少年成長今日: 0|主題: 16113

收藏本版

發帖

返回列表

跳至頁

查看: 18920 | 回覆: 2

乜嘢都唔准 [複製鏈接]

csir3290

子爵府

積分: 12625

1^#

發表於 20-7-19 11:36 |只看該作者 |倒序瀏覽 |打印

琴日喺網上面睇到篇文章講十大虎媽虎爸行為，其中第一位就係話經常喺仔女面前講［唔得唔准唔可以］。但係呢個其實好多家長都會經常喺仔女面前講嘅口頭禪，因為好多家長都會覺得係為仔女著想，唔想佢哋做錯事，想佢哋喺規範入面去做，所以最直接最快趣就係同佢哋講唔得唔准或者唔可以。家長好多時亦都會按照仔女係咪即時去按照指示去做而去評定自己嘅仔女係咪聽話。

自己都做過細路仔，其實都好記得十幾歲時都係唔鍾意父母成日同自己講呢樣唔准嗰樣唔得呢樣又唔可以，細個都會跟住做但係當越嚟越大嘅時候就會開始問點解成日都呢樣唔畀嗰樣唔准覺得好煩。大個啲嘅時候更加會係你越係話唔准，我就越係想要試，因為個心態係我都未試過你點知唔得呢。可能呢啲就係反叛心態啦。到咗自己大咗當然明白其實父母都係唔想我哋犯錯，唔想我哋走多咗冤枉路，最好就係按住佢哋嘅指示去做。雖然明白但係喺當時少不免會有一啲挫敗感。

到咗而家自己做爸爸，我更加在意嘅係幫對仔女建立自信，唔好畀咁多挫敗感，所以好多時我都會提醒自己唔好用啲太負面嘅字眼，唔好成日講唔得唔准唔可以，因為其實細路仔都有佢哋嘅諗法，我哋應該尊重。我會嘗試將我哋唔想去做嘅嘢變成我哋想佢點樣樣，即係我唔會講唔得，而係講可以點樣。例如唔想佢哋將啲玩具四圍或放最直接同佢講唔可以四圍放。但係我而家會講玩完啲玩具要放番好，通常我都會早啲提一提佢哋差不多要執嘢，到食飯就會同佢哋講，係時候食飯要放好啲嘢，有陣時我個仔會講話我食完飯會再玩，咁我就會同佢講請你將啲嘢擺埋一邊唔好整到人，然之後就等佢食完飯玩完先至再執，通常佢執完我都會讚吓佢，久而久之大家習慣咗呢種模式佢就會自動自覺執嘢。總之盡量嘗試將唔可以變成應該點做可以點做，其實無非都係令到佢哋得到多啲認同感，唔係樣樣都唔可以。所以佢哋而家分得好清楚當我同老婆一講唔可以或者唔得嘅時候，佢就知道嗰樣係重要嘢佢就多數都會跟住做。相反如果我哋不停喺佢側邊講唔得唔准唔可以嘅時候，佢就會覺得我哋樣樣都話唔得，會覺得煩同埋唔覺得重要。總之盡量希望減低佢嘅挫敗感提升佢哋嘅認同感建立自信。其實有陣時連我自己都唔為意會成日講唔得唔准唔可以，因為最快收效，我唔係話唔應該講，而係唔好成日都講變成口頭禪。久而久之唔只收唔到想要嘅效果反而令到啲仔女嘅挫敗感越嚟越強，覺得父母唔認同佢哋，更加重要係佢哋分唔到邊啲係真正父母覺得重要係唔可以咁做嘅嘢，因為喺佢嘅心入面只係得一句，就係爸爸媽媽樣樣都話唔得。咁究竟邊一樣先至係重要呢？嘗試由唔得唔准唔可以，變成可以應該希望之類嘅說話，同埋多啲欣賞。說話技巧上面只要慢慢嘗試改變收效可能會好大。