少年成長今日: 1|主題: 16018

收藏本版

發帖

返回列表

跳至頁

查看: 26302 | 回覆: 2

懂得欣賞嗎？ [複製鏈接]

csir3290

子爵府

積分: 12055

1^#

發表於 22-1-2 11:40 |只看該作者 |倒序瀏覽 |打印

阿仔同阿女一路都有跟教練打羽毛球，自從疫情好多室內運動場都變咗做疫苗中心之後，佢哋上堂就變得越嚟越難book場，所以差唔多次次上堂嘅地點都唔同，有陣時甚至連堂都上唔到就係因為book唔到場。早幾日有個新加入嘅家長就喺我哋個群組入面對教練有啲微言，問點解次次都唔同地點上堂又唔同時間，本來我都好少會喺群組出聲，但係見到咁我都覺得要同教練講番兩句說話，同個家長解釋教練都已經好努力但因為真係好難book到場。呢件雖然係一件好小嘅事，但係令我知道原來唔係個個懂得欣賞人哋做嘅嘢。因為係咁嘅情況之下其實教練都已經好盡力咁嘗試book場，盡量維持佢哋繼續可以上堂。真係我覺得找錯處好容易但係要欣賞人就好似好難咁。

唔知係咪又係中國人嘅通病，自己喺公司做嘢有陣時都覺得上司唔懂得欣賞人，有陣時直情會令到團隊工作士氣低落，所以我經常會提醒自己，對自己嘅下屬或者其他人都要懂得欣賞，咁樣除咗大家都舒服之外，仲可以提升工作效率。經常對人心存感激仲會令到幫你做嘢嘅人更加願意付出，提升工作效率同埋士氣。

對其他人都已經咁難懂得用欣賞嘅角度同埋多啲去讚賞，對親人就更加難。對屋企人更加容易吹毛求疵，更加容易發現到對方嘅錯處同埋事事都唔順眼，但係就係呢啲心態最容易令到大家嘅關係越嚟越差。其實大家都希望得到人哋嘅讚賞同得到人哋嘅認同，作為父母或者配偶懂得多欣賞同埋多讚賞自然就會令到大家關係更加融洽感情更加親密。我成日都覺得要細路仔做得好用讚一定比用鬧嘅效果會更加好，用鬧無錯喺開頭時好容易收到即時效果，但當你不停只會鬧時，只會令人閂埋隻耳仔，反而多啲用讚就會令到人覺得被欣賞，正所謂有邊個人唔鍾意畀人讚賞呢！

所以其實不論待人處事，喺公司定對親人都好，多用欣賞嘅角度，多用讚賞嘅方法其實都係有好好嘅效果。有啲人成日以為鬧或者惡人哋就會驚，自自然然就會做得好，其實人哋只係交行貨畀你，心入面根本就唔鍾意，所以根本就唔會諗點樣會再做好啲，心入面只係想住點樣唔好畀你鬧只係交差算數。而且到頭來令到個個都唔鍾意你，到最後受害嘅都只不過係自己。同事朋友冇咗可能可以算數，但係自己嘅親人甚或至乎仔女，自己一手破壞咗個關係，到頭來親人仔女都唔鍾意自己嘅時候受害嘅咪又係自己囉。不過可惜呢個道理唔係人人諗得通，以為惡就係嚴，以為家教就係用惡教出嚟。到頭來最冇家教嘅就係靠惡嘅人。我成日都覺得教細路仔用正向嘅方式鼓勵佢做得啱嘅嘢，係點都好過不停鬧住佢做錯嘅嘢。

我唔係講話完全唔用鬧，而係要鬧得有用。當你真係一要用鬧嘅時候就要中，而唔係你一用鬧佢哋就閂埋隻耳仔。咁樣根本你點鬧都冇用。