少年成長今日: 0|主題: 16108

收藏本版

發帖

返回列表

跳至頁

查看: 16288 | 回覆: 1

為青春期的轉變作準備 [複製鏈接]

csir3290

子爵府

積分: 12552

1^#

發表於 21-11-28 11:29 |只看該作者 |倒序瀏覽 |打印

喺其他論壇見到有一篇文章，有個媽媽喺網上面求助，因為個女進入青春期好似突然間變咗另外一個人咁，明明細個時好聽話好善解人意，但係一進入青春期就好似進入咗自我嘅世界咁。我見到好多人都有回應想幫手，但都有好多人有差唔多同樣嘅問題。其實好難講到畀人聽究竟可以點樣處理，但係呢個正正就係好多家長有仔女進入青春期嘅時候遇到嘅問題。

我覺得當仔女進入青春期嘅變化係唔會突然間出現，總會有啲蜘蛛絲馬跡，重要係睇下家長留唔留心到。例如進入青春期嘅細路仔想搵到身份嘅認同，自自然然就會喺朋友身上去搵，打扮同言行舉止都唔多唔少學啲朋友，家長有冇留心佢識乜嘢朋友同喺邊度識，呢個係好重要嘅跡象。當發現仔女好多時候好多嘢都唔再同父母傾，父母一講佢就嫌煩，其實我覺得有陣時係父母同仔女喺細個溝通嘅時候就已經有問題。正如我之前講仔女細個乜嘢都聽父母講，父母自然覺得冇問題，但係人係會長大嘅，當佢越嚟越大嘅時候，佢自然就有自己嘅諗法，但係父母就覺得呢啲諗法同自己嘅諗法有出入，自然就覺得係仔女有問題。仔女又覺得父母唔接受自己嘅諗法，咁終於咪導致到大家互不理睬。

仔女進入青春期除咗身體上有轉變外，仲有思想上係點都會有轉變，但係好多時父母接受唔到呢種轉變，再加上父母自己唔肯改變同仔女嘅相處方法而導致好多問題嘅發生。父母眼中仔女就永遠都係細個時候嘅仔女，但係喺佢哋長大過程中，其實父母係需要接受仔女嘅轉變，而且連自己亦都要有轉變。

另外，有陣時啲父母話為咗避免同仔女衝突，所以盡量都唔會「哦」佢哋或者同佢哋講。但係點解覺得一同佢哋講就會係衝突呢，因為父母一傾就想仔女接受佢哋嘅諗法，而仔女亦都覺得父母唔接受佢哋或者唔明白佢哋。例如仔女成日燶口燶面或者走咗入房唔理父母。如果係我，我唔會話佢哋，但我會同佢哋講佢哋嘅做法會令到我好擔心，我有需要話畀佢哋知我嘅諗法係點，我唔會話佢哋啱定錯，我只係會同佢哋講佢哋咁樣會令我好擔心或者好唔開心。我唔係要佢哋跟我嘅諗法去做，而係佢哋都需要知道父母嘅感受。因為互不理睬只會令到仔女覺得父母唔理佢哋或者係唔想同佢哋傾，但係正正就要等佢哋知道其實佢哋嘅做法係會令到我哋好擔心，我唔會批評或者鬧佢哋嘅做法，我只係表達自己嘅諗法同埋感受。有陣時後生仔未必會留心到父母嘅擔心同埋感受，但係有時當佢哋理解到父母嘅擔心反而佢哋可能會敞開心扉同大家傾。所以為咗避免衝突而唔去出聲唔去講，唔去正視問題絕對唔係一個好方法。

青春期嘅仔女其實喺好多方面都要面對轉變，父母要為呢啲轉變作好準備，包括要轉變自己嘅諗法同埋同佢哋嘅相處方法。除咗係幫仔女過渡青春期之外，更重要嘅就係幫自己過渡仔女嘅青春期。