少年成長今日: 2|主題: 16076

收藏本版

發帖

返回列表

跳至頁

查看: 12765 | 回覆: 0

睇報紙 [複製鏈接]

csir3290

子爵府

積分: 12352

1^#

發表於 21-10-17 12:11 |只看該作者 |倒序瀏覽 |打印

呀仔今年五年班，我哋開始幫佢訂報紙。由於每日都有報紙派，開頭我哋仲擔心佢訂咗唔知會唔會睇，但係訂之前我呢都問咗佢係咪會睇，佢話會睇我哋先至訂，咁就即管信住佢先啦。點知上個月禮拜開始收到報紙，其實我哋開頭都唔知佢有冇真係睇，亦冇特別問佢因為好似唔信佢咁，但係原來佢日日都有睇。我哋點知呢？因為佢最有興趣睇嘅就係娛樂版同埋報紙上面嗰啲公告，例如佢會搶先咁話畀我哋聽話邊度封路，就嚟重陽節邊度有特別交通安排，又會同我老婆講mirror嘅新聞，所以我哋知佢每日都應該有睇份報紙。再加上因為我每一日都有個習慣就係放咗工返到屋企食完飯之後，一定有段時間大家一齊睇書，咁我就會睇下我份報紙，原來呢個習慣對呀仔都會有影響，因為佢見到我睇嘅時間而家佢都會再攞佢份報紙出嚟一齊睇。兩父子就一人喺枱嘅一邊，打開各自嘅報紙睇，佢睇到啲得意或有興趣嘅就會即刻同我哋講，一家人又多咗啲溝通嘅機會。

有啲家長可能會覺得睇報紙就梗係應該睇新聞或者睇英文版啦，但係我覺得閱讀嘅興趣其實冇乜所謂，要培養佢嘅閱讀興趣，自自然然就應該係畀佢睇佢有興趣嘅嘢，就算係娛樂版或者只不過係啲報紙上面嘅公告都好，只要佢有興趣睇就得。另外，細佬好鍾意睇完報紙之後就會將一啲佢睇到嘅新知識同我哋講，佢最鍾意就係問我哋「知唔知道點解乜嘢會係咁」，佢係咁問我，你就知道佢又係睇報紙學到啲新嘢。明為咗鼓勵佢，我哋當然要好有心機咁聽佢講。

其實要培養閱讀可以話係咁簡單，但係又一啲都唔簡單。首先閱讀嘅環境好緊要，父母肯唔肯放低部手機，肯唔肯熄咗部電視同佢哋一齊睇書呢！父母把口成日就叫細路仔睇書但係自己就從來都唔會掂本書，咁細路仔又點會睇學到睇書呢！其實唔係話要啲父母真係睇啲乜嘢書，其實只要肯放低部手機熄咗部電視大家靜靜地一齊閱讀，父母可以睇下雜誌可以睇下報紙，總言之就係做就一個習慣，咁慢慢細路仔就慣咗閱讀。如果連咁嘅環境都做唔到，只係靠把口成日叫佢睇書睇書，咁又點會真係有成效呢！

另外好似我個仔咁好鍾意同我哋分享佢睇書睇報紙學到嘅嘢，咁做父母就更加要懂得欣賞佢哋，千祈唔好敷衍佢哋，雖然可能要用多咗時間去聽佢講乜嘢，但係作為溝通又好，作為認同又好，點樣都應該要用心聽同埋畀回應，咁細路仔就會覺感受到父母嘅認同。

細路仔嘅閱讀習慣越細培養就越容易，閱讀嘅世界入面細路仔可以搵到無限嘅樂趣，父母要記住畀細路仔自由咁去睇佢有興趣嘅嘢，一份報紙有咁多內容，唔係淨係新聞版或者英文版先至係有用嘅內容，總之能夠令到佢哋產生興趣嘅就已經係有用嘅內容，所以要培養閱讀就要由興趣同埋環境開始著手。