少年成長今日: 0|主題: 16012

收藏本版

發帖

返回列表

跳至頁

查看: 10820 | 回覆: 0

小題大做 [複製鏈接]

csir3290

子爵府

積分: 11997

1^#

發表於 21-5-16 11:29 |只看該作者 |倒序瀏覽 |打印

早幾日細佬傾開學校嘅嘢，佢講到自己調咗位，坐咗近住簿櫃嘅位置所以老師就成日叫佢幫手做嘢，聽得出細佬係好樂意亦都自豪號可以幫到老師手。講下講下佢就講到坐佢前面位嘅同學有啲情緒化，尤其是係畀老師話完之後。咁佢講到有一次佢小息完咗返到班房，同學仔話畀佢聽原來佢前面位嘅同學將佢嘅書枱書包全部推冧曬，咁我問細佬點樣做，細佬話佢都唔知，係啲同學話畀佢聽因為啲同學仔幫佢手執番好曬所有嘢。咁我問佢有冇話畀老師聽佢又話冇，咁之後細佬又講到因為佢坐正喺嗰個同學嘅後面，所以有陣時個位同學都幾騷擾佢，例如啲嘢唔肯傳落去畀佢或者成日撞佢張枱。做家長聽到咁，自自然然就會擔心細佬係咪畀同學欺凌，但係聽細佬講出嚟嘅時候，佢講得好輕鬆又唔覺得有特別唔開心，佢仲話個同學成日都係咁佢都習慣。既然係咁我哋同細佬講下次如果佢真係發脾氣整到你嘅時候就你一定要同老師講。

點知，夜晚臨瞓嘅時候我老婆同我講問我使唔使同佢老師講下，咁我話細佬又唔似特別情緒有問題，如果咁快同老師講咁老師一定會處理，會唔會仲容易影響咗佢同學之間嘅關係呢，如果嗰個同學因為老師話完佢更加針對細佬，咁細佬可能仲會唔開心，而且正如細佬講，個同學亦都唔係特別針對佢只不過係因為情緒化，而細佬又坐咗喺佢後面所以先至會發生呢啲事情。而且我都覺得可能細佬一向個人都比較善良同埋會肯幫助別人，所以可能老師特別安排細佬坐喺佢後面就係照顧下呢個同學，我同老婆講如果細佬真係有唔開心嘅時候一定會同我哋講咁我哋到時先至諗下點樣幫手介入啦。

隔咗冇幾多日細佬返嚟同我哋講話今日學校有人流鼻血，原來就係正正坐佢前面嗰個同學。咁我問細佬點佢話全班都好幫忙，個個都攞啲紙巾出嚟幫佢，細佬仲話佢將成包紙巾畀咗佢然之後仲幫手帶佢去洗手間添。咁順便我哋又再問下個同學仲有冇騷擾到佢，細佬話間唔中囉，不過都習慣咗因為都知道個同學比較情緒化唔係特登整佢。細佬嘅性格就係咁樣，其實佢好善良佢唔會覺得人哋係特登針對佢，當同學遇到有問題嘅時候佢亦都一定主動會幫手，咁既然佢都唔覺得個同學係特別蝦佢，我哋都冇必要特登去幫手。

作為家長當然好唔想聽到自己嘅小朋友喺學校畀人蝦啦，所以一聽到啲類似嘅情況，第一個感覺就係要去立即處理，但有時小朋友都有佢哋自己嘅處理方法，家長只要小心觀察佢哋嘅情緒亦都要教佢點樣去處理，如果家長都未觀察亦都未了解清楚成件事就主動介入甚至乎搵學校幫手，可能效果會適得其反。更加嚴重嘅可能導致到個細路仔以後都唔願意講學校嘅情況畀家長知免得自己麻煩。其實細路仔都有佢哋自己嘅方法去處理問題，家長只要細心觀察一定會感覺到問題對仔女嘅影響。只要家長唔好事事干預小題大做，其實細路仔就會學習到處理事情嘅方法。