為我曾經都講過我唔想用一啲實體嘅禮物佢獎勵佢哋好嘅行為，更加唔想用禮物去獎勵佢哋嘅成績，因為我唔想將成績同禮物掛鈎。果次買模型畀細佬其實係一個好平常嘅做法，因為細佬鍾意砌模型，所以間唔中見到啲佢想砌嘅我哋都會買。只不過嗰次係咁啱因為係喺考緊試期間，我哋出街食飯行過模型舖佢見到所以就買咗畀佢，但就提醒佢要考完試先可以砌。其實每一次買嘢都未必一定係兩個都有份買，因為我哋成日都會同佢兩個講唔好為咗買而買，如果真係冇自己喜歡嘅嘢就唔一定要因為另一個有自己就一定要買。事實係嗰次買模型家姐真係冇買到任何嘢。但係咁樣係咪就係唔公平呢？其實我又唔覺得因為公平嘅係佢兩個只要盡力溫習，喺考完試之後都可以有一個星期嘅自由時間。嗰個所謂自由時間，其實就係只要佢哋完成咗學校嘅功課同溫習，就可以做自己鍾意做嘅嘢唔使再有額外嘅練習同補充要做。家姐考完試可以有，細佬考完試亦都可以有，只不過細佬鍾意做嘅嘢就係砌模型咁嗰次咁啱行過見到就買咗畀佢。

而嗰次點解會引起家姐嘅疑問，只不過係因為細佬正在考緊試，家姐奇怪點解考緊試我哋都買模型畀細佬，咁我先至解釋畀家姐聽我哋買呢盒模型唔係因為當做禮物獎勵細佬考試嘅成績。正如家姐考完試之後佢鍾意做佢自己嘅嘢，家姐其中一個嗜好就係睇書，尤其是係偵探小說咁因為考試前嗰段溫習嘅時間佢唔係有好多時間睇，所以考完試之後嗰個星期佢就真係出晒力咁睇咗幾本偵探小說，咁買呢啲小說嘅時候其實有啲都係之前買落，家姐揀嘅時候細佬亦都未必一定買到佢鍾意嘅嘢。

可能有人會覺得公平就係兩姊弟一個買嘢另外一個就一定要有，又或者家姐有嘅嘢細佬就一定要有，如果唔係另外一個就會覺得唔公平或者唔開心。其實我覺得公平係要視乎情況，如果乜嘢嘢都要大家一樣而唔考慮其他因素，咁嗰種只不過係「泛公平」。真正嘅公平其實係出自於父母對佢哋嘅愛都係一樣，如果仔女能夠在日常生活入面感受到父母對佢哋嘅愛都係一樣，唔係建基於物質而係情感上面嘅依靠，咁佢哋先至真正能夠做到兄弟姊妹之間唔會互相妒忌能夠互相尊重互相愛錫。

另外，上次我所寫只不過係想提出一個諗法，就係盡量唔好用物質作為誘因，用物質去獎賞一啲父母想要嘅行為。因為物質嘅誘因只會越嚟越細，除非你所提供嘅物質一次比一次豐厚。其實細路仔最在意嘅就係父母嘅認同，同埋父母嘅鼓勵，最好嘅獎賞就係出自於父母嘅口，父母嘅關注同埋愛。如果兄弟姊妹間都一定要做到連買啲嘢都要大家都有，咁先覺得公平，咁似乎連小朋友都係以物質嚟衡量究竟父母外邊個多啲。如果父母唔及早矯正呢啲諗法，到頭來兄弟姊妹間只會係互相競爭多個互相愛錫。